އެއްވެސް ބަޔަކަށް ހިލޭ ގޯތި ދޭކަށް ނުޖެހޭ: ސަނީފް

ރާއްޖޭގެ އެއްވެސް ސަރަހައްދަކުން އެއްވެސް ބަޔަކަށް ހިލޭ ގޯތި ދޭން ނުޖެހޭކަމަށް ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފް ވިދާޅުވެއްޖެއެވެ.

އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުން ސަނީފް ވިދާޅުވީ، ހިލޭ ގޯތި ދިނުމަކީ ދުނިޔޭގެ އެއްވެސް ގައުމެއްގައި ކުރާ ކަމެއް ނޫންކަމަށެވެ. އަދި ދުނިޔޭގައި މިޔަށް ވުރެ ބިން ބޮޑެތު ގައުމުތަކުގައިވެސް ބިމަކީ ވިއްކާ އެއްޗެއްކަން ފާހަގަކުރައްވާ ސަނީފް ވަނީ އެއްވެސް ބަޔަކަށް ހިލޭ ގޯތި ދޫކުރަން ނުޖެހޭ ކަމަށް ވިދާޅުވެފައެވެ.

އޭގެ އިތުރުން މެމްބަރު ސަނީފް ވަނީ، ވެށިފައި މާލެ ޕްރޮގްރާމްގެ ދަށުން މާލޭ ރަށްވެހިންނަށް ހުޅުމާލެއިން ބިން ދޫކުރުމުން، ބޭނުންވީ މަގުސަދު ހާސިލްވީތޯ ސުވާލު އުފައްދަވާފައެވެ. އެގޮތުން މީގެ ކުރިން އެ ޕްރޮގްރާމްގެ ތެރެއިން ގޯތި ލިބުނު ފަރާތްތަކުގެ ތެރެއިން މަދު ބަޔަކު ފިޔަވައި، ގޯތީގައި ގެދޮރު އިމާރާތް ކޮށްފައިވަނީ ކޮންމެވެސް މަހުޖަނެއް ކަމަށާއި، ހަގީގީ މަންފާއެއް ރައްޔިތުންނަށް ނުލިބޭ ކަމަށް އޭނާ ވިދާޅުވިއެވެ.

ސަނީފް ވަނީ ވެށިފަހި މާލެ ޕްރޮގްރާމްގައި ބައިވެރިވީ ފަރާތްތަކުގެ ތެރެއިން 150 މީހަކަށް އަދިވެސް ގޯތި ނުލިބި ހުރިކަންވެސް ފާހަގަކުރައްވާފައެވެ. އަދި މި މީހުންނަށް އަނެއްކާވެސް ގޯތިދީ އެ ދަތި ހާލުގައި ޖައްސަނީތޯ ސަނީފް ސުވާލުކުރެއްވިއެވެ.

މިހެން ދެންނެވި ކަމުގައިވީ ނަމަވެސް، ސަނީފް ވަނީ ގުޅީފަޅުން ފްލެޓް ގަތް ފަރާތްތަކުގެ ބަދަލު ދިނުމަށް ތާއީދުކޮށް ވާހަކަދައްކަވާފައެވެ. އެގޮތުން އެ ފަރާތްތަކަށް ލިބުނު ގެއްލުމުގެ ބަދަލު އެއީ އެ ފަރާތްތަކަށް ހައްގު އެއްޗެއް ކަމަށް ވިދާޅުވިއެވެ. އެގޮތުން ގުޅީފަޅުން ފްލެޓް ނުވަތަ ބިން ގަތުމަށް ފައިސާ ދެއްކި ފަރާތްތަކަށް މާލެ ނުވަތަ މާލެ ކައިރީ ސަރަހައްދަކުން ފްލެޓް ނުވަތަ ގޯތި ދިނުމަށް ސަނީފް ގޮވާލެއްވިއެވެ.

ރައީސް ނަޝީދުގެ ދައުރުގައި ފެއްޓެވި ވެށިފަހި މާލެ ޕްރޮގްރާމްގެ ދަށުން މާލެއިން ބިން ދޫކޮށްލާ ފަރާތްތަކަށް ހުޅުމާލެއިން ވަނީ ގޯދި ދޫކޮށްފައެވެ. ނަމަވެސް ރައީސް ޔާމީންގެ ދައުރުގައި އެ ޕްރޮގްރާމް ވަނީ ހުއްޓުމަކަށް ގެނެސްފައެވެ.

މި ޕްރޮގްރާމްގައި ބައިވެރިވީ ފަރާތްތަކުގެ ތެރެއިން ޝަރުތުހަމަވާ ފަރާތްތަކަށް ފްލެޓް ނުވަތަ ގޯދި ދޭނެ ކަމުގެ ޔަގީންކަން އެމްޑީޕީން ވަނީ ތަކުރާރުކޮށް ދީފައެވެ. އަދި އެ ޕްރޮގްރާމަށް ކުރިމަތިލީ ފަރާތްތަކުގެ ތެރެއިން އެންމެ ދަތި ހާލުގައި ދިރިއުޅެމުންދާ 4000 އެއްހާ މީހުންގެ ލިސްޓެއްވެސް އެމްޑީޕީން ވަނީ އެކުލަވާލާފައެވެ.