ސަރުކާރުން ބޭނުންވާ ގޮތަށް ޓާމިނަލް ހިންގަން، ބޯޑު ބަދަލުކުރަން ތައްޔާރު: އަމީރު
17 ފެބުރުއަރީ 2020 | ހޯމަ 20:15ކޮރަޕްޝަންގެ މައްސަކަތައް އުޅޭނަމަ ޖިނާއީ ތަހުގީގެއް ހިންގައިދީ: އަމީރު
ފިނޭންސް މިނިސްޓަރު އިބްރާހިމް އަމީރު (މ)
މޯލްޑިވްސް އެއާޕޯޓް ކޮމްޕެނީ ލިމިޓެޑް(އެމްއޭސީއެލް) ގެ ބޯޑު ބަދަލުކޮށްގެން ވިޔަސް ސަރުކާރުން ބޭނުންވާ ގޮތަށް އައު ސީޕްލޭން ޓާމިނަލް ހިންގާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
އެމްއޭސީއެލުން ނުއަގުގައި، ދައުލަތަށް ގެއްލުންވާ ގޮތަށް ސީ ޕްލޭން ޓާމިނަލް ދޭން ނިންމާފައިވާ ކަމުގެ އަޑުތައް ވަނީ ފެތުރިފައެވެ. އެންޓި ކޮރަޕްޝަން ކޮމިޝަން (އޭސީސީ) އިން ބުނެފައިވާ ގޮތުން އައު ޓާމިނަލް ޓީއެމްއޭއަށް ދޭން ނިންމާފައިވާ އަގަށް ބަލާއިރު އަހަރަކު ދައުލަތަށް 55 މިލިއަން ޑޮލަރު (848 މިލިއަން ރުފިޔާގެ) ގެއްލުމެއް ލިބޭނެއެވެ.
ހޯމަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަ ދައްކަވަމުން ފިނޭންސް މިނިސްޓަރު ވިދާޅުވީ، މި ސަރުކާރު ވެރިކަމާއި ހަވާލުވުމާއި އެކު ކުރިން އެމްއޭސީއެލުން ސީ ޕްލޭން ޓާމިނަލް ކުއްޔަށް ދިނުމަށް މަސައްކަތް ކުރަމުން ގެންދިޔަ ގޮތަށް ކުއްޔަށް ނުދިނުމަށް އެ ކުންފުންޏަށް އަންގާފައިވާނެ ކަމަށެވެ.
އަދި ސަރުކާރުން ނިންމި ނިންމުމުގައި އިސްކަން ދީފައިވަނީ ރައްޔިތުންގެ މަސްލަހަތާއި، ރާއްޖޭގެ އިގްދިސާތައް އޭގެ ފައިދާ އެންމެ ބޮޑުވާނެ ގޮތަކަށް އަދި އިގްތިސާދު ކުރިއަރައިގެން ދާނެ ގޮތަކަށް ކަމަށް ވިދާޅުވިއެވެ.
އަމީރު ވިދާޅުވީ، ޓާމިނަލް މައްސަލާގައި އެމްއޭސީއެލްއޭ އާއި ޓީއެމްއާ ދެމެދު އެއްވެސް ކަހަލަ ކޮންޓްރެކްޓެއްގެ އެއްބަސްވެފައިނުވާ ކަމަށެވެ.
އޭނާ ވިދާޅުވީ، ޓީއެމްއޭ އަށް ޓާމިނަލް ދޭ މައްސަލަ މަޖިލީހުގެ ކޮމިޓީގައި މަރުހަލާގައި އޮތީމާ، ޓީއެމްއޭގެ އިތުރުން އެހެން އޮޕަރޭޓަރުންނަށްވެސް އެ ވާހަކަ ދެކެވެން އެބަ އޮތް ކަމަށެވެ. ސަރުކާރު ބަދަލުނުވިނަމަ ފެނިގެންދާނީ އައު ސީޕްލޭން ޓާމިނަލް 10.15 ޑޮލަރަށް އޭރު އެއްބަސްވެފައިވާ ގޮތަށް އެހެން އޮޕަރޭޓަރަކަށް އެއްކޮށް ދީފައިވާތަން ކަމަށް ފިނޭންސް މިނިސްޓަރު ވިދާޅުވިއެވެ.
ކޮމިޓީގައި، ދާންދޫ ދާއިރާގެ މެމްބަރު ޔައުގޫބް އަބްދުﷲ ކުރެއްވި ސުވާލަކަށް ޖަވާބު ދެއްވަމުން އަމީރު ވިދާޅުވީ، މިހާރު ސަރުކާރުން ހުށައަޅާފައިވާ ހުށައެޅުމާއި އެއް ގޮތަށް އެމްއޭސީއެލްގެ ބޯޑުން އެ މަސައްކަތް ކުރިޔަށް ގެންދާނެ ކަމަަށެވެ. ޓީއެމްއޭއިން މިހާރުވެސް ބޭނުންކުރަމުންދާ ޖާގައިގެ ބޮޑު މިނާއި އެއްވަރަށް، އައު ސީޕްލޭން ޓާރމިނަލުން، ދެ އަހަރު ދުވަހުގެ މުއްދަތަށް ޖާގަ ކުއްޔަށް ދިނުމަށް ސަރުކާރުން ވަނީ ނިންމާފައެވެ.
ސީޕްލޭން ޓާމިނަލްގެ މައްސަލައިގައި ކޮރަޕްޝަނަށް މަގުފައިވާ ގޮތަށް އެއްވެސް ބަޔަކު އަމަލުކޮށްފައިވާނަމަ އެ ފަރާތްތަކާއި މެދު ޖިނާއި ތަހުގީގެއް ހިންގުން އެއީ ސަރުކާރުންވެސް ބޭނުންވާ ގޮތް ކަމަށް މިނިސްޓަރު ވިދާޅުވިއެވެ.
ސަރުކާރުގެ ނިންމުން ނިންމާފައިވަނީ އޮޑިޓަރ ޖެނެރަލް ނެރެފައިނާ ރިޕޯޓަށް ނޫންކަން ފާހަގަކުރައްވަމުން އޭނާ ވިދާޅުވީ، އެކަން ނިންމީ އޭގެ ކުރިން ކަމަށެވެ. އަމީރު ވިދާޅުވީ، ސަރުކާރުގެ ނިންމުން ނިންމުމުގައި ޓީއެމްއޭއާ މަޝްވަރާ ކޮށްފައިނުވާނެ ކަމަށެވެ. އެމްޢެސީއެލުން ޓާމިނަލް އޮޕަރޭޝަނަށް ވިސްނާފައި ނެތްކަން އަމީރު ފާހަގަކުރެއްވިއެވެ.
