ކޮރޯނާ ކްރައިސިސްގައި މީޑިއާތަކަށް މައުލޫމާތު ދިނުމުގެ އެންމެ އިސްމީހަކަށް ޓުއަރިޒަމް މިނިސްޓަރ!
ރާއްޖޭގެ ރިސޯޓުތައް ހުސްކޮށްފައި މީހުން ކަރަންޓީން ކުރަންޖެހުނަސް އެކަންވެސް ސަރުކާރުންކުރާނެ
ރައީސް ސޯލިހު އަދި ޓުއަރިޒަމް މިނިސްޓަރ އަލީ ވަހީދު
ނޮވެލް ކޮރޯނާ ވައިރަސްއާއި ބެހޭ ހުރިހާ މައުލޫމާތުތައް ހާމަކުރުމުގެ އެންމެ އިސްމީހަކަށް ޓުއަރިޒަމް މިނިސްޓަރ އަލީ ވަހީދު ހަމަޖައްސަވައިފިއެވެ.
ކޮރޯނާ ވައިރަސްއާއި ބެހޭ އެންމެ ފަހުގެ މައުލޫމާތު ހާމަކުރުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ ވިދާޅުވީ، ދުނިޔޭގެ ހަލުވިކަމާއެކު ފެތުރެމުން އަންނަ ކޮރޯނާ ވައިރަސްއަށް ސަރުކާރުން އަޅަމުންދާ ފިޔަވަޅުތައް ހާމަކުރުމުގެ ނޫސްވެރިންގެ ބައްދަލުވުންތަކުގައި ފެންނަނީ ރައީސް ސޯލިހު އެގޮތަށް އަންގަވާފައިވާތީކަމަށެވެ.
ދުނިޔެއަށް ދިމާވެފައިވާ ސިއްހީ ބިރުވެރިކަމުގެ މި ދަނޑިވަޅުގައި ހެލްތް މިނިސްޓަރވެސް ބައިވެރިވެވަޑައިގެންނެވި ބައްދަލުމުގައި މިނިސްޓަރ ވިދާޅުވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބައިނަލްއަގްވާމީ މީޑިއާތަކުގެ އިތުރުން ރާއްޖޭގެ މީޑިއާތަކަށް މައުލޫމާތު ދިނުމުގެ އެންމެ އިސްމީހެއްގެ ރޯލު އެމަނިކުފާނަށް ހަވާލުކޮށްފައިވާކަމަށެވެ. އަދި ނޫސްވެރިންގެ ބައްދަލުވުންތަކުގައި ފެންނަނީ އެ ސަބަބާއި ހުރެ ކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ ވިދާޅުވީ، ސަރުކާރުން އެންމެ އިސްކަމެއް ދެނީ ރައްޔިތުންގެ ސަލަމަތާއި ރައްކާތެރިކަން ކަށަވަރުކުރުމަށްކަމަށާއި ކޮރޯނާ ވައިރަސް ޖެހިފައިވާ މީހަކު ފެނިއްޖެނަމަ އެކަމަށް އަޅާނެ ފިޔަވަޅުތަކާއެކު ސަރުކާރު އޮތީ ތައްޔާރައްކަމަށާއި އެޔަށް ވުރެ ގޯސް ހާލަތެއް މެދުވެރިވެއްޖެނަމަ ރާއްޖޭގެ ކަންތައް މެއިންޓެއިން ކުރާނެ އެސްއޯޕީތަކާއެކު ސަރުކާރުން ތައްޔާރަށް އޮތްކަމަށެވެ. މިނިސްޓަރ ވިދާޅުވީ ރާއްޖެއަށް މި ބަލި ފެތުރިޔަ ނުދިނުމަށްޓަކައި އައިސޮލޭޝަންއަށް ގެންދާނެ ތަނެއް ނެތިފައި އޮންނަ ހާލަތަށް ނުދާނެކަމަށާއި ރާއްޖޭގެ ރިސޯޓުތައް ހުސްކޮށްފައި މީހުން ކަރަންޓީން ކުރަންޖެހުނަސް އެކަންވެސް ސަރުކާރުންކުރާނެކަމަށެވެ.
މިހާރު ދުނިޔޭގައި ފެތުރެމުންދާ ނުރައްކާތެރި ކޮރޯނާ ވައިރަހާ ގުޅިގެން ، ނިމިދިޔަ ޖެނުއަރީ މަހުގެ 26 އިން ފެށިގެން މިހިނގާ ފެބްރުއަރީ މަހުގެ 2 ވަނަ ދުވަހާ ހަމައަށް ފަތުރުވެރިންގެ 11،115 ބުކިންގ ކެންސަލް ވެފައިވާކަމަށާއި ނަމަވެސް ހަމަ އެ މުއްދަތުގައި 24،759 ޓޫރިސްޓު ބުކިންގ ހައްދާފައިވާ ކަމަށްވެސް މިނިސްޓަރ ވަނީ ވިދާޅުވެފައެވެ.
