ޓެކްސީ ޑްރައިވަރު، 59 އަހަރުގެ ގާސިމް ހަސަން މަރުގެ މައްސަލާގައި, ތޫނުއެއްޗަކުން ހަމަލާދީ ގަސްދުގައި މީހަކު މަރާލިކަމުގެ ދައުވާ އުފުލާފައިވާ އަދުހަމް މުހައްމަދު ޝަރީއަތުގެ އަޑުއެެހުކުގައި ގާސިމްގެ އާއިލާގެ ފަރާތުން މައާފަށް އެދެފި އެވެ.

ބުދަ ދުވަހު ކްރިމިނަލް ކޯޓުގައި ބޭއްވި އަޑުއެހުމުގައި އަދުހަމް ބުނީ، ވަޅިން ދިން ހަމަލާއިން ގާސިމް މަރުވުމާއެކު، އޭނާ މިސްކިތަށް އަރާ ނަމާކޮށް، ތައުބާވި ކަމަށާއި، އެކަމާ ރޮއި ހިތާމަ ކުރިކަމަށެވެ. އަދި ގާސިމްގެ އާއިލާގެ ކިބައިން މައާފަށް އެދޭ ކަމަށްވެސް އަދުހަމް ބުންޏެވެ.

އަދުހަމްގެ ބަޔާނުގައި ބުނެފައިވަނީ ވަނީ އޭނާ ފޭރުމަށް މަސައްކަތްކުރީ އޭނާ ދިރިއުޅޭ ގޭގެ ކުލި ނުދެއްކިގެން، ގެއިން ނުކުންނަންޖެހޭ ހާލަތަށް ދިޔުމުން ކަމަށެވެ. އަދި ގާސިމަށް ހަމަލާދިންއިރު ހުރީ މަސްތުގެ ހާލަތުގައި ކަމަށްވެސް އަދުހަމް ބުނެފައި ވެއެވެ.

ނަމަވެސް އަދުހަމް ބުނީ ގާސިމަށް ހަމަލާ ދިނުމުގައި އަދި އޭނާ މަސްތުވުމުގައި އެއްވެސް ފަރާތެއްގެ މަޖުބޫރުކަމެއް ނެތް ކަމަށެވެ.

ގާސިމް މަރުގެ މައްސަލާގައި ދައުލަތުން ދައުވާކުރާ އަދުހަމްގެ މައްޗަށް ހިންގާ ޝަރީއަތުގެ އިބްތިދާއީ އަޑުއެހުމެއް ބުދަ ދުވަހު ބޭއްވިއިރު މިއީ އިބްތިދާއީ ދެވަނަ އަޑުއެހުމެވެ. ފުރަތަމަ އަޑުއެހުން ބާއްވާފައިވަނީ އަންގާރަ ދުވަހު އެވެ. އެއަޑުއެހުމުގައި އަދުހަމްގެ ފަރާތުން ވަކާލާތު ކުރައްވާ ވަކީލު ވަނީ މައްސަލައިގެ ހުރިހާ ލިޔެކިޔުންތައް ހަމައަށް ނުލިބޭކަމަށް ވިދާޅުވެފަ އެވެ. އެހެންކަމުން އިބްތިދާއީ އެއަޑުއެހުމުގައި ދައުވާ އިއްވުން ވަނީ ބުދަ ދުވަހަށް ފަސްކޮށްފަ އެވެ.

އެގޮތުން ބުދަ ދުވަހުގެ އަޑުއެހުމުގައި ދައުލަތުގެ ފަރާތުން އަދުހަމްގެ މައްޗަށް ކުރާ ދައުވާއާއި ތަހުގީގަށް ދީފައިވާ ބަޔާނާއި އަދި ޕްރޮސެކިއުޓަރ ޖެނެރަލްގެ އޮފީހާއެކު ވެފައިވާ އިއުތިރާފްގެ އެއްބަސްވުން އިއްވުމުން އަދުހަމް ވަނީ އެދައުވާ ސާފުވާ ކަމަށާއި އަދި ދައުވާއަށް އިއުތުރާފްވާ ކަމަށް ބުނެފަ އެވެ. އަދި ގާސިމް މަރާލި މައްސަލައިގެ ތަހުގީގަށް އަދުހަމް ދީފައިވާ ބަޔާނާއި ޕްރޮސެކިއުޓަރ ޖެނެރަލްގެ އޮފީހާއެކު ވެފައިވާ އިއުތިރާފްގެ އެެއްބަސްވުމުގައި ބުނެފައިވާ ވާހަކަތަކަކީ ކަން ހިނގާދިޔަ ގޮތް ކަމަށާއި އޭގައި ދެބަސްވެވޭ އެއްވެސް ކަމެއް ނެތް ކަމަށް ބުނެ އަދުހަމް ވަނީ އެހުރިހާ ކަންކަމަށް އިއުތިރާފް ވެފަ އެވެ.

ގަސްތުގައި މީހަކު މަރާލުމުގެ ކުށުގެ އަދަބަކީ އުމުރަށް (25 އަހަރަށް) ޖަލަށް ލުމެވެ. ނަމަވެސް ކުށަށް އަދުހަމް އިއުތިރާފް ވެފައިވާތީ، އޭނާގެ މައްޗަށް މިހާރު އަންނާނެ އަދަބަކީ 17 އަހަރާއި 6 މަހުގެ ޖަލު ހުކުމެކެވެ.

އަދުހަމްގެ އިއުތުރާފާއެކު، މިމައްސަލަ ބައްލަވާ ގާޒީ އިސްލާއީލް ރަޝީދު ވިދާޅުވީ، ދެން މިމައްސަލާގައި ބޭއްވޭނީ އަވަސްނިޔާގެ ޝަރީތުގެ އަޑުއެހުމެއް ކަމަށެވެ. އެއަޑުއެހުމުން މިމަހުގެ 18 ވަނަ ދުވަހުގެ 11:30 ގައި ކްރިމިނަލް ކޯޓުގައި އޮންނާނެ ކަމަށްވެސް ގާޒީ ވިދާޅުވި އެވެ.

މިމަހުގެ 18 ވަނަ ދުވަހު ބާއްވާ އަޑުއެހުކުގައި އަދުހަމްގެ އިއުތިރާފްގެ ބަޔާން ޝަރީއަތުގައި ދަމަހައްޓައިފިނަމަ، އޭނާގެ މައްޗަށް 17 އަހަރާއި 6 ދުވަހަށް ޖަލަށްކުމަށް ހުކުމް ކުރާނެކަމަށް މިވަނީ ބެލެވިފަ އެވެ.