އެމްޑީޕީ އައްޑޫ ސިޓީ ވަރކްޝޮޕް ފެށިގެން ކުރިއަށްދަނީ
ސެމިނަރ ކުރިއަށް ދަނީ އައްޑޫ ސީޓީ ހިތަދޫ ޝަރަފުއްދީން ސްކޫލްގައި
އެމްޑީޕީ އައްޑޫ ވަރކްޝޮޕް
ލޯކަލް ކައުންސިލް އިންތިހާބާއި ގުޅިގެން އެމްޑީޕީން ބާއްވާ އައްޑޫ ކައުންސިލް ވަރކްޝޮޕް ފަށައިފިއެވެ.
ހިތަދޫގެ ޝަރަފުއްދީން ސްކޫލްގައި ބާއްވާ މި ވަރކްޝޮޕް ފެށިގެންދިޔައީ "އިރުވައި ކޮންފަރެންސް"ގެ ވީޑިއޯ އަކުންނެވެ. އަދި މި ވަރކްޝޮޕް ފައްޓަވާ ދެއްވީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދެވެ.
އެމްޑީޕީން ބުނީ މިވަރކްޝޮޕްގެ ބައިވެރިންނަށް އެކި މައުލޫމާތުތައް ދިނުމަށް ހަމަޖެހިފައިވާކަމަށެވެ. އެގޮތުން އެންމެ ފުރަތަމަ މައުލޫމާތު ދެވޭނީ އިދާރީ ދާއިރާތައް ލާމަރުކަޒީ އުސޫލުން ހިންގުމާއި ގުޅޭ ގާނޫނަށް ގެނެވުނު އިސްލާހުތަކާއި އެ އިސްލާހުތައް ގެނެވިފައި އޮތް މިންވަރާއި ސިޓީތަކަށް އެ ގާނޫނުގެ ދަށުން ލިބިގެންދާ ބާރުތަކާއި ގުޅޭގޮތުނެވެ.
ދެވަނަ އަށް މައުލޫމާތު ދެވޭނީ މިއަހަރު ސަރުކާރުން އައްޑޫ ސިޓީގައި ހިންގުމަށް ހަމަޖެހިފައިވާ މަޝްރޫއުތަކާއި ގުޅިގެންނެވެ. އަދި މިއަހަރު އައްޑުސީޓީއަށް ލިބިފައިވާ ބަޖެޓާއި ގުޅޭގޮތުން މައުލޫމާތު ދިނުމަށްވެސް ހަމަޖެހިފައެވެ. ބަޖެޓާއި ގުޅިގެން މައުލޫމާތު ދެއްވާނީ ހުޅުދޫ ދާއިރާގެ މެމްބަރު އިލްޔާސް ލަބީބެވެ. މީގެއިތުރުން ލާމަރުކަޒީ ނިޒާމް އުލުބޭންދިގޮތުގެ އުދާސްތައް ނުވަތަ ލާމަރުކަޒީ ގާނޫނު ރޫޅާލުމަށް ރައީސް ޔާމީނާއި ޕީޕީއެމުން ކުރި މަސައްކަތްތަކާއި ގުޅިގެން ފޭދޫ ދާއިރާގެ މެމްބަރު މުހައްމަދު ނިހާދު މައުލޫމާތު ދިނުމަށް ވަނީ ހަމަޖެހިފައެވެ.
މެންދުރުފަހު ވަރކިން ސެޝަންއެއް ކުރިއަށް ދާނެއެވެ. މި ސެޝަން ކުރިއަށްދާނީ ގްރޫޕްތަކަށް ބަހާލެވިގެންނެވެ. އަދި ކޮންމެ ގްރޫޕަކުން ވެސް އައްޑޫ ސިޓީގައި ހިންގުމަށް ފެންނަ މަޝްރޫއުއެއްގެ ޚުލާސާއެއް އެކުލަވާލާނެ އެވެ.
ހޮނިހިރު ދުވަހުގެ ހެނދުނު 10:00 ގައި ފެށުނު މި ސެމިނަރ ނިމޭނެ ކަމަށް ލަފާ ކުރެވެނީ ހަވީރު 17:00 ގައެވެ.
ސަރުކާރު މައި ކޯލިޝަން އެމްޑީޕީން ހިންގާ މި ވޯކްޝޮޕްގައި މައިގަނޑު ގޮތެއްގައި މަޝްވަރާކުރާނީ ''އެޖެންޑާ 19 ރަށަށް'' ސްލޯގަންގެ ދަށުން ބުރާސްފަތި އަދި ހުކުރު ދުވަހު ރަށްރަށުގައި ހަރަކާތްތެރިވާ ޓީމުތަކުން ''ދޮރުން ދޮރަށް'' ގޮސް އެއްކުރާ މައުލޫމާތުތަކުގެ މައްޗަށެވެ.
