އިސްލާމިކް ބޭންކަށް ފައިދާގެ ގޮތުގައި 25.6 މިލިއަން ރުފިޔާ
31 ޖެނުއަރީ 2020 | ހުކުރު 07:29ހިންގުމުގެ ފައިދާ 11.4 އިންސައްތަ އިތުރުވެ 68.7 މިލިއަން ރުފިޔާއަށް އަރައިފައިވޭ
އިސްލާމިކް ބޭންކް
2019 ވަނަ އަހަރުގެ ފަހު ކުއާޓާގައި މޯލްޑިވްސް އިސްލާމިކް ބޭންކަށް ފައިދާގެ ގޮތުގައި 25.6 މިލިއަން ރުފިޔާ ލިބިއްޖެ އެވެ.
އިސްލާމިކް ބޭންކުން ބުނީ ހިންގުމުގެ ފައިދާ 11.4 އިންސައްތަ އިތުރުވެ 68.7 މިލިއަން ރުފިޔާއަށް އަރައިފައިވާކަމަށެވެ. އަދި ހިއްސާއަކާއި އަޅާ ބަލާއިރު ނެޓް އެސެޓްގެ އަގު ވަނީ 23.56 ރުފިޔާއިން 24.7 ރުފިޔާއަށްޖެހި ހިއްސާއަކަށް ޖެހޭ ފައިދާގެ އަގު 14 އިންސައްތަ އިތުރުވެފައިކަމަށެވެ.
އިސްލާމިކް ބެންކުން ވަނީ އާންމުންނަށް 24 ޖުލައި 2019 އިން 22 ސެޕްޓެމްބަރ 2019 ގެ ނިޔަލަށް ހިއްސާ ވިއްކައި ޕަބްލިކް ކުންފުންޔަކަށްވެފައެވެ. އަދި މި އައިޕީއޯއަކީ ރާއްޖޭގއި ބޭއްވުން އެންމެ ކާމިޔާބު އައިޕީއޯކަމަށް އެ ކުންފުނިން ބުންޏެވެ. އެގޮތުން ވިއްކަން ހުށަހެޅި ހިއްސާގެ އަދަދަށް ވުރެން 46 އިންސައްތަ އިތުރައް ހިއްސާ ގަންނަން ހުށަހެޅިކަމަށް ކުންފުނިން ބުންޏެވެ. މި ކާމިޔާބީއާއިއެކު އެމްއައިބީ ވަނީ 16،000 ހިއްސާދާރުންނާއިއެކު 17 ނޮވެމްބަރ 2019 ގައި މޯލްޑިވްސް ސްޓޮކް އެކްސްޗޭންޖުގައި ރަޖިސްޓްރީ ވެފައެވެ.
ވޭތުވެދިޔަ ކުއާރޓާގައި އެމްއައިބީގެ ފައިސާ މޮބައިލް އެޕްލިކޭޝަންއަށް ވަނީ އިސްލާމިކް ފައިނޭންސް ފޯރަމްގައި އަހަރުގެ އެންމެ މޮޅު ޕްރޮޑަކްޓުގެ ދާއިރާއިން ސިލްވަރ އެވޯޑު ލިބިފައެވެ. ކަސްޓަމަރުންނަށް ދެވޭ ހިދުމަތް ރަނގަޅުކުރުމުގެ ގޮތުން ވޭތުވެދިޔަ ކުއާރޓަރގައިވަނީ ބާޒާރު ކަސްޓަމަރ ސާވިސް ސެންޓަރ ހުޅުވިފައެވެ. އަދި އޮންލައިން ކިޔު ސިސްޓަމެއް އޭންޓް ކިޔު އާއި ގުޅިގެން ތައާރަފް ކުރެވިފައިވާކަމަށް ކުންފުނިން ބުންޏެވެ.
އިސްލާމިކް ބޭންކުން ބުނީ ކާމިޔާބު ކިޑްސްގެ ނަމުގައި އާ ސޭވިންގް އެކައުންޓެއް އެމްއައިބީގައި ތައާރަފް ކުރެވުނީވެސް 2019 އަހަރުގެ ފަހު ކުއާރޓަރުގައިކަމަށެވެ. އަދި މި އެކައުންޓަކީ ކުދިންގެ ނަމުގައި މަހަކު ކަނޑައެޅޭ ވަކި އަދަދެއް ރައްކާކޮށް ރަނގަޅު ފައިދާއަކާއި އެކު ކުއްޖާއަށް 18 އަހަރު ފުރުމުން ނެގޭގޮތަށް ހުޅުވޭ އެކައުންޓެއް ކަމަށާއި، ޑޮލަރު އަދި ރުފިޔާއިންވެސް މި އެކައުންޓު ހުޅުވޭނެކަމަށް އެ ކުންފުނިން ބުންޏެވެ.
އިސްލާމިކް ބޭންކުން ބުނީ މި ހިނގާ 2020 ވަނަ އަހަރު ވެސް ބޭންކުން ބޭންކުގެ ހިދުމަތް ފުޅަކުރުމގެ ގޮތުން އިތުރު ބްރާންޗު ހުޅުވުމާއި، އޭޓީއެމް އަދި ޕޮސް ޓާމިނަލް އިތުރުކުރުމުގެ އިތުރުން މޮބައިލް އަދި އޮންލައިން ބޭންކިންގް އިތުރަށް ފުޅކޮށް އާ ޕްރޮޑަކްޓު ތަކާއިއެކު އިސްލާމިކް ފައިނޭނެސް ރާއްޖޭގައި ފުޅަކުރުމުގެ މަސްއްކަތް ކުރާނެކަމަށެވެ.
