ފަތުރުވެރިކަން އިޝްތިހާރުކުރުމަށް ސައުތް އެފްރިކާގެ ނޫސްވެރިން ރާއްޖެ އަތުވެއްޖެ
ސައުތް އެފްރިކާއިން މިދިޔަ އަހަރު ވަނީ 9,545 ފަތުރުވެރިން ރާއްޖެ ޒިޔާރާތް ކޮށްފަ
ސައުތު އެފްރިކާއިން ރާއްޖެ އައި ނޫސްވެރިންގެ ޓީމް
ދިވެހިރާއްޖޭގެ ފަތުރުވެރިކަން އިޝްތިހާރުކުރުމަށް ސައުތް އެފްރިކާގެ ނޫސްވެރިން ރާއްޖެ އަތުވެއްޖެއެވެ.
މިދަތުރަކީ ފުޅާދާއިރާއެއްގައި ރާއްޖެ އިޝްތިހާރުކުރުމަށް މޯލްޑިވްސް މާކެޓިން އެންޑް ޕީއާރް ކޯޕަރޭޝަން (އެމް.އެމް.ޕީ.އާރު.ސީ) އިން 2020 ވަނަ އަހަރު ހިންގުމަށް ހަމަޖެހިފައިވާ ސިލްސިލާ ފެމިލިއަރައިޒޭޝަން ޓްރިޕްތަކުގެ ތެރެއިން އެންމެ ފުރަތަމަ ދަތުރެވެ.
2 ފެބްރުއަރީ ގައި ރާއްޖެ އައި ސައުތް އެފްރިކާގެ މީޑިއާ ޓީމްގައި ހިމެނެނޭ ނޫސްވެރިންނަކީ ސެއިލް އެންޑް ލެއިޝަރ، ވައިލްޑްސައިޑް، ގެޓަ، ކޮސްމޮޕޮލިޓަން، އަދި ކުލުމާ މެގަޒިން އަށް ޓްރެވަލް އެންޑް ލައިފްސްޓައިލް ލިޔުންތައް ލިޔާތަޖުރިބާކާރު ނޫސްވެރިންނެވެ. މި ދަތުރުގައި ނޫސްވެރިން ކުރާ ތަޖުރިބާތައް މީޑިއާގެ އެކި ޕްލެޓްފޯމްތަކުގައި ޝާއިޢު ކުރުމަށްވަނީ ހަމަޖެހިފައެވެ.
މި ދަތުރާ ބެހޭގޮތުން ޝާޢިރުކުރެވޭ ލިޔުންތަކުން ދިވެހި ރާއްޖެއާ ބެހޭ މަޢުލޫމާތު ފުޅާދާއިރާއެއްގައި މިމާކެޓަށް ލިބިގެން ދާނެއެވެ. މި ޓީމުން ރާއްޖޭގައި ހޭދަކުރާ 6 ދުވަހުގެ ދަތުރުގައި ތިބުމަށް ހަމަޖެހިފައިވަނީ މިރިހި އައިލެންޑް ރިސޯޓު، އަދާރަން ކަލަބްރަންނާޅި އަދި އަދާރަން ސިލެކްޓް މީދުއްޕަރުގަ އެވެ. މި ދަތުރުގައި ކޮންމެ ރިސޯޓަކުން ލިބެން ހުންނަ ޚިދުމަތްތަކާއި އެރިސޯޓުތަކުގެ ރެސްޓޯރަންޓްތަކުން ލިބެން ހުންނަ ތަފާތު ކާތަކެތި ތަޖުރިބާ ކުރުމުގެ އިތުރުން ޑޯލްފިން ކްރޫޒް ފަދަ ރާއްޖޭގައިފަތުރުވެރިންނަށް ޚާއްސަ ކަންތައްތައް ނޫސްވެރިން ތަޖުރިބާކުރާނެ އެވެ.
ސައުތް އެފްރިކާއިން މިދިޔަ އަހަރު ވަނީ 9,545 ފަތުރުވެރިން ރާއްޖެ ޒިޔާރާތް ކޮށްފަ އެވެ. މިއީ 2018 ވަނަ އަހަރާއިއަޅާބަލާއިރު 23.1 އިންސައްތައިގެ ކުރިއެރުމެކެވެ. މިއަހަރު ސައުތުއެފްރިކަން މާކެޓަށް ޚާއްސަ ކޮށްގެން އެމް.އެމް.ޕީ.އާރް.ސީންވަނީ އެކި ހަރަކާތްތައް ކުރިއަށް ގެންދަން ރާވާފަ އެވެ. އެގޮތުން މިއަހަރުގެ އެޕްރީލް މަހު އޮންނަ ޑަބްލިއު.ޓީ.އެމް އެފްރިކާ |ގައި ބައިވެރިވުމަށް ވެސް ވަނީ ހަމަޖެހިފަ އެވެ.
