މާޒިޔާ އާއި އަބަހާނީގެ ފުރަތަމަ ކުރިމަތިލުން އެއްވަރު

އޭއެފްސީ ކަޕްގެ ޕްރިލިމިނަރީ ބުރުގެ ފުރަތަމަ ލެގުގައި ބަންގްލަދޭޝްގެ އަބަހާނީ ލިމިޓެޑް ޑާކާއާއި ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރި މެޗު އެއްވަރުވެގެން ނިމިއްޖެ އެވެ.

ރަށުން ބޭރުގައި ބުދަ ދުވަހުގެ ހަވީރު ކުޅުނު މެޗު ނިމުނީ 2-2 އިން ދެޓީމު އެއްވަރުވެގެންނެވެ.

ޑާކާގެ ބަންގުބަންދު ނެޝަނަލް ސްޓޭޑިއަމްގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ މާޒިޔާއިންނެވެ. މެޗުގެ 42 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ފޯވާޑް ކޯނެލިއަސް ސްޓެވާޓް (ކޯނޭ) އެވެ. އެކަމަކު ފުރަތަމަ ހާފުގެ އިތުރު ވަގުތުގައި ޑިފެންޑަރު މެލިސަން އަލްވޭސްގެ ލަނޑުން އަބަހާނީން ވަނީ ނަތީޖާ އެއްވަރުކޮށްފައެވެ.

މެޗުގެ 65 ވަނަ މިނެޓުގައި ކޯނޭ ދެވަނަ ފަހަރަށް މާޒިޔާއަށް ލީޑު ނަގއިދިން ނަމަވެސް، އޭގެ 15 މިނެޓު ފަހުން ސަންޑޭ ޗިޒޯބާ ވަނީ އަނެއްކާވެސް އަބަހާނީއަށް ނަތީޖާ އެއްވަރުކޮށްފައެވެ.

މިއަހަރުގެ އޭއެފްސީ ކަޕްގެ ޕްރިލިމިނަރީ ބުރުގެ ފުރަތަމަ ލެގުން މާޒިޔާ އާއި އަބަހާނީ އެއްވަރުވިއިރު، އެޓީމުގެ ކޯޗު މަރުޖާން ސެކުލޮސްކީ މީގެ ކުރިން ވަނީ މާޒިޔާ ގޮވައިގެން 2017 ވަނަ އަހަރު އޭއެފްސީ ކަޕްގެ ގްރޫޕް ސްޓޭޖުގެ ދެ މެޗުގައި ވެސް 2-0 އިން އަބަހާނީ ބަލިކޮށްފައެވެ. ފުރަތަމަ ލެގުގެ މެޗު އެއްވަރުވެގެން ނިމުނުއިރު، ޕްރިލިމިނަރީ ބުރުގެ ދެވަނަ ލެގުގެ މެޗު އޮންނާނީ މި މަހުގެ 12 ވަނަ ދުވަހު މާލޭގައެވެ. ދެވަނަ ލެގުން ކުރި ލިބިއްޖެ ނަމަ މާޒިޔާއަށް ޕްލޭއޮފުން ފުރުސަތު ލިބޭނެ އެވެ.

ޕްލޭއޮފުގައި މާޒިޔާ ވާދަކުރަން ޖެހުމުގެ ފުރުސަތު ބޮޑީ އިންޑިއަން ސުޕަ ލީގުގެ ޗެމްޕިއަން ބެންގަލޫރު އެފްސީއާ އެވެ. އަދި ޕްލޭއޮފުން ކުރި ހޯދައި މާޒިޔާ ގްރޫޕް ސްޓޭޖަށް ހޮވިއްޖެނަމަ ވާދަކުރަން ޖެހޭނީ ގްރޫޕް އީ ގައެވެ. އެ ގްރޫޕުގައި ހިމެނެނީ ރާއްޖޭގެ ޓީސީ ސްޕޯޓްސް ކްލަބުގެ އިތުރުން އިންޑިއާގެ އައި ލީގުގެ ޗެމްޕިއަން ޗެންނާއީ ސިޓީ އާއި ބަންގްލަދޭޝްގެ ބަޝުންދަރާ ކިންގްސްއާ އެވެ.