• އިސްތިއުފާ ދެއްވުމަކީ އަމިއްލަ ނިންމެވުމެއް ކަމަށް ދެކެވަޑައިގަންނަވާކަމަށް ވިދާޅުވި
ހެންވޭރު ދެކުނު ދާއިރާގެ މެންބަރ ޙުސައިން ޝަހީމް
ކުރީގެ ޖެންޑަރ މިނިސްޓަރ ޝިދާތާ ޝަރީފާއި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެއްވެސް ބޭފުޅާކާއި ދެމެދު ޒާތީ އެއްވެސް ކަމެއް ނެތްކަމަށް ހެންވޭރު ދެކުނު ދާއިރާގެ މެންބަރ ޙުސައިން ޝަހީމް (އަނދުން ހުސައިން) ވިދާޅުވެއްޖެ އެވެ.
ރާއްޖެ ޓީވީގެ " ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން ހުސައިން ވިދާޅުވީ ޝިދާތާ އާއި އެކު ސިޔާސީ މަސައްކަތް ކުރެއްވީ ވަރަށް ގާތްކޮށް ކަމަށާއި އޭނާ އިސްތިއުފާ ދެއްވުމަކީ އަމިއްލަ ނިންމެވުމެއް ކަމަށް ދެކެވަޑައިގަންނަވާ ކަމަށެވެ.
ހުސައިން ވިދާޅުވީ ރައީސުލް ޖުމްހޫރިއްޔާ އިބްރާހިމް މުހައްމަދު ސާލިޙު ލިބިވަޑައިގެންފައިވާ ބާރުގެ ދަށުން ބާރު ސްޕީޑްގައި ސަރުކާރު ހިންގެވުމަށް ގެންނަންޖެހޭ ބަދަލުތައް ގެންނަވާނެ ކަމަށެވެ.
އަދި ރައީސްގެ އެ ނިންމެވުންތަކަށް ރައްޔިތުންގެ މަޖިލީހުން ތާއީދު ކުރައްވާނެ ކަމަށް ހުސައިން ވިދާޅުވިއެވެ.
އިތުރަށް ހުސައިން ވިދާޅުވީ އެމްޑީޕީ އަކީ އޯގާތެރިކަމާއި ހިތްތިރި ކަމާއެކު އެންމެންނާއި ވެސް މުޢާމަލާތްކުރާ ޕާޓީއެއް ކަމަށެވެ.
އެމްޑީޕީއަކީ ވަރަށް ހޭލުންތެރި ފުލް ޑިމޮކްރެޓިކް ޕާޓީއެއް ކަމަށާއި އެމްޑީޕީގެ އެއްވެސް އިންތިޚާބީ މަޤާމެއްގައި ޒީރޯ ޕްރެޝަރ ގައި ހުންނަ އެއްވެސް ބޭފުޅަކު ނުހުންނަވާނެ ކަމަށެވެ.
ޕާޓީ އަށާއި، ދިވެހިރާއްޖެ އަށާއި، ދިވެހި ރައްޔިތުންނަށް ތެދުވެރިކަމާއި އަމާނާތްތެރިކަމާއި އެކުގައި މަސައްކަތް ކުރުމުން އެއްވެސް މަޤާމެއްގައި ހުންނަ ބޭފުޅަކަށް މައްސަލައެއް ދިމާނުވާނެ ކަމަށް ހުސައިން ވިދާޅުވިއެވެ.
