ދަނޑުތައް ފުރާލުމަކީ ހަމައެކަނި މާލޭ ގަލޮޅު ދަނޑު ފުރާލުމެއް ނޫން، މާލެއިން ބޭރަށްވެސް އިސްކަން ދޭނަން: މިނިސްޓަރ

ދަނޑުތައް ފުރާލުމަކީ ހަމައެކަނި ގަލޮޅު ދަނޑު ފުރުން ނޫން ކަމަށާއި، އަތޮޅު ތެރެއަށްވެސް އިސްކަންދެއްވާނެ ކަމަށް މިނިސްޓަރ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަޚްލޫފު ވިދާޅުވެއްޖެއެވެ.

ހޯމަ ދުވަހުގެރޭ ރާއްޖެޓިވީގެ "ފަލަސުރުޚީ" ޕްރޮގުރާމުގައި ވާހަކަދައްކަވަމުން މިނިސްޓަރ ވިދާޅުވީ، ދަނޑުތައް ފުރާލުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވެވަޑައިގެންނެވި ރިޔާސީ ވަޢުދުފުޅުގެ ދަށުން ހިމެނެނީ ހަމައެކަނި ގަލޮޅު ދަނޑެއް ނޫން ކަމަށެވެ.

އަދި ގަލޮޅު ދަނޑުގެ އިތުރުން، މާލެއިން ބޭރު އަތޮޅު ތެރޭގެ ރަށްރަށުގެ ދަނޑުތައް ފުރާލުމަކީވެސް އިސްކަންދެއްވާނެ ކަމެއް ކަމަށް މިނިސްޓަރ ވިދާޅުވިއެވެ.

އެގޮތުން އައު ސަރުކާރު އައިއިރު އައްޑޫ ސިޓީގައި ފުޓުބޯޅަ މުބާރާތް ބޭއްވުނު ނަމަވެސް މާލެއިން ބޭރުގައި ބައިނަލްއަޤުވާމީ އެހެން މުބާރާތެއް ބޭއްވޭނެ ޙާލަތެއް ނެތް ކަމަށް މިނިސްޓަރ ވިދާޅުވިއެވެ. އަދި ޤައުމީ ފެންވަރުގެ މުބާރަތްތައްވެސް މާލެއިން ބޭރުގައި ނަމަ ބާއްވާނެ ރަނގަޅު އިންތިޒާމެއް ނެތްކަން މިނިސްޓަރ ފާހަގަ ކުރެއްވިއެވެ.

މިނިސްޓަރ އިތުރަށް ވިދާޅުވީ، ޤައުމީ މުބާރަތްތައް ބޭއްވުމުގައިވެސް ހަމައެކަނި މާލެއަށް އިސްކަން ދިނުމުގެ ބަދަލުގައި އަތޮޅު ތެރޭގައި ޤައުމީ އެކިއެކި މުބާރަތްތައް ބޭއްވޭނެ އިންތިޒާމް ހަމަޖެއްސުމަށް މަސައްކަތް ކުރައްވާނެ ކަމަށެވެ. އަދި އެކަމުގެ މަޝްވަރާތައް ކޮށްފައިވާނެ ކަމަށްވެސް މިނިސްޓަރ ވިދާޅުވިއެވެ.

ފުޓުބޯޅަ ދަނޑުތައް ފުރާލުމަކީ އާ ސަރުކާރުގެ ރިޔާސީ ވަޢުދަކަށްވާއިރު، ކުރިޔަށް އޮތް ދެ މަހެއްހާ ދުވަހުގެ ތެރޭގައި ރާއްޖޭގެ އެކި ކަންކޮޅުތަކުގެ ތެރޭގައި 12 ފުޓުބޯޅަ ދަނޑު އެޅިގެންދާނެ ކަމަށާއި، މިއަހަރުގެ މެދާއި ހަމައަށްދާއިރު 37 ރަށުގެ މަސައްކަތް ނިމިގެންދާނެ ކަމަށް މިނިސްޓަރ މީގެ ކުރިން ވަނީ ވިދާޅުވެފައެވެ. އަދި އަހަރު ނިމިގެންދާއިރު 50 ދަނޑުގެ މަސައްކަތް ނިމިގެންދާނެ ކަމަށް މިނިސްޓަރ ވިދާޅުވިއެވެ.