ހުޅުމާލޭގައި ދިން ހަމަލާއާއި ގުޅިގެން ތިން މީހަކު ހައްޔަރުކޮށްފި
6 ފެބުރުއަރީ 2020 | ބުރާސްފަތި 02:54ހުޅުމާލޭގައި ފަތުރުވެރިންތަކަކަށް އަމާޒުކޮށް ހަމަލާ ދީފައިވަނީ އަންގާރަ ދުވަހުގެ ރޭ
ހަމަލާދިންކަމަށް ޝައްކުކުރެވޭ މީހަކު ފުލުހުން ހައްޔަރު ކުރަން ގެންދަނީ
ތިން ފަތުރުވެރިއަކަށް އަމާޒުކޮށް ދިން ހަމަލާއާއި ގުޅިގެން ތިން މީހަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.
އަންގާރަ ދުވަހުގެ ރޭގަނޑުގެ ވަގުތެއްގައި ސައިކަލުތަކެއްގައި އައި ބަޔަކު ވަނީ ތިން ފަތުރުވެރިއަކަށް ތޫނު ހަތިޔާރަކުން ހަމަލާދީފައެވެ. އޭގެ ތެރޭގައި ހިމެނެނީ ޗައިނާއަށް ނިސްބަތްވާ ދެ ފަތުރުވެރިއަކާއި އޮސްޓްރޭލިއާގެ ފަތުރުވެރިއެކެވެ. މި އެންމެންގެ ހާލުވެސް ރަނގަޅުކަމަށް ފުލުހުން ވަނީ މައުލޫމާތު ދީފައެވެ.
މި ހަމަލާއާއި ގުޅިގެން ފުލުހުން ނެރުނު ބަޔާނެއްގައި ބުނެފައިވަނީ، މިއީ ހަރުކަށި ފިކުރުގެ ބަޔަކު ދިން ހަމަލާއެއް ކަމަށް ޝައްކުކުރެވޭ ކަމަށް ބުނެފައެވެ. އަދި އިތުރަށް މައްސަލަ ތަހުގީގު ކުރަމުން އަންނަ ކަމަށްވެސް ފުލުހުން މައުލޫމާތު ދީފައިވެއެވެ.
އޭގެއިތުރުން، މޫނު ނިވާކޮށްގެން ތިބި ބަޔަކު މި ހަމަލާގެ ޒިންމާ ނަގާ ވީޑިއޯއެއްވެސް ސޯޝަލް މީޑިއާގައި އަންނަނީ ދައުރުވަމުންނެވެ. އެ ވީޑިއޯގައި އެމީހުން ވަނީ ފަތުރުވެރިންނަށް އަމާޒުކޮށް އިތުރު ހަމަލާތަކެއް ދޭނެ ކަމުގެ އިންޒާރުވެސް ދީފައެވެ.
