ކަރަންޓީނު ކުރުމުގެ ބިރު އޮތުމުން އިގާލޯ އިންގްލެންޑްގައި މަޑުކޮށްފި

ޗައިނާގައި ހަލުވިކަމާއިއެކު ފެތުރެމުންދާ ކޮރޯނާ ވައިރަސްގެ ސަބަބުން އިންގްލޭންޑްއިން ބޭރަށް ގޮސްފިނަމަ ކަރަންޓީނު ކުރުމުގެ ބިރުއޮތުމުން އިނގިރޭސި ކްލަބް މެންޗެސްޓާ ސިޓީއާއި ދާދި ފަހުން ގުޅުނު އޮޑިއޯން އިގާލޯ އެ ގައުމުގައި މަޑު ކުރުމަށް ނިންމައިފިއެވެ.

ކުރިން ޗައިނާގެ ޝަންހާއީ ޝެންހުއާ އަށް ކުޅުނު އިގާލޯ ޔުނައިޓެޑަށް ބަދަލުވީ ޖަނަވަރީ 31 ވަނަ ދުވަހު އެވެ. އިގާލޯ އިންގްލޭންޑްގައި މަޑުކުރުމަށް ނިންމިއިރު ޗައިނާގައި ހަލުވިކަމާއިއެކު ފެތުރި މިހާރު ދުނިޔޭގެ އެކިހިސާބުތަކުން ވެސް ފެނިފައިވާ ކޮރޯނާ ވައިރަހުގެ މައްސަލައިގައި ޗައިނާގައި އުޅުނު މީހުން އެކި ގައުމުތަކަށް އެތެރެވުމުގައި އަންނަނީ ދަތިތަކެއް ކުރިމަތިވަމުންނެވެ.

ޖަނަވަރީ ޓްރާންސްފަރ މާކެޓްނިމި ކްލަބްތަކުން ބްރޭކްގައި އަންނަނީ އެކި ގައުމުތަކުގައި ޓްރޭނިންގ ކޭމްޕް ކުރަމުންނެވެ. އިނގިރޭސި ކްލަބް ޔުނައިޓެޑުން ސްޕެއިންގައި ޓްރެއިނިންގ ކޭމްޕް ކުރަމުން އަންނައިރު އިގާލޯ ވަނީ އިންގްލޭންޑްގައި މަޑުކޮށްފައެވެ. މީޑިއާ ރިޕޯޓްތައް ބުނާގޮތުން އިގާލޯ އިންގްލޭންޑްގައި މަޑުކުރީ ސްޕެއިންއަށް ގޮސް އަލުން އިންގްލޭންޑްއަށް ވަނުމުގައި ދަތިތަކެއް ދިމާވެދާނެތީ އެވެ.

ޔުނައިޓެޑުން ނެރުނު ބަޔާނުގައި ބުނީ ފާއިތުވެދިޔަ 14 ދުވަހުގެ ތެރޭގައި ޗައިނާގައި އުޅެފައިވާ މީހުންނަށް އިންގްލޭންޑްއަށް ވަނުމުގައި ދަތިތަކެއް ހުރިކަމަށާއި އެސަބަބާއި ގުޅިގެން ޔުނައިޓެޑާއި ދާދިފަހުން ގުޅުނު އިގާލޯ ސްޕެއިންއަށް އެޓީމުން ކުރާ ޓްރެއިނިންގ ކޭމްޕްގައި ބައިވެރިނުވާނެ ކަމަށެވެ. ޔުނައިޓެޑުން އިތުރަށް ބުނީ އިގާލޯ ހުރީ ޓްރެއިނިންގ ކޭމްޕްގައި ބައިވެރިވުމަށް ތައްޔާރަށް ކަމަށާއި ނަމަވެސް ޓްރެއިނިންގ ކޭމްޕްގައި ބައިވެރިވެ އިލުން އިންގްލޭންޑްއަށް ވަނުމުގައި ދަތިތަކެއް ދިމާވެދާނެތީ އެކަން އެހެން ނުކުރުމަށް ކްލަބުން ނިންމިކަމަށެވެ.

އިގާލޯ ޔުނައިޓެޑާއި ގުޅުނީ ލޯނު އެއްބަސްވުމެއްގެ ދަށުންނެވެ. ރިޕޯޓްތައް ބުނާގޮތުން އިގާލޯ އެޓީމަށް ގެނައީ އެޓީމުގެ ފޯވާޑް ލައިންއަށް ދިމާވެފައިވާ މައްސަލަ ހައްލަކަށް ގެނައުމުގެ ގޮތުންނެވެ.