ކޮރޯނާ ވައިރަހާ ގުޅިގެން 2000 އަށްވުރެ ގިނަ ބުކިން ކެންސަލް ވެއްޖެ!
29 ޖެނުއަރީ 2020 | ބުދަ 09:39މިފަހުން 2083 ބުކިން ވަނީ ކެންސަލް ކޮށްފަ
ޓޫރިޒަމް މިނިސްޓްރީން މީގެކުރިން ބޭއްވި ނޫސްވެރިންގެ ބައްދަލުވުމެއްގެ ތެރެއިން
މިހާރު ދުނިޔޭގެ ސަމާލުކަން ހުންޓިފައިވާ، ނުރައްކާތެރި ކޮރޯނާ ވައިރަހާ ގުޅިގެން މިހާތަނަށް 2،000 އަށްވުރެ ގިނަ ބުކިންގ ކެންސަލް ވެފައިވާ ކަމަށް ޓޫރިޒަމް މިނިސްޓްރީން ބުނެފި އެވެ.
ކޮރޯނާ ވައިރަހާ ގުޅިގެން، ރާއްޖެ އިން ވަމުން އަންނަ ތައްޔާރީތަކާ ގުޅޭ މައުލޫމާތު ދިނުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޓޫރިޒަމް މިނިސްޓަރު އަލީ ވަހީދު ވިދާޅުވީ، ވައިރަހާ ގުޅިގެން މި ފަހުން 2،083 ބުކިން ކެންސަލް ކޮށްފައިވާ ކަމަށެވެ. އޭގެ ތެރެއިން 1،466 ޓޫރިސްޓުންނަކީ ޗައިނާ މީހުންނަށް ވާއިރު، އެ އަދަދު އަދިވެސް އިތުރުވުމަކީ އެކަށީގެންވާ ކަމެއް ކަމަށް އަލީ ވަހީދު ވިދާޅުވި އެވެ.
އަލީ ވަހީދު ވިދާޅުވީ، ކޮރޯނާ ވައިރަހާ ގުޅިގެން، ރާއްޖޭގެ ހާލަތު ރައްޔިތުންނަށް ހާމަ ކޮށްދެމުންދާނެ ކަމަށާއި ސަރުކާރުން އެއްވެސް ކަމެއް ސިއްރު ނުކުރާނެ ކަމަށެވެ.
އަލީ ވަހީދު ވިދާޅުވީ، ދުނިޔޭގެ ސިއްހަތު ޖަމިއްޔާގެ ލަފައާ އެއްގޮތަށް ރައްކާތެރިކަމުގެ ފިޔަވަޅުތައް އަޅާފައިވާ ކަމަށާއި ވައިރަހާ ގުޅިގެން ޓޫރިޒަމް ދާއިރާ އިން ކުރަންޖެހޭ މަސައްކަތްތަކަށް ވަކި ޓާސްކް ފޯހެއް އެކުލަވާލައި ހާލަތު ވަރަށް ގާތުން މޮނީޓާ ކުރަމުން އަންނަ ކަމަށެވެ.
އަލީ ވަހީދު ވިދާޅުވީ، ކޮރޯނާ ވައިރަހުގެ ސަބަބުން ރާއްޖޭގެ އިގުތިސާދަށް ކޮށްފާނެ އަސަރުތައް ދެނެގަނެ، އިކޮނޮމިކް ކައުންސިލާ ވެސް ހިއްސާ ކޮށްފައިވާ ކަމަށެވެ.
