ގިނަ ޢަދަދެއްގެ މަސްތުވާތަކެއްޗާއެކު 3 މީހަކު ހުޅުމާލެއިން ހައްޔަރުކޮށްފިއެވެ.

މީޑިއާތަކަށް މަޢުލޫމާތު ދެމުން ފުލުހުން ބުނެފައިވަނީ، މި ހިނގާ ފެބްރުއަރީ މަހުގެ 9 ވަނަ ދުވަހު ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން ހިންގި އޮޕަރޭޝަނެއްގައި ކޯޓު ޢަމުރެއްގެ ދަށުން ހުޅުމާލެގެ ދެ ގެޔަކާއި ދެ ފްލެޓެއް ބަލައި ފާސްކޮށް ގިނަ ޢަދަދެއްގެ މަސްތުވާތަކެތި ފުލުހުންގެ ބެލުމުގެ ދަށަށް ގެނެސްފައިވާކަމަށެވެ.

މި ތަންތަން ބަލާ ފާސްކޮށް މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 24 ސެލޯފިން ކޮޅާއި، 16 ފިލްމު ހުސްކުރި ދަޅުގެ އިތުރުން ބޮޑު 2 ރަބަރު ޕެކެޓު ފެނިފައިވާކަމަށް ފުލުހުން ވަނީ ހާމަކޮށްފައެވެ. މި މައްސަލައާއި ގުޅިގެން އުމުރުން 27 އަހަރާއި 23 އަހަރުގެ ދިވެހި ދެ ފިރިހެނުންނާއި 26 އަހަރުގެ ބިދޭސީ ފިރިހެނެއް ހައްޔަރުކޮށްފައިވާކަމަށް ފުލުހުން ވަނީ ބުނެފައެވެ.

މި މައްސަލަ ފުލުހުން އިތުރަށް ތަހުޤީޤުކުރަމުން ދާއިރު ފަހަކަށް އައިސް ފުލުހުންގެ ޑިޕާޓްމަންޓުން ހިންގާ އެކި އެކި އޮޕަރޭޝަންތަކުގައި ގިނަ ޢަދަދެއްގެ މަސްތުވާތަކެއްޗާއެކު މީހުން ދަނީ ހައްޔަރުކުރަމުންނެވެ. އެގޮތުން ނިމިދިޔަ ޖެނުއަރީމަހުގައި ހިންގި އޮޕަރޭޝަނެއްގައި 9 ކިލޯއަށް ވުރެ ގިނަ މަސްތުވާތަކެއްޗާއި، އެއްލައްކަ އަށްވުރެ ގިނަ ޑޮލަރާއި، މިލިއަނަކަށްވުރެ ގިނަ ރުފިޔާ ފުލުހުންގެ ބެލުމުގެ ދަށަށް ގެނެސްފައިވެއެވެ.