އެމްޑީޕީގެ ކެމްޕޭން ލޯންޗުކުރުން 21 ގައި
11 ފެބުރުއަރީ 2020 | އަންގާރަ 18:22ޯޕޯސްޓަރު ހަރުކުރުން އަންނަ ހޮނިހިރު ދުވަހު ބޭއްވުމަށް ވަނީ ހަމަޖައްސާފައި
ކެމްޕޭން މެނޭޖަރ އަހުމަދު ޝާހިދު
ކުރިއަށް އޮތް ލޯކަލް ކައުންސިލް އިންތިޚާބަށް މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ފަރާތުން ވާދަކުރާ ކެނޑިޑޭޓުންގެ ކެމްޕޭން ލޯންޗުކުރުން މިމަހުގެ 21 ގައި ބޭއްވުމަށް ހަމަޖައްސައިފިއެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި އެމްޑީޕީ ޤައުމީ މަޖިލީހުގެ 168 އަށް ވަނަ ބައްދަލުވުމުގައި ކެމްޕޭން މެނޭޖަރ އަޙްމަދު ޝާހިދު (ސާބެ) ވިދާޅުވީ ކެމްޕޭން ލޯންޗު ކުރުމުގެ ޖަލްސާ ބޭއްވުމަށް ރާވާފައިވަނީ ހުރިހާ ރަށެއް އަދި ހުރިހާ ސިޓީ އެއްގައި އެއްވަގުތެއްގައި ކަމަށެވެ.
މި ޖަލްސާ ކުރިއަށް ދާއިރު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި ޕާޓީގެ ރައީސް ރައީސް މުޙައްމަދު ނަޝީދުގެ ވާހަކަފުޅު ވަގުތުން ދެއްކޭނެގޮތް ހަމަޖެހިގެންދާނެ ކަމަށެވެ.
އެއަށްފަހު އެ ޖަލްސާތަކުގައި ވާހަކަ ދައްކަވާނީ އެރަށެއްގެ ކައުންސިލަރުންކަމަށް ސާބެ ވިދާޅުވިއެވެ.
މީގެ އިތުރުން އަންނަ ހޮނިހިރު ދުވަހު ހެނދުނު 9:00 ގައި މުޅިރާއްޖޭގެ ހުރިހާ ރަށެއްގައި ޕޯސްޓަރު ހަރުކުރުމުގެ ޙަރަކާތެއް ކުރިއަށްގެންދިއުމަށް ވަނީ ހަމަޖެހިފައެވެ.
ޕޯސްޓަރުގެ އިތުރުން ބެނަރ އާއި، ލީފްލެޓާއި، ބުކްލެޓް ތައްޔަރުކުރުމަށް ހަމަޖެހިފައިވާ ކަމަށް ސާބެ ވިދާޅުވިއެވެ. މީގެ އިތުރުން ކޮންމެ ރަށަކަށް ވަކިން ޚާއްޞަކޮށް މެނިފެސްޓޯއެއް ތައްޔާރު ކުރުމަށް ހަމަޖެހިފައިވާ ކަމަށާއި އެ މެނިފެސްޓޯގައި އެ ރަށެއްގެ މަޢުލޫމާތުތާއި އެރަށެއްގެ ހިންގާ ޕްރޮޖެކްޓްތަކާއި، ޕީއެސްއައިޕީ ޕްރޮޖެކްޓުތަކުގެ އިތުރަށް ކުރިން ބޭޢްވި ވާރކްޝޮޕްތަކުގައި ފޯމިއުލޭޓް ކުރި ޕްރޮޖެކްޓްތައް އޭގައި އެކުލަވާލެވިފައިވާނެކަމަށް ސާބެ ވިދާޅުވިއެވެ.
