އޮޕޮސިޝަން ލީޑަރަކީ ކޮން މެމްބަރެއްކަން އޮޅުން ފިލުވުމަށްފަހު ރައިސުލްޖުމްހޫރިއްޔާ ހޯމަ ދުވަހު ދެއްވި ރިޔާސީ ބަޔާނަށް ޖަވާބެއް ދެއްވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ރިޔާސީ ބަޔާން ދެއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ވާހަކަދައްކަވަމުންނެވެ.
ރައީސް ސޯލިހު ރިޔާސީ ބަޔާން ދެއްވިއިރު އިދިކޮޅު ކޯލިޝަންއަށް ނިސްބަތްވާ މެމްބަރުން ގެންދެވީ އިހުތިޖާޖު ކުރަމުންމެވެ. އިހުތިޖާޖު ކުރައްވަމުން ގެންދެވި މެމްބަރުން، ރައީސް ދެއްވި ރިޔާސީ ބަޔާނަށް އެވަގުތު ރައްދުދެއްވަމުން ގެންދެވިކަން ފާހަގަކުރައްވަމުން ރައީސް ނަޝީދު ވިދާޅުވީ މަޖިލީހުގެ ގަވާއިދުގައި އެގޮތަށް ކަންކުރުމަކަށް ބަޔާނެއް ނުކުރާ ކަމަށެވެ.
ރައިސުލްޖުމްހޫރިއްޔާ ރިޔާސީ ބަޔާން އިއްވަމުންގެންދަވާއިރުގާ، އެހިނދުގައި ކުރިމަތިފުޅުގައި އެކަން ކުރުމަކަށް ރައްޔިތުންގެ މަޖިލީހުގެ ގަވާއިދު ބަޔާނެއް ނުކުރޭ. އެހެން ނަމަވެސް އަޅުގަނޑުމެންގެ ވާދަވެރިފަރާތްތަކުން ރިޔާސީ ބަޔާނުގެ ޖަވާބެއްގެ ގޮތުން ދެތިން ވާހަކައެއް ވިދާޅުވިކަން އަޅުގަނޑު މިއަދު މި ޖަލްސާގައި ފާހަގަކުރަން.މަޖިލީހުގެ ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ގަވާއިދު ބަޔާން ކުރަނީ ކޮންމެ އަހަރަކުމެ، ރައީސުލްޖުމްހޫރިއްޔާ ރިޔާސީ ބަޔާނެއް އިއްވުމުން އެވަގުތު މަޖިލީހުގައި ހިމެނޭ ސިޔާސީ ޕާޓީތަކުގެ ތެރެއިން ރައިސުލްޖުމްހޫރިއްޔާ ނިސްބަތްވާ ޕާޓީ ފިޔަވައި ދެން އެންމެ ގިނައިން މެމްބަރުން ތިބި ޕާޓީތަކުގެ ފަރާތުން އެ ރިޔާސީ ބަޔާނަށް ދޭނެ ޖަވާބު ތައްޔާރުކޮށް، އެ ޖަވާބު ރިޔާސީ ބަޔާން އިއްވަވާތާ 14 ދުވަހުގެ ތެރޭގައި މަޖިލީހުގެ ޖަލްސާއެއްގައި ރިޔާސީ ބަޔާނަށް ދޭ ޖަވާބުގެ ގޮތުގައި ދެއްވުމެވެ.
ރައީސް ނަޝީދު ވިދާޅުވީ ރިޔާސީ ބަޔާނުގެ ޖަވާބު ދެއްވާނީ އޮޕޮސިޝަން ލީޑަރު ކަމަށެވެ. އަދި އެއީ ކޮން މެމްބަރެއްކަން އޮޅުންފިލުވަންޖެހޭ ކަމަށް ވިދާޅުވެ ނަޝީދު ވިދާޅުވީ މަޖިލީހުގެ ގަވާއިދުގައި ވާގޮތުގެ މަތިން ރިޔާސީ ބަޔާނަށް އަރުވާ ޖަވާބު އެކަން އޮޅުން ފިލުމުން ފޮނުއްވަދެއްވާނެ ކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ 14 ދުވަހުގެ ތެރޭގައި ޖަވާބެއް އެރުވުމަށް ގަވާއިދުގައި ބަޔާން ކުރި ނަމަވެސް، ރިޔާސީ ބަޔާން ދެއްވިއިރު، އިދިކޮޅުން އެ ޖަވާބު ދެއްވައިފިކަމަށެވެ.
19 ރައްޔިތުންގެ މަޖިލީހުގައި ޕާޓީތަކަށް ނިސްބަތްވާ މެމްބަރުންގެ އަދަދަށް ބަލާލާއިރު އެމްޑިޕީއަށް ނިސްބަތްވާ 65 މެމްބަރުން ތިއްބަވައެވެ. އަދި ޕީޕީއެމް އަށް ނިސްބަތްވާ 5 މެމްބަރުން ތިއްބަވާއިރު ޖުމްހޫރީ ޕާޓިއަށް ނިސްބަތްވާ 5 މެމްބަރުން ތިއްބަވައެވެ. މީގެއިތުރުން ޕީއެންސީއަށް ނިސްބަތްވާ 3 މެމްބަރުންނާއި އެމްޑީއޭ އަށް ނިސްބަތްވާ 2 މެމްބަރުން ތިއްބަވައެވެ.
ރައްޔިތުންގެ މަޖިލީހުގެ ރައީސް ވިދާޅުވީ މަޖިލީހުން ސަރުކާރު ޖަވާބުދާރީ ކުރުވުމުގެ މަސައްކަތް ވަރަށް ފުރިހަމައަށް ކުރާ ކަމުގައި ރައީސް ސޯލިހު ވިދާޅުވާ ކަމީ އުފާކުރައްވާ ކަމެއް ކަމަށާއި އެހެން އެމަނިކުފާނު އެވިދާޅުވަނީ އިދިކޮޅު މެމްބަރުންވެސް ހިމެނޭގޮތަށް ކަމަށެވެ.
