ފޭސްބުކްއިން ޕްރިމިއާ ލީގު ބްރޯޑްކާސްޓް ކުރުމުގެ ރައިޓްސް ހޯދުމަށް ބިޑް ކުރަނީ!

މަޝްހޫރު ސޯޝަލް މީޑިއާ ވެބްސައިޓެއް ކަމުގައިވާ ފޭސްބުކްއިން އިނގިރޭސި ޕްރިމިއާ ލީގު ބްރޯޑްކާސްޓް ކުރުމުގެ ރައިޓްސް ހޯދުމަށް ބިޑް ކުރުމަށް ބޭނުންވާ ކަމަށް ރިޕޯޓުތައް ބުނެފިއެވެ.

ދުނިޔޭގެ އެންމެ ބޮޑު ސޯޝަލް މީޑިއާ ނެޓްވޯކް ކަމަށްވާ ފޭސްބުކްއިން ޕްރިމިއާ ލީގު ބްރޯޑްކާސްޓް ކުރުމުގެ ރައިޓްސް ހޯދުމަށް މަސައްކަތް ކުރާކަމަށް ބޭރުގެ ގިނަ މީޑިއާ ތަކުން ރިޕޯޓު ކުރެއެވެ. އެގޮތުން ފޭސްބުކްގެ ކުޅިވަރު ޑިޕާޓްމެންޓްގެ ހެޑް، ޑޭން ރީޑް ބުނެފައި ވަނީ ޕްރިމިއާ ލީގަކީ ފޭސްބުކްގެ ވަރަށް މުހިންމު އެކުވެރިޔެއް ކަމަށާއި އަދި އެ ލީގާއި ވަރަށް ގާތުން އަބަދުވެސް މަސައްކަތް ކުރަމުންދާ ކަމަށެވެ. އަދި މިކަމާ ބެހޭގޮތުން މިވަގުތު ވާހަކަ ދެއްކެން ނެތް ކަމަށާއި ފޭސްބުކްއިން ބިޑް ޕްލޭންތަށް ތައްޔާރު ކުރަމުންދާ ކަން ޑޭން ވަނީ ކަށަވަރު ކޮށްދީފައެވެ.

ޕްރިމިއާ ލީގުގެ ޓީމުތަކުން ވަނީ މި ހަފްތާގައި ބްރޯޑްކާސްޓް ކޮށްގެން ލިބޭ ފައިސާ ބަހާނެ ގޮތަކާ މެދު މަޝްވަރާ ކުރުމަށް ބައްދަލު ކޮށްފައެވެ. އެގޮތުން އިނގިރޭސިވިލާތް ނޫން އެހެން ގައުމުތަކުގައި ބްރޯޑްކާސްޓް ކޮށްގެން ޓީމުތަކަށް ލިބޭ އާމްދަނީ ވަރަށް ބޮޑުތަނުން އިތުރު ކުރުމަށް ނިންމާފައިވާ ކަމަށް ރިޕޯޓުތަށް ބުނެފައިވެއެވެ. އެހެނަސް އަދި މިކަމާ ގުޅޭގޮތުން ޓީމުތަކުން ވަކިގޮތެއް ނިންމާފައެއް ނުވެއެވެ.

ހަމައެހެންމެ މި ފައިސާ ބެހުމަށް ހަމަޖެހިފައިވަނީ ކޮންމެ ޕްރިމިއާ ލީގު ސީޒަނެއް ނިމޭއިރު ކްލަބުތަކުން ހޯދާ ވަނަތަކަށް ބެލުމަށް ފަހު ކަމަށް މި ބައްދަލުވުމުގައި ވަނީ ނިންމާފައެވެ. އެހެންކަމުން ބްރޯޑްކާސްޓް ކޮށްގެން ލިބޭ އާމްދަނީގެ އެންމެ ބޮޑު ހިއްސާއެއް ލިބިގެން ދާނީ ކޮންމެ ސީޒަނެއްގައި ވެސް ޗެމްޕިއަންކަން ހޯދާ ޓީމަށެވެ. ހަމައެގޮތަށް އެންމެ ދަށް ހިއްސާއެއް ލިބޭނީ ތާވަލުގެ ފުލަށް ދާ ޓީމަށެވެ.

މިގޮތަށް މިކަން ނިމިގެން ދިޔުމާ ވިދިގެން އިނގިރޭސިވިލާތުގެ އެންމެ ބޮޑެތި ޓީމުތައް ކަމަށްވާ އާސެނަލް، ޗެލްސީ، ލިވަޕޫލް، ޓޮޓެންހަމް، މެންޗެސްޓާ ޔުނައިޓެޑް އަދި ސިޓީއަށް ލިބޭ އާމްދަނީ ވަރަށް ބޮޑަށް އިތުރުވެގެން ދާނެއެވެ.

"އޮމްނިސްޕޯޓް" އާ ވާހަކަ ދައްކަމުން ޕްރިމިއާ ލީގަށް ނިސްބަތްވާ ކްލަބެއްގެ ސްޕޯކްސްޕާސަންއެއް ބުނެފައިވަނީ ޕްރިމިއާ ލީގުގެ ޓީމުތަކުން މިކަން މަޝްވަރާކުރުމަށް ބައްދަލުކޮށްފައިވާ ކަމަށާއި ބޮޑަށް ބެލެވޭ ގޮތުގައި ބްރޯޑްކާސްޓް ކުރުމުގެ މައްސަލަ ހުށަހެޅިފައިވާ ގޮތަށް ފާސް ވާނޭ ކަމަށެވެ. އެހެނަސް މި ބައްދަލުވުމުގައި ވަކި ގޮތެއް ނުނިންމާ ކަމަށާއި މި މައްސަލައިގައި ގޮތެއް ނިންމުމަށް ވަރަށް އަވަހަށް ބައްދަލުވުމެއް ބޭއްވުމަށް ނިންމާފައިވާ ކަމަށް އޭނާ ބުނެފައިވެއެވެ.

ޕްރިމިއާ ލީގު މިވަގުތު ބްރޯޑްކާސްޓް ކުރުމުގެ ރައިޓްސް ދީފައިވަނީ ސްކައި ސްޕޯޓްސްއާ ބީޓީ ސްޕޯޓްސް އަށެވެ. މި ދެ ޓީވީ ނެޓްވޯކުން މުޅި ޖުމްލަ ޕްރިމިއާ ލީގަށް 5.136 ބިލިއަން ޕައުންޑް ދައްކައެވެ. ސްކައި ސްޕޯޓްސްއިން 4.2 ބިލިއަން ޕައުންޑް ދައްކާއިރު ބީޓީ ސްޕޯޓްސް އިން 960 މިލިއަން ޕައުންޑް ދައްކައެވެ.