ޤައުމީ ބަހަށް އިސްކަން ދިނުމުގެ ޤާނޫނަށް އިޞްލާޙު ހުށައެޅުމުގެ ފުރުޞަތު ހުޅުވާލައިފި

ދިވެހިރާއްޖޭގެ ޤައުމީ ބަހަށް އިސްކަން ދިނުމުގެ ޤާނޫނަށް އިޞްލާޙު ހުށައެޅުމުގެ ފުރުޞަތު ހުޅުވާލައިފިއެވެ.

ދިވެހިބަހުގެ އެކެޑަމީން ބުނީ ދިވެހިރާއްޖޭގެ ޤައުމީ ބަހަށް އިސްކަން ދިނުމުގެ ޤާނޫނަށް އިޞްލާޙު ހުށައެޅުމުގެ ފުރުޞަތު ޢާއްމުކޮށް މިހާރު ހުޅުވާލާފައިވާ ކަމަށެވެ. މި ޤާނޫނުގެ ވަކިވަކި މާއްދާތަކަށް ގެންނަން ފެންނަ އިޞްލާޙާއި މުޅި ޤާނޫނަށް ގެންނަން ފެންނަ އިޞްލާޙުގެ ޚިޔާލު ހުށަހެޅޭނަކަމަށް އެކަޑަމީން ބުނެއެވެ.

ދިވެހިބަހުގެ އެކަޑަމީން ބުނީ ގާނޫނަށް އިސްލާހު ހުށައެޅުމުގެ ސުންގަޑިއަކީ މި މަހުގެ 12 ވަނަ ދުވަސް ކަމަށެވެ. އަދި އިޞްލާޙު ހުށައަޅަން ޝައުގުވެރިވާ ފަރާތްތަކުން ސުންގަޑި ހަމަވުމުގެ ކުރިން އެކެޑަމީގެ އީ.މެއިލްinfo@dhivehiacademy.edu.mvއަށް ލިޔުމުން ހުށައެޅުން ވަނީ އެދިފައެވެ.

ދިވެހިރާއްޖޭގެ ޤައުމީ ބަހަށް އިސްކަން ދިނުމުގެ ޤާނޫނުގެ މައިގަނޑު މަޤްޞަދަކީ، ދިވެހި ޤައުމިއްޔަތުގެ އެންމެ މުހިންމު އެއް އަސާސްކަމުގައިވާ، އަދި އެންމެ އަގުބޮޑު އެއް ތަރިކަކަމުގައިވާ ދިވެހިބަސް ހީނަރުވިޔަނުދީ ޙިމާޔަތްކުރުމާއެކު، ބަސް ތަރައްޤީކޮށް ކުރިއަރުވައި، އަންނަންއޮތް ޖީލުތަކަށް އަމާނާތްތެރިކަމާއެކު ވާޞިލުކޮށްދިނުމެވެ.