ހުޅުމާލޭގައި ފަތުރުވެރިންތަކަކަށް ދިން ޙަމަލާއާ ގުޅިގެން ހަރުކަށި ފިކުރުގެ 6 މީހަކު ހައްޔަރުކޮށްފިއެވެ.

04 ފެބްރުއަރީވީ އަންގާރަ ދުވަހުގެ 19:00 އާއި 20:00އާ ދެމެދުގެ ވަގުތެއްގައި ހުޅުމާލޭގައި 3 ބިދޭސީއަކަށް ވަނީ ޙަމަލާދީފައެވެ. އެއީ ޗައިނާ ފަތުރުވެރިއަކާއި، ރާއްޖޭގައި މަސައްކަތް ކުރަމުންދާ ޗައިނާ މީހަކާއި، އަދި ރާއްޖޭގައި މަސައްކަތް ކުރަމުންދާ އޮސްޓްރޭލިއާ މީހަކަށެވެ.

މިމައްސަލައާ ގުޅިގެން ބުރާސްފަތި ދުވަހުގެ ރޭ އިސްކަންދަރު ކޮށީ ދޮރުމަތީގައި ބޭއްވި ނޫސްވެރިންގެ ބައްދަލުވުމުގައި ފުލުހުންގެ ސީރިއަސް އެންޑް އޮގަނައިޒް ކްރައިމް ޑިޕާޓްމަންޓްގެ ހެޑް، ސުޕްރިޓެންޑެންޓް އޮފް ޕޮލިސް ޙަސަން ޝިފާއު ވިދާޅުވެފައިވަނީ މައްސަލާގައި ޝާމިލުވާ އެންމެން ޤާނޫނުގެ ކުރިމައްޗަށް ގެންނާނެ ކަމަށެވެ. ނަމަވެސް ތަޙުޤީޤު ކުރަމުންދާ މައްސަލައަކަށްވާތީ އިތުރު ތަފުޞީލު ދިނުމަށް އުޒުވެރިވާ ކަމަށެވެ.

މީގެ އިތުރުން ޝިފާޢު ވިދާޅުވީ މިޙަމަލާގެ ޒިންމާ ނެގުމަށް ފަހު، ސޯޝަލް މީޑިއާގައި ދައުރުވަމުންދާ ވީޑިއޯގައި މޫނު ނިވާކޮށްގެން ތިބި ބަޔަކު، ތިމަންނާމެންމީ އިސްލާމިކް ސްޓޭޓްގެ ދިވެހިރާއްޖޭގެ ގޮފިކަމަށް ބުނެފައިވާ ވީޑިއޯގެ ޞައްޙަކަން ކަށަވަރުކުރުމަށް ތަޙުޤީޤުތައް ކުރަމުންދާ ކަމަށެވެ.

އެފަދަ ވީޑިއޯތައް ޝެއަރ ކުރުމަކީ ޤާނޫނީ ކުށެއް ކަމަށާއި، ނަމަވެސް ބައެއް ފަރާތްތަކުން ނޭގުމެއްގެ ތެރޭގައި ތިބެ މިފަދަ ވީޑިއޯތައް ޝެއަރ ކުރަމުންދާތީ އެކަމާ ނުހަނު ކަންބޮޑުވާ ކަމަށް ޝިފާއު ވިދާޅުވިއެވެ. މިފަދަ ކަންކަން ކުރުމަށް ޖާގަ ނުދޭނެ ކަމަށާއި، މިފަދަ ވީޑިއޯތައް ޝެއަރ ނުކުރުމަށް ޝިފާއު ވަނީ އިލްތިމާސްކުރައްވާފައެވެ.