އާންމު ފަރުދުންގެ ގޭގޭގައި ސޯލާ ޕެނެލް ހަރުކުރުމުގެ ފުރުސަތު ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ހުޅުވާލަން ނިންމައިފި އެވެ.
ހޯމަ ދުވަހު ''ސްޓެލްކޯ ގްރީންލައިފް އިނިޝިއޭޓިވް"ގެ ދަށުން މުވައްޒަފުންނަށް ފަސޭހަ ކަމާއެކު، ސޯލާ ޕެނަލް ގަތުމުގެ ފުރުސަތު ހުޅުވާލުމަށް ބޭއްވި ރަސްމިއްޔާތުގައި މިކަން އިފްތިތާހުކޮށް ދެއްވީ އެކުންފުނީގެ މެނޭޖިން ޑިރެކްޓަރު ހަސަން މުގުނީއެވެ.
މިކަން އިފްތިތާހުކޮށްދެއްވުމަށްފަހު ނޫސްވެރިންނަށް މައުލޫމާތުދެއްވަމުން މުގުނީ ވިދާޅުވީ ތެލަށްކުރާ ހަރަދު ކުޑަކޮށް އިޔާދަކުރަނިވި ހަކަތައަށް ބަދަލުކުރުމަކީ މިސަރުކާރުގެ އެއް ސިޔާސަތު ކަމަށެވެ. އެގޮތުން ސޯލާ ޕެނެލް ފުރަތަމަ ވިއްކުމަށް ހަމަޖެހިފައިވަނީ ހަމައެކަނި އެކުންފުނީގެ މުވައްޒަފުންނަށް ކަމަށާއި، ނަމަވެސް މިމަހުގެ ފަހުކޮޅު ނުވަތަ އަންނަމަހު ކުރީކޮޅު އާންމުންނަށް ސޯލާ ޕެނަލް ގަތުމުގެ ފުރުސަތު ހުޅުވާލާނެ ކަމަށް މުގުނީ ވިދާޅުވިއެވެ.
އަތޮޅުތަކަށް މިޚިދުމަތް ފުޅާކުރާނެކަން ފާހަގަކުރައްވައި މުގުނީ ވިދާޅުވީ ފުރަތަމަ މިފުރުސަތު ހުޅުލަނީ މާލެސިޓީއަށް ކަމަށާއި، ނަމަވެސް ކައިރި މުސްތަގުބަލެއްގައި އަތޮޅުތަކަށް މިޙިދުމަތް ފުޅާކުރާނެ ކަމަށެވެ. އަދި ވިދާޅުވީ މާލެއާއި އެއް އަގެއްގައި އަތޮޅުތަކަށް މިޚިދުމަތް ލިބިގެންދާނެ ކަމަށެވެ.
މުގުނީ ވިދާޅުވީ ސޯލާ ޕެނަލް ހަރުކުރުމުގެ އެންމެހައި މަސައްކަތްތައް ކުރާނީ ސްޓެލްކޯއިން ކަމަށާއި، ވެރިފަރާތުން ދައްކަންޖެހޭނީ ފައިސާ ކަމަށެވެ. އަދި މުޅި ސޯލާ ޕެނެލްގެ އަގަކީ 30،000 ރުފިޔާ ކަމަށާއި އިންސްޓޯލްމަންޓް ސްކީމަކަށް ކުޑަ އަގެއްގައި ފައިސާ ދެއްކޭނެ ކަމަށް މުގުނީ ވިދާޅުވިއެވެ.
މިޕްނެލަތްތައް އަމިއްލަ ކުރެވޭނެ ޕެނަލްތައް. ފުރަތަމަ މިކުރަން ޖެހޭ ކަމަކީ 5000 ރުފިޔާ ޑައުން ޕޭމަންޓެއް މިދައްކާލަންޖެނީ. ދެން އޭގެފަހުން ކުރަންޖެހޭ ހުރިހާ ކަމެއް މިކުރަނީ ސްޓެލްކޯއިން. ގޮސްފަ އެބޭފުޅުން އެސެސްމެންޓެއް ހައްދަވާނެ. ޓަރގެޓަކީ ދޮޅުމަހެއްގެ ތެރޭގައި ކަސްޓަމަރަށް ޚިދުމަތް ދެވޭވަރުކުރެވުން.މެނޭޖިން ޑިރެކްޓަރު މުގުނީ
ސޯލަރ ޕެނަލް ހަރުކުރުމުގެ ފުރުސަތު ފުރަތަމަ ފަހަރަށް ސްޓެލްކޯގެ މުއައްޒަފުންނަށް ހުޅުލި މަގުސަދު އިތުރަށް ތަފްސީލްކޮށްދެއްވަމުން މުގުނީ ވިދާޅުވީ ރައްޔިތުންނަށް ހިދުމަތްދޭނީ ރައްޔިތުން ކަމަށާއި، މުއައްޒަފުން މިކަމަށް ހޭލުންތެރިވެ، މިކަމުގެ ސަބަބުން ލިބޭ ފައިދާ މުއައްޒަފުންނަށް ލިބެންޖެހޭ ކަމަށެވެ.
މީގެ އިތުރުން މުގުނީ ވިދާޅުވީ ކުއްޔަށް ދިރިއުޅޭ ފަރާތްތަކަށް ވެސް މިސޯލާ ޕެނަލް ހަރުކުރެވޭނެ ކަމަށާއި ނަމަވެސް އެ ގޭގެ ވެރިފަރާތުގެ ހުއްދަ ލިޔުމުން ހުށަހަޅަންޖެހޭ ކަމަށެވެ.
މުގުނީ ވިދާޅުވީ 25 އަހަރާއި 30 އަހަރާ ދެމެދު ޕެނަލްތައް އެއްވެސް މައްސަލައެއް ނުޖެހި ބޭނުންކުރެވޭނެ ކަމަށާއި، މިކަމުގެ ސަބަބުން ކަރަންޓު ބިލަށް ބޮޑު ލުއި ކަމެއް އަންނާނެ ކަމަށެވެ.
