މިއަހަރު ތެރޭގައި މެޑިކަލް ވެއަރ ހައުސް އެއް އެޅުމުގެ މަސައްކަތް މިދަނީ ކުރަމުން: އެސްޓީއޯ
އެސްޓީއޯއިން މިހާރު ރާއްޖޭގައި 187 ފާމަސީއެއް ހިންގަމުންދޭ
އެސްޓީއޯ އިން ބޭއްވި ނޫސްވެރިންގެ ބައްދަލުވުން
ރާއްޖެއަށް ބޭނުންވާ ހުރިހާ ބޭހެއް ގެނެސް ރައްކާކޮށް ރަނގަޅުގޮތަށް ޕެކްކޮށް މުޅި ރާއްޖޭގެ ހުރިހާ ރަށަކަށް ޑިސްޓްރިބިޔުޓް ކުރެވޭނެ ވަރުގެ ވެއަރ ހައުސްއެއް މިއަހަރު ތެރޭގައި އަޅަން ރާވާފައިވާކަމަށް އެސްޓީއޯގެ މެނޭޖިންގ ޑިރެކްޓަރ ޙުސައިން ޢަމްރު ވިދާޅުވެއްޖެ އެވެ.
އެސްޓީއޯގެ ފާއިތުވި ތިން މަސްދުވަހުގެ މަޢުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި މިއަހަރުގެ ތެރޭގައި އެސްޓީއޯއިން ކުރުމަށް ރާވާފައިހުރި ކަންކަމާއި ގުޅޭގޮތުން މައުލޫމާތު ދެއްވަމުން އަމްރު ވިދާޅުވީ އެސްޓީއޯއިން މިހާރު ރާއްޖޭގައި 187 ފާމަސީއެއް ހިންގަމުންދާ ކަމަށެވެ. މުޅި ރާއްޖެއަށް ބޭނުންވާ ހުރިހާ ބޭހެއް އިމްޕޯޓްކޮށް އެބޭސްތައް ރަށްތަކަށް ފޯރުކޮށްދިނުމުގެ މަސައްކަތް އެސްޓީއޯއިން ކުރަމުން ގެންދާކަމަށް އަމްރު ވިދާޅުވި އެވެ.
އެހެންކަމުން ހުރިހާ ރަށަކަށް ބޭނުންވާ ބޭސް ބަރާބަރަށް ފޯރުކޮށްދީ ކޮންމެ ގަޑިއެއްގައިވެސް ކޮންމެ ރަށަކުންވެސް ބޭސް ހުސްނުވެ ލިބޭނެ ގޮތަށް ހުރުމަކީ އެސްޓީއޯގެ އަމާޒުކަމަށް އަމްރު ވިދާޅުވި އެވެ. އެހެންނަމަވެސް މިހާރު ވެއަރ ހައުސްގައި ޖާގަ ހުރި ގޮތުން ބޭސް އެތެރެކޮށް އެ ޕެކް ކޮށް ބެހުމަށް ވަގުތުނަގާ ކަމަށް އަމްރު ވިދާޅުވިއެވެ.
އަމްރު ވިދާޅުވީ އޮޓަމޭޝަން ޕްރޮސެސް ގެނެސްގެން މިކަން ކުރާނަމަ އެގެންނަތަނުން ޕެކްކޮށްގެން އެކަން ކުރިޔަށް ގެންދެވޭނެ ކަމަށެވެ.
