އެންމެ އިސްކަމެއް ދޭނީ ފަތުރުވެރިންގެ ރައްކާތެރިކަން ކަށަވަރުކުރުމަށް ކަމަށް ޓުއަރިޒަމް މިނިސްޓްރީން ބުނެފިއެވެ.
އެ މިނިސްޓްރީން ހުކުރު ދުވަހު ނެރުނު ބަޔާނުގައި ވަނީ ކ. މާފުށީގައި ނިވާކަން ކުޑަގޮތަށް ހުރި އަންހެން ފަތުރުވެރިއަކު ހައްޔަރުކުރުމުގައި ފުލުހުން ޢަމަލުކޮށްފައިވާގޮތް ކުށްވެރިކޮށްފައިވެއެވެ.
މިނިސްޓްރީގެ ބަޔާނުގައި ވަނީ ކޮމިޝަނަރ އޮފް ޕޮލިސް މުޙައްމަދު ހަމީދު ވެސް މިކަމާއި ގުޅިގެން މަޢާފަށް އެދިފައިވާއިރު، އެ ފަތުރުވެރިޔާ ހައްޔަރުކުރުމުގައި ފުލުހުން ޢަމަލުކޮށްފައިވާ ގޮތް ބެލުމަށް ތަޙުޤީޤެއް މިހާރު ފަށާފައިވާ ކަމަށެވެ. އަދި އެކަމުންވެސް އެނގިގެންދަނީ ރާއްޖޭގެ ތަންފީޒީ އިދާރާތަކުގެ "ޕްރޮފެޝަނަލިޒަމް" ދެމެހެއްޓުމަށް ދިވެހި ސަރުކާރުން ކުރަމުންދާ މަސައްކަތް ކަމަށެވެ. އަދި މިނިސްޓްރީން ބުނީ ރާއްޖޭގެ ޤާނޫނާއި ޤަވާއިދަށް ހުރުމަތްތެރިކޮށް ހިތުމަށް ރާއްޖެ ޒިޔާރާތްކުރާ ހުރިހާ ފަތުރުވެރިންނަށް އިލްތިމާސްކުރާ ކަމަށެވެ.
މީގެއިތުރުން މިމަހުގެ 04 ވަނަ ދުވަހުގެ ރޭ ހުޅުމާލޭގައި ތިން ފަތުރުވެރިއަކަށް ދިން ޙަމަލާވެސް މިނިސްޓްރީންވަނީ ކުށްވެރިކޮށްފައެވެ. އެ ތިން ފަތުރުވެރިން ގާތަށް ޓުއަރިޒަމް މިނިސްޓަރ ޢަލީ ވަހީދު ޒިޔާރާތް ކުރައްވާ ޙާލު ބައްލަވާފައިވާ ކަމަށް ވެސް ބަޔާނުގައިވެއެވެ. މިމައްސަލާގައި މިހާތަނަށް 06 މީހަކު ހައްޔަރުކޮށްފައިވާއިރު، މިނިސްޓްރީން އެންމެ އިސްކަމެއް ދޭނީ ރާއްޖެ ޒިޔާރަތް ކުރާ ފަތުރުވެރިންގެ ރައްކާތެރިކަން ކަށަވަރުކުރުމަށްކަމަށް ބަޔާނުގައިވެއެވެ.
