ސިވިލް ސަރވިސް ކޮމިޝަން (ސީއެސްސީ)ގެ މައްސަލަތައް ބޮޑުވެ، އެންމެ ފަހުން އެ ކޮމިޝަނުގެ ހަތަރު މެންބަރުން މަޤާމުން ވަކިކުރުމަށް ރައްޔިތުންގެ މަޖިލީހުގެ ރައީސަށް ހުށަހެޅުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފިއެވެ.

ކޮމިޓީން މަޤާމުން ދުރުކުރުމަށް ނިންމާފައިވަނީ ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމާއި، ކޮމިޝަންގެ ނައިބު ރައީސް ޝަހީދު މުހައްމަދާއި، މެންބަރު އިބްރާހިމް ޝަހީގުގެ އިތުރުން އަލްއުސްތާޛް ޒަކަރިއްޔާ ޙުސައިނެވެ.

ހޯމަ ދުވަހު ބޭއްވުނު ކޮމިޓީ ބައްދަލުވުމުގައި ސަރުކާރުގެ ވުޒާރާތަކުގެ މަސްއޫލިއްޔަތުތައް އަދާ ކުރުމުގައި ސިވިލް ސަރވިސް ކޮމިޝަން (ސީއެސްސީ) ގެ އެއްބާރުލުން ލިބެމުންދާ މިންވަރާއި ގުޅޭ ގޮތުން ވަޒީރުންނާއިއެކު މަޝްވަރާ ކުރައްވާފައިވެއެވެ. އެގޮތުން، މިނިސްޓަރުންނާއެކު ބޭއްވުނު ބައްދަލުވުމުގައި ދެކެވުނު ވާހަކަތަކުގެ މައްޗަށް ބިނާކޮށް، މިނިސްޓްރީތަކަށް މިހާރުގެ ސިވިލް ސަރވިސް ކޮމިޝަނުގެ ފަރާތުން އެކަށީގެންވާ އެއްބާރުލުން ލިބެމުން ނުދާކަން ފާހަގަކުރައްވާފައިވާތީ، ސިވިލް ސަރވިސް ކޮމިޝަނުގެ ހަތަރު މެންބަރުން ވަކިކުރުމުގެ މައްސަލަ ވީހާވެސް އަވަހަކަށް މަޖިލީހުގެ ތަޅުމަށް ފޮނުއްވުމަށް ކޮމިޓީން ނިންމިއެވެ.

މިގޮތަށް ހުށަހެޅުއްވީ ތިނަދޫ ދެކުނު ދާއިރާގެ މެންބަރު ޢަބްދުﷲ ސަނީފެވެ. އަދި މި ހުށަހެޅުމަށް ތާއީދު ކުރައްވާފައިވަނީ ބިލެތްދޫ ދާއިރާގެ މެންބަރު އަޙްމަދު ޙަލީމެވެ. މި ހުށަހެޅުއްވުމަށް ވޯޓަށް އެއްސެވުމުން ވޯޓުގައި ބައިވެރިވެޑައިގެންނެވި 6 މެންބަރުންގެ އަޣްލަބިއްޔަތުން މި ހުށަހެޅުން ވަނީ ފާސްކޮށްފައެވެ. ހަތަރު މެންބަރުން މަޤާމުން ވަކިވާނީ، ކޮމިޓީގެ ނިންމުން މަޖިލީހުގެ ތަޅުމަށް ފޮނުވައި މެންބަރުންގެ ވޯޓުންނެވެ.

ސީއެސްސީގެ މަސައްކަތްތަކާއި ގުޅިގެން ވަޒީރުންނާއެކު މަޝްވަރާ ކުރުމަށް ކޮމިޓީން ބައްދަލުވުމެއް ބާއްވާފައިރު އެ ކޮމިޓީގެ އެއްބައި ކުރިއަށް ގެންގޮސްފައިވަނީ ސިއްރުންނެވެ. މި ބައްދަލުވުމުގައި ވަޒީރުން ވަނީ ސިވިލް ސަރވިސްގެ މަސައްކަތްތައް ހުންނަ ގޮތުން ދިމާވާ ގޮންޖެހުންތައް ކޮމިޓީއާއި ހިއްސާކުރައްވާފައެވެ. އެގޮތުން ސިވިލް ސަރވިސްގެ މަސައްކަތް ލަސްކަމަށާއި އެކަމުގެ ސަބަބުން އެ ވުޒާރާތަކުގެ މަސައްކަތަށްވެސް ބުރުއަރާކަން ވަނީ ފާހަގަކުރައްވާފައެވެ. އަދި އެކޮމިޝަނުގެ ޤަވާއިދުތަކުގެ ސަބަބުން ވެސް އެ ވުޒާރާތަކުގެ މަސައްކަތްތައް ލަސްވެ، އެތައް ސިވިލް ސަރވެންޓުންގެ ޙައްޤުތައް ގެއްލޭ ކަން ފާހަގަކުރައްވާ ވަޒީރުން ވަނީ ކަންބޮޑުވުންފާޅުކުރައްވާފައެވެ.

ކޮމިޓީން މިގޮތަށް ނިންމާފައިވާއިރު މަޤާމުން ވަކި ކުރުމަށް ނިންމި ބޭފުޅުންނަށް ކުރެވިފައިވާ ތުހުމަތުތަކަށް ޖަވާބުދާރީވުމުގެ ފުރުޞަތު ދީފައިވެއެވެ. ސިވިލް ސަރވިސް ކޮމިޝަނުގައި ތިއްބަވަނީ ޖުމުލަ 5 މެންބަރުންނެވެ. 5 ވަނަ މެންބަރަކީ ފާތިމަތު އާމިރާއެވެ.