ކައުންސިލްތައް ސަރުކާރަށް ދީފިނަމަ ޚުދުމުހުތާރު ވެރިކަމަކަށް މިސްރާބު ޖަހާނެ: އާދަމް ޝަރީފް
ތިން ބާރު މަސްހުނި ކުރަމުންދާ މަންޒަރު ރައްޔިތުންނަށް ފެނޭ
ޕީއެންސީގެ ނައިބު ރައީސް އާދަމް ޝަރީފް
ކުރިއަށް އޮތް ލޯކަލް ކައުންސިލް އިންތިޚާބު ސަރުކާރަށް ދީފިނަމަ ޚުދުމުހުތާރު ވެރިކަމަކަށް މިޞްރާބު ޖަހާނެކަމަށް ޕީއެންސީގެ ނައިބުރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވެއްޖެއެވެ.
އާދަމްޝަރީފް މިހެން ވިދާޅުވީ އެމްޑީޕީން ލޯކަލް ކައުންސިލް އިންތިޚާބުގެ ކެމްޕޭން ޕޯސްޓަރު ހަރުކުރުމަށް ހޮނިހިރު ދުވަހުގެ ހެނދުނު ބޭއްވި ރަސްމިއްޔާތުގައި ރައީސް އިބްރާހިމް މުޙައްމަދު ޞާލިޙު ދެއްކެވި ވާހަކަފުޅާއި ގުޅިގެންނެވެ.
މި ރަސްމިއްޔާތުގައި ރައީސް ޞާލިޙު ވިދާޅުވީ ކައުންސިލް އިންތިޚާބުގައި ވެސް އެ ޕާޓީއަށް ބޮޑު ކާމިޔާބީއެއް ލިބޭނެ ކަމަށާއި، ނިމިގެން ދިޔަ މަޖިލިސް އިންތިޚާބުގައި ރައްޔިތުން ދެއްކި ނަތީޖާއާ އެއް މިޞްރާބެއްގައި ރައްޔިތުން އަދިވެސް އެބަތިއްބެވި ކަމަށެވެ.
ރައީސްގެ ވާހަކަފުޅަށް ރައްދު ދެއްވަމުން އާދަމް ޝަރީފް ކުރެއްވި ޓްވީޓެއްގައި ވިދާޅުވީ ގިނަ ވަޢުދުތައް ނުފުއްދި، މިނިމަމް ވޭޖް ކަނޑަނޭޅި، ވަޒީފާގެ ޕްރޮބޭޝަން ދިގުކޮށް، ބައެއް މާއްދާތައް ހުއްޓާލައި، ތިން ބާރު މަސްހުނި ކުރަމުންދާ މަންޒަރު ރައްޔިތުންނަށް ފެންނަ ކަމަށެވެ.
އަދި ލޯކަލް ކައުންސިލްތައް ވެސް ސަރުކާރަށް ދީފިނަމަ އެ ޕާޓީން ޚުދުމުހުތާރު ވެރިކަމަކަށް މިޞްރާބު ޖަހާނެކަން ރައްޔިތުން ދަންނާނެ ކަމަށް އާދަމް ޝަރީފް ވިދާޅުވިއެވެ.
އަންނަ އެޕްރީލް މަހުގެ 4 ވަނަ ދުވަހު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބަށް ސަރުކާރުގެ މައި ޕާޓީ އެމްޑީޕީ އަދި އިދިކޮޅު މައި ޕާޓީ ޕީޕީއެމުން ވަނީ ޕްރައިމަރީތައް ބާއްވާފައެވެ. މި އިންތިޚާބުގައި 983 މީހުން އިންތިޚާބު ކުރާ އިރު، މިއީ ލާމަރުކަޒީ ޤާނޫނަށް ބޮޑެތި އިޞްލާޙުތަކެއް ގެނައިފަހުން ބައްވާ ފުރަތަމަ އިންތިޚާބެވެ.
