ބީއެމްއެލްއަށް 592 މިލިއަން ރުފިޔާ ފާއިދާގެ ގޮތުގައި ލިބިއްޖެ

މިއަހަރުގެ ފުރަތަމަ ހަމަސްދުވަހުގެ ޓެކްސްއަށް ނުކަނޑައި ފައިދާގެ ގޮތުގައި ބީއެމްއެލްއަށް 592 މިލިއަން ރުފިޔާ ލިބިފައިވާ ކަމަށް އެކުންފުނިން ހާމަކޮށްފިއެވެ.

ބޭންކް އޮފް މޯލްޑިވްސްއަށް ލިބޭނެކަމަށް ލަފާކުރި މާލީ ނަތީޖާއަށް ވުރެ ރަނގަޅު މާލީ ނަތީޖާއެއް 2017 ވަނަ އަހަރުގެ ދެވަނަ ކުއާޓަރގެ އިތުރުން އަހަރުގެ މިހާތަނަށްވެސް ހޯދާފައިވާ ކަމަށާއި 2016 ވަނަ އަހަރުގެ ރެކޯޑް ފައިދާއަށް ފަހު، ބީއެމްއެލްއިން ފަށާފައިވާ ފުޅާ އިންވެސްޓްމަންޓް ޕްރޮގްރާމާއެކު ހިންގުމުގެ ޚަރަދު އިތުރުވެފައިވުމާއި ފައިދާގެ ރޭޓްތައް ކުޑަކޮށްފައިވާތީވެ، 2017 ވަނަ އަހަރު ފައިދާއަށް އަސަރުކޮށްފާނެކަމަށް ބީއެމްއެލްއިން ވަނީ ލަފާކޮށްފައެވެ.

Advertisement

މިއީ 2016 ވަނަ އަހަރުގެ ފުރަތަމަ ހަމަސްދުވަހާ އެއް މިންގަނޑެއްގައި އަޅާބަލާއިރު 17 ޕަސެންޓްގެ ކުރިއެރުމެކެވެ. މިއީ ލަފާކުރި މިންވަރަށްވުރެ މަތީ އަދަދެއް ކަމަށް ބީއެމްއެލްއިން ބުންޏެވެ.

2017 ވަނަ އަހަރުގެ ފުރަތަމަ ހަމަސްދުވަހުގެ ތެރޭގައި ބީއެމްއެލްއިން ކުރިއަށް ގެންދާ އިންވެސްޓްމަންޓް ޕްރޮގްރާމް ފުޅާކުރުމުގެ ގޮތުން އަލަށް 3 ބްރާންޗް ހުޅުވައި، 11 ސެލްފް ސާވިސް ބޭންކިންގ ސެންޓަރ ގާއިމްކޮށްފައިވާ ކަމަށާއި 22 ރަށެއްގައި 300 މިލިއަން ރުފިޔާގެ އިންވެސްޓްމަންޓް ޕްރޮގްރާމް ހިންގުމަށް ނިންމާފައިވާއިރު މި ޕްރޮގްރާމްގެ ތެރެއިން 150 އާ ވަޒީފާ އުފެދިގެން ދާނެ ކަމަށް އެކުންފުނިން ބުންޏެވެ.

މިއަހަރުގެ ދެވަނަ ކުއާރޓަރގައި ބީއެމްއެލްއިން ކުރިއަށްވުރެ ބޭނުންކުރަން ފަސޭހަ އަދި ފެންވަރު ރަނގަޅު އިންޓަނެޓް ބޭންކިންގ ޕްލެޓްފޯމެއް ތަޢާރަފްކޮށް ކަސްޓަމަރުންގެ މަގުބޫލުކަން އިތުރުކޮށްފައިވާ ކަމަށްވެސް އެކުންފުނިން ވަނީ ބުނެފައެވެ.

މި ނަތީޖާއާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރ އެންޑްރޫ ހީލީ ވިދާޅުވީ، މި އަހަރުގެ ފުރަތަމަ ބައިގައި މި ލިބުނު ރަނގަޅު ނަތީޖާއާ މެދު ވަރަށް ހިތްހަމަޖެހިވަޑައިގަންނަވާ ކަމަށާއި ކުރިން ލަފާކުރި މިންވަރަށްވުރެ ރަނގަޅު ނަތީޖާއެއް ހޯދިފައި މިވަނީ ބޭންކްގެ ޕްރޮޑަކްޓްތަކަށާއި ޚިދުމަތްތަކަށް ކަސްޓަމަރުންގެ ފަރާތުން ލިބެމުން އަންނަ ބޮޑު ތަރުހީބުގެ ސަބަބުން ކަމަށެވެ.

މުޖުތަމަޢުތަކާ ބޭންކާ ދެމެދު އޮތް ގުޅުން އިތުރަށް ބަދަހި ކުރުމަށް ހިންގުނު "އަހަރެންގެ ބޭންކް" ކޮމިއުނިޓީ ކެމްޕޭންގެ ތެރެއިން ފެނުނު ގިނަ އަދަދެއްގެ އިވެންޓްތަކާއި ހަރަކާތްތައް ފާހަގަކޮށްލެވޭ ކަމަށްވެސް ހީލީ ވިދާޅުވިއެވެ.

ބީއެމްއެލްއިން ބުނީ މުޅިރާއްޖެ ހިމެނޭ ބޭންކިންގ ވިއުގައަކާއެކު 20 އަތޮޅުގައި 34 ބްރާންޗް، 86 އޭޓީއެމް، 4000 ޕީއޯއެސް މަރޗަންޓުން، 200 ކޭޝް އޭޖެންޓުން، 28 ސެލްފްސަރވިސް ބޭންކިންގ ސެންޓަރ އަދި 5 ދޯނި ބޭންކިންގ ޔުނިޓުގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތާއެކު އެބޭންކުގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.