ޔާމީން ޖަލުގައި ބާއްވައި، ރިޔާސީ ޓިކެޓު ހޯދަން ޕީޕީއެމް ޕީއެންސީގައި 3 ފެކްޝަން އެބައޮތް: މިނިސްޓަރ މަހުލޫފް
ޕާޓީގެ ލީޑަރޝިޕް ބޭނުންވެގެންނާއި ރިޔާސީ ޓިކެޓުގެ ބޭނުމުގައި މިހާރުވެސް އިދިކޮޅު ކޯލިޝަން އޮތީ 3 ބަޔަކަށް ބެހިފައި
ޔޫތް މިނިސްޓަރ އަހުމަދު މަހްލޫފް، ނޫސްވެރިންގެ ބައްދަލުވުމުގައި ވާހަކަދައްކަވަނީ
ކުރީގެ ރައީސް އަބްދުﷲ ޔާމީން ޖަލުގައި ބާއްވައި ޕީޕީއެމް ޕީއެންސީގެ ޓިކެޓުގައި ރިޔާސީ އިންތިހާބަށް ވާދަކުރުމަށް 3 ފެކްޝަނެއް އެ ޕާޓީތަކުގެ ތެރޭގައި ހިމެނޭކަމަށް ޔޫތް މިނިސްޓަރ އަހުމަދު މަހުލޫފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަދައްކަވަމުން މިނިސްޓަރ ވިދާޅުވީ، ޕީޕީއެމް އަދި ޕީއެންސީގެވެސް ވިސްނުން މިހާރު ހުރީ ރައީސް ޔާމީން ޖަލުގައި ބޭއްވުމަށްކަމަށާއި، ހިޔާނާތާއި ގުޅިގެން ކުރީގެ ރައީސް ޔާމީން ޖަލުގައި އޮންނަވަން ޖެހޭކަމަށް އެ ޕާޓީތަކުންވެސް ގަބޫލުކުރާކަމަށެވެ. އިދިކޮޅު ކޯލިޝަންގައި ވަރަށް ގާތް ރައްޓެހިންވެސް އުޅުއްވާކަން ފާހަގަކޮށް މިނިސްޓަރ ވިދާޅުވީ ރައީސް ޔާމީން ޖަލުގައި ބާއްވައި އެބޭފުޅުންގެ ތެރެއިން ބަޔަކު ރިޔާސީ އިންތިހާބަށް ނިކުންނަން މަސައްކަތްކުރަމުންދާކަމަށެވެ.
މިނިސްޓަރ ވިދާޅުވީ އެ ޕާޓީގެ ލީޑަރޝިޕް ބޭނުންވެގެންނާއި ރިޔާސީ ޓިކެޓުގެ ބޭނުމުގައި މިހާރުވެސް އިދިކޮޅު ކޯލިޝަން އޮތީ 3 ބަޔަކަށް ބެހިފައިކަމަށާއި ކުދި ކުދި 3 ފެކްޝަނަކުން ލީޑަރޝިޕަށް މަސައްކަތްކުރަމުންދާކަމަށް މައުލޫމާތު ލިބިފައިވާކަމަށެވެ. މިނިސްޓަރ ވިދާޅުވީ އެއީ ރަނގަޅު ނިންމުމެއް ކަމަށާއި ރައީސް ޔާމީނަކީ އެނުބުރި ރާއްޖޭގެ ވެރިކަމަށް ވަޑައިގަންނަވަން ހެޔޮވަރު ބޭފުޅެއް ނޫންކަމަށެވެ.
އިދިކޮޅުގެ ތެރެއިން ލީޑަރޝިޕް ހޯދުމަށް ކުރަމުންދާ މަސައްކަތައް ތާއީދުކުރާކަމަށްވެސް މިނިސްޓަރ މަހުލޫފު ވަނީ ވިދާޅުވެފައެވެ. ޕްރޮގުރާމްގައި އިތުރަށް ވާހަކަދައްކަވަމުން މިނިސްޓަރ ވިދާޅުވީ މިނިވަންކަމާއި އިންސާފުވެރިކަމާއެކު ރައީސް ޔާމީންގެ މައްޗަށް ޝަރީއަތް ހިންގިއްޖެނަމަ ކުރިޔަށް އޮތް ރިޔާސީ އިންތިހާބުގައި ކެންޑިޑެންސީ ކަށަވަރު ނުކުރެވޭނެކަމަށެވެ. މިނިސްޓަރ ވަނީ އެ ކޯލިޝަންގައި ޒުވާން ގާބިލް މީހުން ތިބިކަން ފާހަގަކޮށް އެ ފަރާތްތަކަށް ފުރުސަތު ހޯދައިދިނުމަށް ކުރާ މަސައްކަތެއްގެ ގޮތުގައި ޓިކެޓު ހޯދުމަށް ކުރާ މަސައްކަތް ސިފަކުރައްވާފައެވެ.
ޕީޕީއެމް ޓިކެޓްގައި ރައްޔިތުންގެ މަޖިލީހަށް އިންތިހާބުވެ ކުރީގެ ގަލޮޅު ދެކުނު ދާއިރާގެ މެމްބަރުކަންވެސް ކުރައްވާފައިވާ މިނިސްޓަރ މަހުލޫފް މިހެން ވިދާާޅުވެފައިވާއިރު، ޕްރޮގްރެސިވް ކޮންގްރެސް ކޯލިޝަނުން ބާއްވާ އިހްތިޖާޖުތަކުގައި ވާހަކަދައްކަވަމުން އެ ޕާޓީގެ އިސްފަރާތްތައް ވަނީ ރައީސް ޔާމީނަށް ވާދަނުކުރެވޭނަމަ ރިޔާސީ އިންތިހާބު ބޮއިކޮޓް ކުރާނެކަމަށްވެސް ވިދާޅުވެފައެވެ.
ކުރީގެ ރައީސް ޔާމީން 5 އަހަރަށް ޖަލަށް ލާން ހުކުމް ކުރެވުމާއެ،ކު މިނިވަންކުރުމަށް ގޮވާލާ ސިލްސިލާކޮށް މުޒާހަރާކުރަމުންދިޔައިރު މިހާރު އެ ހަރަކާތްތައް ވަނީ ވަރަށް ބޮޑަށް މަދުވެފަ އެވެ.
