ގާސިމްގެ އަނބިކަނބަލުންނަށް ވީމާ ޓްރާންސްޕޯޓް މިނިސްޓަރުކަން ދޭނަމަ، ކިހިނެއް ރަނގަޅުވާނީ: ޖާބިރު
5 ފެބުރުއަރީ 2020 | ބުދަ 17:52ޓްރާންސަޕޯޓް މިނިސްޓަރު ވަނީ ފެއިލް ވެފައި: ޖާބިރު
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަދި ޑީއަރުޕީގެ ލީޑަރު އަބްދުﷲ ޖާބިރު
ޖުމްހޫރީ ޕާޓީ ލީޑަރު އަދި މަޝްހޫރު ވިޔަފާރިވެރިޔާ ގާސިމް އިބްރާހީމްގެ އަނބިކަނބަލުންނަށް ވީމައި ޓްރާންސްޕޯޓް މިނިސްޓަރުގެ ކަންކަން ރަނގަޅުވާނީ ކިހިނެއްތޯއޭ ވިދާޅުވެ، ޓްރާންސްޕޯޓް މިނިސްޓަރު އާއިޝަތު ނަހުލާއަށް، ރައްޔިތުންގެ މަޖިލީހުގެ ކަށިދޫ ދާއިރާގެ މެމްބަރު އަދި ޑީއާރުޕީގެ ލީޑަރު އަބްދުﷲ ޖާބިރު ވަރަށް ބޮޑަށް ފާޑުވިދާޅުވެއްޖެ އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި، ސަރުކާރުގެ ފަރާތުން، ކުޅުދުއްފުށި އުތުރު ދާއިރާގެ މެންބަރު ޔާސިރު ޢަބްދުއްލަޠީފް ހުށަހަޅުއްވާފައިވާ، އެއްގަމު ދަތުރުފަތުރުގެ ޤާނޫނަށް އިޞްލާޙު ގެނައުމުގެ ބިލަށް ބަހުސް ކުރައްވަމުން ޖާބިރު ވިދާޅުވީ، ޓްރާންސްޕޯޓް މިނިސްޓަރު ފެއިލްވެފައިވާ ކަމަށެވެ.
އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ އެބިލާ ގުޅޭގޮތުން ބަހުސްކުރައްވަމުން ޖާބިރު ވަނީ ވަކި ބޭފުޅެއްގެ އަނބިކަނބަލަކަށްވީމާ މިނިސްޓަރުކަން ދޭންވެއްޖެނަމަ، ރާއްޖޭގެ ކަންކަން ރަނގަޅަށް ދާނެ ކަމާމެދު ސުވާލު އުފައްދަވާފަ އެވެ.
ޖާބިރު ވިދާޅުވީ ގައުމުގެ ކަންކަން ރަނގަޅުކުރުމަށް ކުރަންޖެހޭ ކަންކަން ކުރުމުގައި ފަހަތައް ޖެހިވަޑައިނުގަންނަވާނެ ކަމަށެވެ. އަދި އަންހެން ކަނބަލަކަށް މިނިސްޓަރުކަން ދެއްވުމަކީ އޭނާ އެއްގޮތަކަށްވެސް ދެކޮޅު ހައްދާވާކަމެއް ނޫންކަމަށާއި، ނަމަވެސް ކޯލިޝަން ޕާޓީގެ ލީޑަރުގެ އަނބިކަނބަލުންނަށް ވީމާ، މިނިސްްޓަރުކަން ދެއްވީމަ ވާގޮތް މިދަނީ ފެންނަމުން ކަމަށް ޖާބިރު ވިދާޅުވި އެވެ.
ޖާބިރު ވިދާޅުވީ ރާއްޖޭގައި ކޮންމެހެންވެސް ޓްރާންސްޕޯޓް މިނިސްޓްރީއެއް ހުންނަންޖެހޭ ކަމަށާއި އަދި އެމިނިސްޓްރީ ހިންގޭވަރުގެ ގާބިލް ބޭފުޅަކަށް އެމިނިސްޓްރީ ހަވާލު ކުރެއްވުމަކީ ވެސް ވަރަށް ބޭނުންތެރިކަމެއް ކަމަށެވެ.
ވެހިކަލްތަކުގައި ސްޓީކާ ޖަހަމުންދާ މައްސަލަގައި ވާހަކަދައްކަވަމުން ޖާބިރު ވިދާޅުވީ، ޕާކްކުރާނެ ތަން ނުދައްކާ ރައްޔިތުން ޖުރިމަނާކޮށް، ފައިސާ ނަގަމުންދާއިރު، އާންމު ރައްޔިތުންގެ ހާލަތާމެދު ވިސްނާލުން ރަނގަޅު ކަމަށެވެ.
ޖާބިރު ވިދާޅުވީ މުއްސަނދީންގެ އަނބިންނާއި ދަރިންނަށް މޮޅުގޮތްވާއިރު، އާންމު ރައްޔިތު މީހާގެ ހާލަތާމެދު ވެސް ވިސްނާލަން ޖެހޭ ކަމަށެވެ. އަދި އަބަދު ކޮންމެ ކަމެއްކައި ޖުރިމަނާ ފައިސާ ދައްކަން ޖެހުމަކީ ރައްޔިތު މީހާއަށް ދެވޭ އިތުރު ނިކަމެއްތި ކަމެއް ކަމަށްވެސް ޖާބިރު ވިދާޅުވި އެވެ.
