މަސީހާ ދެކޮޅަށް ވޯޓު ދެއްވާ މެމްބަރުން، ހަތަރު ޕާޓީންގެ ތާއިދާއި އެކު އިތުރު ދައުރަކަށް ހޮވައިދޭނަން: ގާސިމް
މެމްބަރުން ނިސްބަތްވާ ދާއިރާއިން ކުރިމަތިލެއްވުމަށް ޓިކެޓް ވެސް ދޭނެ
ޖުމްހޫރީ ޕާޓީގެ ލީޑަރ ގާސިމް އިބްރާހިމް
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ ވޯޓްގައި މަސީހާ ދެކޮޅަށް ވޯޓްދެއްވާ މެމްބަރުންނަން ހަތަރު ސިޔާސީ ޕާޓީގެ ތާއިދާއެކު އިތުރު ދައުރަކަށް ހޮވައިދެއްވާނެ ކަމަށް ޖުމްހޫރީ ޕާޓީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.
އާދީއްތަ ދުވަހުގެ ރޭ އިދިކޮޅު ފަރާތަށް ގުޅިގެން ކުނޫޒުގައި ބޭއްވި ޖަލްސާގައި ވާހަކަ ދައްކަވަމަން ގާސިމް ވިދާޅުވީ މަސީހާ ދެކޮޅަށް ވޯޓް ދެއްވާ މެމްބަރުން އިތުރު ދައުރަކަށް ހޮއްވައިދެއްވުމަށް ގުޅިފައިވާ ހަތަރު ޕާޓީން އެކުގައި މަސައްކަތް ކުރާނެ ކަމަށެވެ. އަދި އެ މެމްބަރުން ނިސްބަތްވާ ދާއިރާއިން ކުރިމަތިލެއްވުމަށް ޓިކެޓް ވެސް ދޭނެ ކަމަށް އެމަނިކުފާން ވިދާޅުވިއެވެ.
" މި ހަތަރު ޕާޓީން މާދަމާ ޓިކެޓް ދީގެން ، އެ ވޯޓްގައި އަޅުގަނޑުމެންނަން ތާއިދުކޮށްގެން ވޯޓް ދެއްވާ ހުރިހާ ބޭފުޅުން، އަބްދުﷲ މަސީހު ބޭރުކުރުމަށް ފެއްސަން, ގްރީން އަށް އޮއްބަވާ ހުރިހާ ބޭފުޅުންނަކީ، މާތް ﷲ އިރާދަކުރެއްވިއްޔާ އެބޭފުޅަކު ހިމެނިވަޑައިގަންނަވާ ޕާޓީއަކުން އަޅުގަނޑުމެން ހަތަރު ލީޑަރުންވެގެން ޓިކެޓް ދޭނަން، އެ ދާއިރާއަކަށް ނުކުމެވަޑައިގަންނަވަން، އިތުރަށް އަޅުގަނޑުމެން އެހީތެރިވެދޭނަން، ހުރިހާ ގޮތަކުން" ގާސިމް ވިދާޅުވިއެވެ.
އެމްޑީޕީ، ޕީޕީއެމް، ޖުމްހޫރީ ޕާޓީ، އަދި އަދާލަތު ޕާޓީ އެކުގައި މެމްބަރަކު ހޮވަން މަސައްކަތް ކޮށްފިނަމަ އިތުރު މެމްބަރަކު ނޮހުވޭނެ ކަމަށް ވެސް ގާސިމް ވިދާޅުވިއެވެ. ހަތަރު ޕާޓީ އެކުގައި މަސައްކަތް ކުރުމަށް އެއްބަސްވުމުގައި ސޮއި ކުރެއްވުމުން ޕީޕީއެމަށް އެޕާޓީގެ މަޖިލީސް މެމްބަރުންގެ މުހިންމުކަން އިޙްސާސްކުރެވިއްޖެ ކަމަށާއި، މީގެ ކުރިން އެޕާޓީގެ މަޖިލީޖހުގެ މެމްބަރުން ނަކީ ސަރުކާރުން ބާކީކޮށްލާފައިވާ މެމްބަރުން ތަކަށެއް ގާސިމް ވިދާޅުވިއެވެ.
އެގޮތުން ޕީޕީއެމްގެ މެމްބަރުން މީގެ ކުރިން ސަރުކާރުގެ ވަޒީރުންނަން އެކި އެކި ކަންކަމުގައި ގުޅާއިރު އެބޭފުޅުން ފޯނުވެސް ނުނަންގަވާ ކަމަށެވެ. އެހެންނަމަވެސް މަސީހުގެ މައްސަލަ އެޖެންޑާ ކުރުމާއި އެކު ޕީޕީއެމްގެ މަޖިލީހުގެ ސަރުކާރުގެ ވެރިންނަން ގޮވާލުމާއި އެކު ފޯން ނަންގަވާކަމަށް ގާސިމް ވިދާޅުވިއެވެ.
