ކައުންސިލް އިންތިހާބުގެ އެމްޑީޕީގެ ސްޕޯކްސްޕާސަންއަކަށް އަފްޝަން
އަފްޝަން ސްޕޯކްސްޕާސަންއަކަށް އައްޔަނުކުރެއްވީ ހޮނިހިރު ދުވަހު
އެމްޑީޕީގެ ޑެޕިއުޓީ ސެކްރެޓަރީ ޖެނެރަލް އަފްޝަން ލަތީފް
އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ކެމްޕެއިންގެ ސްޕޯކްސްޕާސަން އަކަށް އަފްޝަން ލަތީފް ހަމަޖައްސައިފިއެވެ.
އަފްޝަން ލަތީފަކީ ނިމިގެންދިޔަ ރައްޔިތުންގެ މަޖިލީހުގެ އިންތިހާބުގައިވެސް އެމްޑީޕީން ބޭއްވި ހުރިހާ ހަރަކާތެއްގެ މައުލޫމާތު ހިއްސާކުރެއްވި ފަރާތެވެ. އަފްޝަން އަކީ މިހާރުވެސް އެޕާޓީގެ ޑެޕިއުޓީ ސެކްރެޓަރީ ޖެނެރަލްއެވެ.
ސަރުކާރުގެ މައި ޕާޓީ އެމްޑީޕީން މީގެކުރިން ބުނެފައިވަނީ، ޕްރައިމަރީގައި ވޯޓުލާފައިވާ މީހުންގެ ޢަދަދާއި އަދި ވޯޓު ލުމުގައި އެމްޑީޕީގެ ޢާންމު މެންބަރުން ހުރި ޝައުޤުވެރިކަމާއިއެކު، ލޯކަލް ކައުންސިލްގެ އިންތިޚާބުގައި އެމްޑީޕީއަށް 60 ޕަސެންޓަށްވުރެ ގިނަ ގޮނޑި ކާމިޔާބު ކުރެއްވޭނެ ކަމަށް ޤަބޫލުކުރާ ކަމަށެވެ.
ލާމަރުކަޒީ ގާނޫނަށް ބޮޑެތި އިސްލާހުތަކެއް ގެނައުމަށް ފަހު ބާއްވަ ފުރަތަމަ ލޯކަލް ކައުންސިލް އިންތިހާބާއި، އަންހެނުންގެ ތަރައްގީ ކުރިއަރުވާ ކޮމިޓީގެ އިންތިހާބު ބޭއްވުމަށް އީސީން ކަނޑައަޅާފައިވާ ތާރީހަކި އޭޕްރީލް މަހުގެ ހަތަރު ވަނަ ދުވަހުއެވެ.
އީސީން ލަފާކުރާ ގޮތުން މި ފަހަރުގެ އިންތިހާބުގައި ހަ ހާހާށްވުރެ ގިނަ ކެނޑިޑޭޓުން ވާދަކުރާނެއެވެ. އޮފިޝަލުންގެ ގޮތުގައި ހަތް ހާހަކަށް ވަރަކަށް މީހުން ޙަރަކާތްތެރިވާނެ ކަމަށް ލަފާކޮށްފައިވާއިރު، އިންތިޚާބުގައި ޖުމުލަ 545 ވޯޓު ފޮށި ބަހައްޓަން ވަނީ ހަމަޖެހިފައެވެ.
