ރާއްޖޭގެ ފުރަތަމަ ބައިނަލްއަގްވާމީ ފެންވަރުގެ ބީޗް ވޮލީ ކޯޓު ހުޅުވައިފި

ހުޅުމާލޭ ސްކޭޓް ޕާކް ސަރަހައްދުގައި ބައިނަލްއަގްވާމީ ފެންވަރަށް ތަރައްގީކުރި ބީޗް ވޮލީ ކޯޓު ހުޅުވައިފިއެވެ.

ހޮނިހިރު ދުވަހު ބޭއްވި ރަސްމިއްޔާތެއްގައި ބީޗް ވޮލީ ކޯޓު ހުޅުއްވައިދެއްވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ. މި ރަސްމިއްޔާތުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، ކުޅިވަރާއި ބެހޭ ވަޒީރު އަހުމަދު މަހުލޫފްގެ އިތުރުން ރައްޔިތުންގެ މަޖިލީހުގެ ހުޅުމާލޭ ދާއިރާގެ މެމްބަރު އަލީ ނިޔާޒާއި ވޮލީ އާއިލާގެ ވަރަށް ގިނަ ކުޅުންތެރިންވަނީ ބައިވެރިވެފައެވެ.

ބީޗް ވޮލީ ކޯޓު ހުޅުވުމުގެ ރަސްމިއްޔާތުގައި ވާހަކަދައްކަވަމުން ވޮލީ އިންޓަރިމް ކޮމެޓީގެ މެމްބަރު މުހައްމަދު ސާޖިދު (ކާއްޓޭ) ވިދާޅުވީ، މި ކޯޓަކީ އައިއޯއައިޖީއިން މެޑަލް ގެނައި ޓީމު ތައްޔާރުވުމަށް ބޭނުންކުރި ކޯޓު ކަމަށާއި އަދި މި ކޯޓު މި ފެންވަރަށް ތަރައްގީ ކުރި ކަމަށްޓަކައި މިނިސްޓަރ މަހުލޫފްއަށް ޝުކުރު ދަންނަވާކަމަށެވެ. މީގެއިތުރުން ކާއްޓޭ ވިދާޅުވީ ރައީސް އަދި މިނިސްޓްރީގެ އެހީތެރިކަމާއިއެކު ގައުމީ ވޮލީ އަންހެން އަދި ފިރިހެންޓީމު ކުރިޔަށް އޮތް ހަފްތާއެއްގެ ތެރޭގައި ޔޫރަޕަށް ފުރުމަށް ހަމަޖެހިފައިވާ ކަމަށެވެ.

ހުޅުމާލޭގައި ބައިނަލްއަގުވާމީ ފެންވަރުގެ ބީޗްވޮލީބޯޅަ ޓްރެއިނިން ފެސިލިޓީއެއް ގާއިމުކުރިއިރު، ބީޗް ވޮލީބޯޅައިން ފަހަކަށް އައިސް ރާއްޖޭގެ ކުޅުންތެރިން އަންނަނީ ރަނގަޅު ވަނަތަކެއް ހޯދަމުންނެވެ. އެގޮތުން މިދިޔަ އަހަރު އޮތް އިންޑިއަން އޯޝަން އައިލެންޑް ގޭމްސްގެ ބީޗް ވޮލީބޯޅަ އިވެންޓުގައި ރާއްޖޭގެ ފިރިހެން ބީޗް ވޮލީބޯޅަ ޓީމުން ރިހި މެޑަލް ހޯދިއިރު، ހަމަ އެ ގޭމްސްގައި އިންޑިވިޖުއަލް ބައިން ރާއްޖޭގެ ޝިއުނާޒް އަބްދުލް ވާހިދު (މަންކޭ) އާއި އާދަމް ނަސީމް (އެޑަމް)ގެ ޕެއާ އިން ވަނީ ލޯ މެޑަލް ހޯދާފައެވެ.

ހުޅުމާލޭ ބީޗް ވޮލީބޯޅަ ކޯޓު ބައިނަލްއަގުވާމީ ފެންވަރުގެ ޓްރެއިނިން ފެސިލިޓީއަކަށް ބަދަލުކުރިއިރު، ބީޗް ވޮލީބޯޅަ ކުޅުމަށާއި ގައުމީ މުބާރާތްތައް ބޭއްވުމަށް ބޭނުންކުރަމުން އަންނަނީ މާލޭ ދޮންގަނޑު ބީޗް ވޮލީބޯޅަ ކޯޓެވެ. މިދިޔަ ސަރުކާރުގައި އެ ކޯޓު ބަންދުކުރި ނަމަވެސް، މި ސަރުކާރުން ވަނީ އެ ކޯޓު އަލުން ހުޅުވާފައެވެ.