ސަރުކާރަށް ޖުލައި މަހު އާމްދަނީގެ ގޮތުގައި 2.7 ބިލިޔަން ރުފިޔާ ލިބިއްޖެ

މިއަހަރު ޖުލައި މަހު ދައުލަތުގެ އާމްދަނީ އަށް 2.7 ބިލިޔަން ރުފިޔާ އާމްދަނީ އެއް ލިބިފައިވާ ކަމަށް އެމްއެމްއޭގެ އިގްތިސާދީ ރިވިއުގައި ބުނެފިއެވެ.

އެމްއެމްއޭ އިން ނެރެފައިވާ އޮގަސްޓް މަހުގެ އިގްތިސާދީ ރިވިއުގައި ބުނެފައިވާ ގޮތުގައި ޖުލައި މަހު ސަރުކާރަށް އާމްދަނީގެ ގޮތުގައި 2.7 ބިލިޔަން ރުފިޔާ ލިބިފައި ވަނީ ހިލޭ އެހީ ނުހިމަނައެވެ. އަދި މިއީ 2016 ވަނަ އަހަރުގެ ޖުލައިމަހާ އަޅާ ބަލާއިރު 849.0 މިލިޔަން ރުފިޔާގެ އިތުރު އަދަދެއް ކަމަށް އެމްއެމްއޭގެ ރިވިއުގައި ބުނެފައިވެއެވެ.

އެމްއެމްއޭގެ ރިވިއުގައި ބުނެފައިވާ ގޮތުގައި ޖުލައި މަހު ސަރުކާރުގެ އާމްދަނީ އިތުރުވުމުގެ މައިގަނޑު ސަބަބަކީ ޓެކްސްގެ ގޮތުގައި ލިބުނު އާމްދަނީ އިތުރުވުމެވެ. އެގޮތުން ޓެކްސްގެ ގޮތުގައި ލިބުނު އާމްދަނީ މައިގަނޑު ގޮތެއްގައި އިތުރުވެފައި ވަނީ މުދަލާއި ހިދުމަތުގެ އަގުން ނަގާ ޓެކްސްއިންނާއި ފަތުރުވެރިކަމުގެ ދާއިރާގެ މުދަލާއި ހިދުމަތުގެ އަގުން ނަގާ ޓެކްސްއާއި ވިޔަފާރި ފައިދާއިން ނަގާ ޓެކްސް އިތުރުވުމުން ކަމަށް އެމްއެމްއޭގެ ރިވިއުގައި ބުނެފައިވެއެވެ.

މީގެއިތުރުން ޓެކްސް ނޫން ގޮތްގޮތުން ލިބުނު އާމްދަނީ ވެސް އިތުރުވެފައިވާ ކަމަށް އެމްއެމްއޭގެ ރިވިއުގައި ވަނީ ބުނެފައެވެ. އެގޮތުން މި މުއްދަތުގެ ތެރޭގައި ޓެކްސް ނޫން ގޮތްގޮތުން ލިބުނު އާމްދަނީ މައިގަނޑު ގޮތެއްގައި އިތުރުވެފައި ވަނީ ސަރުކާރު ހިއްސާވާ ކުންފުނިތަކުން ޑިވިޑެންސްގެ ގޮތުގައި ލިބުނު އާމްދަނީ އިތުރުވުމާ ގުޅިގެން ކަމަށް އެމްއެމްއޭގެ ރިވިއުގައި ވަނީ ބުނެފައެވެ.

ސަރުކާރުގެ ހަރަދަށް ބަލާއިރު ޖުލައި މަހު ސަރުކާރުގެ ޖުމްލަ ހަރަދަކީ 1.9 ބިލިޔަން ރުފިޔާއެވެ. މިއީ 2016 ވަނަ އަހަރުގެ ޖުލައި މަހާ އަޅާ ބަލާއިރު 518.6 މިލިޔަން ރުފިޔާގެ އިތުރު އަދަދެކެވެ.

އެމްއެމްއޭގެ ރިވިއުގައި ބުނެފައިވާ ގޮތުގައި ޖުލައި މަހު ސަރުކާރުގެ ހަރަދުތައް އިތުރުވެފައި ވަނީ ސަރުކާރުގެ ކެޕިޓަލް އަދި ރިކަރަންޓް ހަރަދުތައް އިތުރުވުމާ ގުޅިގެންނެވެ. ސަރުކާރުގެ ކެޕިޓަލް ހަރަދު އިތުރުވެފައި ވަނީ ޕަބްލިކް ސެކްޓާ އިންވެސްޓްމެންޓް މަޝްރޫޢުތަކަށް ކޮށްފައިވާ ހަރަދު އިތުރުވުމާ ގުޅިގެން ކަމަށެވެ. އަދި ރިކަރަންޓް ހަރަދު އިތުރުވުމުގެ މައިގަނޑު ސަބަބަކީ ސަރުކާރު ހިންގުމުގެ ހަރަދު އިތުރުވުން ކަމަށް އެމްއެމްއޭގެ ރިވިއުގައި ވަނީ ބުނެފައެވެ.