އަންހެނުންނާއި ކުޑަކުދިންނަށް ކުރާ އަނިޔާގެ މައްސަލަތައް އިސްނަގައިގެން ބެލުމަށް ކައުންސިލްތަކަށް އިލްތިމާސްކޮށްފި
25 ޖެނުއަރީ 2020 | ހޮނިހިރު 09:10އެއްވެސް ފަރާތަކުން ނޭނގި ނަމަވެސް މައްސަލަ ބެލުމަށް ގޮވާލެއްވި
އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވާހަކަދައްކަވަނީ
އަންހެނުންނާއި ކުޑަކުދިންނަށް ކުރާ އަނިޔާގެ މައްސަލަތައް އިސްނަގައިގެން ބެލުމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ކައުންސިލްތަކަށް އިލްތިމާސްކޮށްފިއެވެ.
ރޮޒެއިނާ މިހެން ވިދާޅުވީ ސިޓީ ކައުންސިލްތަށް ދޭންޖެހޭ ރަށްވެހިކަމުގެ ޚިދުމަތްތަކުގެ ތެރޭގައި "ގޭތެރޭގައި ހިންގާ އަނިޔާތައް ހުއްޓުވާ ފިޔަވަޅު އެޅުމާއި އެފަދަ އަނިޔާތަކާއި ގުޅިގެން އަނިޔާ ލިބޭ ފަރާތްތަކަށް ހިމާޔަތާއި ރައްކާތެރިކަން ފޯރުކޮށްދިނުމާއި މުސްކުޅިންނާއި ޚާއްސައެހީއަށް ބޭނުންވާ މީހުންނަށް އެހީތެރިވެދީ އެފަދަ މީހުން ބެލެހެއްޓޭނެ ނިޒާމެއް ގާއިމު ކުރުން" މި ޕޮއިންޓަށް އިޝާރާތް ކުރައްވަމުންނެވެ.
ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ މެމްބަރުކަންވެސް ކުރައްވާ ރޮޒެއިނާ ވިދާޅުވީ އެކި ނޫސްތަކުންނާއި ސޯޝަލް މީޑިއާގައި ކުޑަކުދިންނާއި އަންހެނުންނާއި މުސްކުޅިންނަށް އަނިޔާ ކުރާ މައްސަކަތަކުގެ ޚަބަރުތައް ތަކުރާރުކޮށް ފެންނަ ކަމަށެވެ. އަދި މި ފަދަ ނޭދެވޭ އަމަލުތައް މުޖުތަމައުގައި ހިނގަމުންދާއިރު އެއްވެސް ފަރާތަކުން ރަސްމީ ގޮތެއްގައި ޝަކުވާ ހުށަނޭޅި ނަމަވެސް ކައުންސިލްތަކުން އިސްނަގައިގެން އެ ފަދަ މައްސަލަތައް ބަލާ، ކަމާބެހޭ ފަރާތްތަކާއި އެކު މަސައްކަތް ކުރުމަށް ރޮޒެއިނާ އިލްތިމާސްކުރެއްވިއެވެ.
އެމްޑީޕީ އައްޑޫ ސިޓީ ވަރކްޝޮޕްގައި ވާހަކަދައްކަވަމުން ރޮޒެއިނާ ވިދާޅުވީ ކައުންސިލްތަކުން އެފަދަ މައްސަލަތައް ބަލަންޖެހެނީ އެއީ އެންމެ ގާތުން ރަށުގެ ކަންކަން ބެލެހެއްޓުމުގެ ޒިންމާ އެޅިފައިވާ ފަރާތަށް ކަމަށްވާތީއެވެ. އަދި މެމްބަރު ވަނީ އެއްވެސް މުއައްސަސާއަކުން އެ ކައުންސިލަކަށް އެ ފަދަ މައްސަލައެއް ނޭންގި ނަމަވެސް ކައުންސިލްގެ އަމިއްލަ އިސްނެގުމުގެ މަތިން ރިސްކް އާއިލާތަކަކީ ކޮބާތޯ ބަލާ، ކުޑަކުދިންނަށް ވެސް ޚާއްސަ ރައްކާތެރިކަމެއް ދިނުމަށްޓަކައި ކައުންސިލުން އިސްނަގައިގެން ވަރަށް ރަނގަޅަށް މަސައްކަތް ކުރުމަށް އެދިލައްވާ ކަމަށް ރޮޒެއިނާ ވިދާޅުވިއެވެ.
ރޮޒެއިނާ ވިދާޅުވީ ރައްޔިތުންގެ މަޖިލީހުންވެސް އެފަދަ މައްސަލަތައް ހައްލު ކުރުމަށް ވަރަށް ގިނަ މަސައްކަތްތަކެއް ކުރަމުންދާކަމަށެވެ.
