ކުޑަކުދިންނަށް ކުރާ ޖިންސީ ގޯނާތަކުގެ އެންމެ ބޮޑު މައްސަލައަކީ އިންސާފު ނުލިބުން: ޖީހާން
ވޭތުވެދިޔަ 15 އަހަރުގެ ތެރޭގައި ކުޑަކުދިންނަށް ޖިންސީ ފުރައްސާރަކުރިކަމުގެ 3135 މައްސަލަ ފުލުހުންނަށް ހުށަހެޅުނު
ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު ޖީހާން މަހުމޫދް
ކުޑަ ކުދިންނަށް ޖިންސީ ގޯނާކޮށްފައި ތިބި ފަރާތްތައް އިންސާފުން އެއްކިބާވެ މުޖްތަމައަށް ދޫވެފައި ތިބުމަކީ, މުޖިުތަމައަށާއި އެކުދީންގެ އާއިލާއަށް ވަރަށް ބޮޑު ރިސްކެއްކަމަށް ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު ޖީހާން މަހުމޫދް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަ ދައްކަވަމުން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ މުގައްރިރުކަންވެސް ކުރައްވަމުން ގެންދަވާ ޖީހާން ވިދާޅުވީ 19 ވަނަ ރައްޔިތުންގެ މަޖިލީހުގައި އަލަށް އުފެދުނު ކޮމިޓީއަށް ޒަމާންވީ ބޮޑެތި މައްސަލަތައް ހުށަހެޅިގެން ދިޔަކަމަށާއި އެއާއެކު އިންސާފު ނުލިބި ދިގުލައިގެން ގޮސްފައިވަނީ ކިތެއް މައްސަލަތޯ ބެލުމަށް ކޮމިޓީން ނިންމިކަމަށެވެ.
އެގޮތުން ތަފާސްހިސާބުތައް ކިރިޔާވެސް ލިބެން ހުރީ ކޮންއިރަކުންތޯ ބެލުމަށް ފަހު ފާއިތުވި 15 އަހަރުގެ ތެރޭގައި ފުލުހުންނަށް ހުށަހެޅިފައިވާ މައްސަލަތަކުގެ ތަފްސީލަށް ބެލުމަށް ނިންމިކަމަށް ޖީހާން ވިދާޅުވިއެވެ.
ވޭތުވެދިޔަ 15 އަހަރުގެ ތެރޭގައި ކުޑަކުދިންނަށް ޖިންސީ ފުރައްސާރަކުރިކަމުގެ 3135 މައްސަލަ ފުލުހުންނަށް ހުށަހެޅުނު ކަމަށް ފާހަގަކުރެވިފައިވާކަމަށާއި އެ މައްސަލަތައް ތަހުގީގުކޮށް ޕްރޮސިކިއުޓަރ ޖެނެރަލްގެ އޮފީހާއި ހަމަޔަށް ގޮސް އެ އޮފީހުން ކޯޓަށް ދިޔުމުން ކުށްކުރާ މީހާގެ މައްޗަށް ކުށް ސާބިތުވެފައިވަނީ އެންމެ 36.41 މައްސަލައިގައި އެކަނިކަމަށް ޖީހާން ވަނީ ފާހަގަކުރައްވާފައެވެ.
ޖީހާން ވިދާޅުވީ، މިކަންތަކުން އެނގިގެން ދިޔައީ ރާއްޖޭގައި ހެދިފައިވާ ނިޒާމުތަކުން ޖިންސީ ގޯނާކޮށްފައިވާ ކުޑަކުދިންނަށް އިންސާފު ހޯދައިދެވިފައި ނުވާކަންކަމަށާއި 36 އިންސައްތަ މީހުންނަށް ކުށް ސާބިތުވެފައިވާއިރު، 45 އިންސައްތައަށް މައްސަލަ ސާބިތު ނުވެ 2 އިންސައްތަ މައްސަލަ ސާބިތުނުވާކަމަށެވެ.
ޖީހާން ވިދާޅުވީ ފުލުހުން އެ މައްސަލަ ޕީޖީއަށް ފޮނުވަނީ އެކަށީގެންވާ ހެކި ހޯދުމަށް ފަހުގައި ކަމަށާއި އަދި ޕީޖީން އެ މައްސަލަ ކޯޓަށް ހުށަހަޅަނީވެސް ޔަގީންކަން އޮވެގެން ކަމަށެވެ. ނަމަވެސް، އިންސާފުން އެއްކިބާވެ އެ ފަރާތްތައް މުޖްތަމައަށް ދޫވެފައި ތިބުމަކީ އާއިލާތަކަށާއި އެ ކުދިންގެ އިތުރުން މުޅި މުޖްތަމައުވެސް ބޮޑު ނުރައްކަލަކަށް ހުށަހެޅިގެންދާނެކަމެއްކަމަށް ޖީހާން ވަނީ ފާހަގަކުރައްވާފައެވެ.
މިފަހުން ކުޑަކުދިންނަށް ކުރާ ޖިންސީ ގޯނާގެ މައްސަލަތައް އިތުރުވެފައިވާތީ ރައްޔިތުން އަންނަނީ މިކަމާއިމެދު އިންތިހާއަށް ކަންބޮޑުވުން ފާޅުކޮށް އަވަސް ފިޔަވަޅުތަކެއް އެޅުމަށް ގޮވާލަމުންނެވެ. އަދި އެފަދަ ފަރާތްތަކަށް ގާނޫނުގެ ތެރެއިން ދެވެން އޮތް އެންމެ ހަރުކަށި އަދަބު ދިނުމަށްވެސް ގިނަ ފަރާތްތަކަކުން އަންނަނީ ވަކާލާތުކުރަމުންނެވެ.
