ޕީއެސްޖީން ކަވާނީއަށް ދުލެއް ނުދިން

ކްލަބު ދޫކޮށްލަން ބޭނުންވާކަން ރަސްމީކޮށް ފޯވަރޑް އެޑިންސަން ކަވާނީ އިޢުލާނުކުރި ނަމަވެސް، ފްރާންސްގެ ޕީއެސްޖީން އޭނާ ހިފަހައްޓައިފި އެވެ.

އުމުރުން 32 އަހަރުގެ ކަވާނީ އަށް ޕީއެސްޖީގެ ފުރަތަމަ އެގާރައިން ފުރުޞަތު ގެއްލުނީ މި ސީޒަނުގައި އިންޓަރ މިލާނުން މައުރޯ އިކާޑީ ގެނައި ފަހުންނެވެ. ފުރުޞަތު ނުލިބޭތީ ހިތްހަމަނުޖެހުން ފާޅުކޮށް އިއްޔެ ނިމިގެންދިޔަ ޖެނުއަރީ ޓްރާންސްފަރގައި ކަވާނީ ވަނީ ކްލަބު ދޫކޮށްލަން ބޭނުންވާކަން ރަސްމީކޮށް ޕީއެސްޖީ އަށް އަންގާފައެވެ.

އެންމެ ފުރަތަމަ ކަވާނީގެ ޑިމާންޑް ބޮޑުވުމުން ޕީއެސްޖީން އޭނާގެ އަގު ބޮޑުކުރި ނަމަވެސް، ފަހުން ވަނީ ކަވާނީ ނުވިއްކަން ނިންމާފައެވެ.

ރިޕޯޓުތައް ބުނާގޮތުން އެތުލެޓިކޯ މެޑްރިޑާއި މެންޗެސްޓަރ ޔުނައިޓެޑާއި ޓޮޓެންހަމް އަދި ޗެލްސީންވެސް ވަނީ ކަވާނީ ހޯދުމަށް މަސައްކަތް ކޮށްފައެވެ. އެގޮތުން އެތުލެޓިކޯއިން 25 މިލިއަން ޔޫރޯގެ ބިޑެއް ކަވާނީއަށް ހުށަހެޅި ނަމަވެސް، ޕީއެސްޖީން އެ ބިޑު ބަލައިގަނެފައެއް ނުވެއެވެ.

އިޓަލީގެ ނާޕޮލީން 2013 ވަނަ އަހަރު 64 މިލިއަން ޔޫރޯ އަށް ޕީއެސްޖީއާ ގުޅުނު ފޯވަރޑް ވަނީ އެ ޓީމަށް 292 މެޗުން 198 ގޯލް ޖަހައިދީފަ އެވެ. އަދި އޭނާ ވަނީ ޕީއެސްޖީއާއެކު ފްރެންޗް ލީގު ފަސް ފަހަރު ހޯދާފައެވެ.