ތިން މިލިއަނަށްވުރެ ގިނަ ރުފިޔާއާއިއެކު 9 ކިލޯއަށްވުރެ ގިނަ މަސްތުވާތަކެތި އަތުލައިގެންފި
7 ފެބުރުއަރީ 2020 | ހުކުރު 20:17މި އޮޕަރޭޝަންގައި އަށް މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައި
ފުލުހުން ހިންގި އޮޕަރޭޝަނެއްގައި ހޯދާފައިވާ މަސްތުވާތަކެތި
ފުލުހުން ހިންގި ޚާއްސަ އޮޕްރޭޝަނެއްގައި ތިން މިލިއަނަށްވުރެ ގިނަ ރުފިޔާ އާއި ނުވަ ކިލޯގެ މަސްތުވާތަކެއްޗާއިއެކު އަށް މީހަކު ފުލުހުންގެ ހައްޔަރުކޮށްފި އެވެ.
ފުލުހުން ބުނީ މިދިޔަ ޖެނުއަރީ މަހުގެ 31 ވަނަ ދުވަހު ފުލުހުންގެ ޑްރަގް އިންޓޭލިޖެންސަށް ލިބުނު މައުލޫމާތަކާއި ގުޅިގެން ކޯޓު އަމުރެއްގެ ދަށުން މާލޭގެ ފަސް ގެއެއް ބަލައި ފާސްކުރުމުން ގިނަ އަދަދެއްގެ މަސްތުވާތަކެއްޗާއި ގިނަ އަދަދެއްގެ ފައިސާ ހޯދިފައިވާ ކަމަށެވެ. އަދި މި ހިނގާ ފެބްރުއަރީ މަހުގެ ހަވަނަ ދުވަހު ޑްރަގް އިންޓެލިޖެންސަށް ލިބުނު މައުލޫމާތަކާއި ގުޅިގެން ކޯޓު އަމުރެއްގެ ދަށުން މާލޭގެ ހަތަރު ގެއަކާއި ސައިކަލެއް ބަލައި ފާސްކުރި ކުރުމުން ގިނަ އަދަދެއްގެ މަސްތުވާތަކެއްޗާއި ގިނަ އަދަދެއްގެ ފައިސާ ހޯދިފައިވާ ކަމަށެވެ.
މި ދެ އޮޕަރޭޝަންގައި އަށް ދިވެހި ފިރިހެނުން ފުލުހުންގެ ބެލުމުގެ ދަށަށް ގެންދެވިފައިވާ ކަމަށް ފުލުހުން ބުންޏެވެ. އަދި މި އޮޕެރޭޝަންގައި ނުވަ ކިލޯއަށްވުރެ ގިނަ މަސްތުވާތަކެތި ފެނިފައިވާ ކަމަށް ފުލުހުން ބުންޏެވެ.
ފުލުހުން ބުނީ މި އޮޕަރޭޝަނަކީ ފުޅާ ދާއިރާއެއްގައި ރާއްޖެއަށް މަސްތުވާތަކެތި އެތެރެކޮށް މަސްތުވާތަކެތީގެ ވިޔަފާރިކުރާ ކަމަށް ތުހުމަތު ކުރެވޭ ނެޓްވޯކެއް އަތުލައިގަތުމަށް ހިންގުނު ޚާއްސަ ދެ އޮޕަރޭޝަނެއް ކަމަށެވެ. އަދި މި މައްސަލަ ދަނީ ޑްރަގް އެންފޯސްމަންޓް ޑިޕާޓްމަންޓުން ތަހުގީގު ކުރަމުންނެވެ.
