އިންޑިޔާ އިން ރާއްޖެއަށް 30،000 މީސްލްސް ވެކްސިން ހަދިޔާކޮށްފި
23 ޖެނުއަރީ 2020 | ބުރާސްފަތި 15:56މިނިސްޓަރ ވަނީ ވެކްސިންގެ ދެޑޯޒް ހަމަކުރެއްވުމަށް އެދިވަޑައިގަންފައި
މީސްލްސް ވެކްސިން ހަދިޔާކުރުން
ދިވެހިރާއްޖެއިން ހިމަބިހި ބަލި ފެނުމާއިގުޅިގެން އިތުރަށް މިބަލި ފެތުރުނަ ނުދިނުމަށް ސަރުކާރުން ކުރަމުން އަންނަ މަސައްކަތްތަކަށް އެހީތެރިވެދިނުމުގެ ގޮތުން އިންޑިއާ ސަރުކާރުން 30،000 މީސްލްސް ވެކްސިން ރާއްޖެއަށް ހަދިޔާކޮށްފި އެވެ.
މިކަމަށްޓަކައި ހެލްތު މިނިސްޓްރީގައި ބޭއްވި ރަސްމިއްޔާތުގައި އިންޑިއާ ސަރުކާރުގެ ފަރާތުން ވެކްސިން ހަވާލުކުރެއްވީ އިންޑިޔާއިން ރާއްޖެއަށް ކަނޑައަޅުއްވާފައިވާ ސަފީރު ސަންޖޭ ސުދީރެއެވެ. އަދި ރާއްޖޭގެ ފަރާތުން ވެކްސިންއާއި ހަވާލުވެވަޑައިގެންނެވީ ހެލްތު މިނިސްޓަރ އަބްދުﷲ އަމީން އެވެ.
މިރަސްމިއްޔާތުގައި ވާހަކަ ދައްކަވަމުން ހެލްތު މިނިސްޓަރ ވަނީ ކުރުމުއްދަތެއްގެ ތެރޭގައި ދިވެހި ސަރުކާރުން އެދުނު އެދުމަށް އިންޑިޔާގެ ފަރާތުން ލިބިގެންދިޔަ އެހީތެރިކަމަށްޓަކައި އިންޑިޔާ ސަރުކާރަށް ޝުކުރު އަދާކުރައްވާފައެވެ. އަދި މިފަދަ އެހީތެރިކަން ކުރުމުއްދަތެއްގައި ފޯރުކޮށްދެއްވުމަކީ، އިންޑިޔާއިން ރާއްޖެއާ އޮތް ގާތްގުޅުން ރަމްޒުކޮށްދޭ ކަމެއްކަން ފާހަގަކުރައްވާ، ޞިއްޙީ ދާއިރާއަށް އިންޑިޔާ ސަރުކާރުން ވެދޭ އެހީތެރިކަމަށް ޝުކުރު އަދާކުރެއްވިއެވެ.
މީގެއިތުރުން މިނިސްޓަރ ވަނީ މިހާރު ދުނިޔޭގައި ފެތުރެމުންދާ ހިމަބިއްސާއި ކޮރޯނާވައިރަސް އަށް ސަމާލުވުމަށް އިލްތިމާސްކުރައްވާފައެވެ. މީގެއިތުރުން ހިމަބިހީގެ ދެ ޑޯޒް ހަމަނުކުރާ ފަރާތްތައް އަދިވެސް ތިބިކަން ފާހަގަކުރައްވާ މިނިސްޓަރ ވަނީ ވެކްސިންގެ ދެޑޯޒް ހަމަކުރެއްވުމަށް އެދިވަޑައިގަންފަ އެވެ.
މާލޭގައި މިވަގުތު ވެކްސިން ޖެހުމަށް ދަމަނަވެށީގެ އިތުރުން ސޯޝަލް ސެންޓަރުގައިވެސް ވެކްސިން ދިނުމުގެ ކަންކަން ކުރިޔަށްދާނެ ކަމަށް މިނިސްޓަރ ވިދާޅުވި އެވެ. އިންޑިޔާއިން ވެކްސިން ލިބުމާއެކު ވެކްސިންގެ ކެމްޕެއިން މިފެށީކަމަށާއި އިތުރަށް ހޯދަންޖެހޭ ވެކްސިން ހޯދުމުގެ މަސައްކަތްވެސް ކުރަމުންދާ ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ އެއްވެސް ވަރަކަށް ދޫދުނިމުނެއް ނެތި ވެކްސިން ދިނުމުގެ ކަންކަން ކުރިޔަށް ގެންދަވާނެކަމަށެވެ.
މިރަސްމިއްޔާތުގައި ވާހަކަދައްކަވަމުން އިންޑިޔާ ސަފީރު ސަންޖޭ ސުދީރު ވިދާޅުވީ ރާއްޖެއަށް ބޭނުންޖެހޭ ކޮންމެ ކަމެއްގައި އިންޑިޔާއިން އެހީތެރިކަން ފޯރުކޮށްދެމުން ގެންދާނެ ކަމަށެވެ. މީގެއިތުރުން މިދިޔަ އަހަރުގެ ޖޫން މަހު އިންޑިޔާގެ ބޮޑުވަޒީރު ރާއްޖެއަށް ކުރެއްވި ޒިޔާރަތުގައި ޞިއްޙީ ދާއިރާ އާއި ގުޅޭގޮތުން ރާއްޖެއާއި އިންޑިޔާ އާއި ދެމެދު އެމްއޯޔޫއެއްގައި ސޮއިކޮށްފައިވާކަމަށް ސަފީރު ވިދާޅުވި އެވެ. މީގެއިތުރުން މިމަހުގެ ކުރީކޮޅުވެސް އިންޑިޔާގެ ޞިއްޙީ ދާއިރާގެ އިސް ފަރާތްތަކާއެކު ރާއްޖޭގެ ޞިއްޙީ ދާއިރާ ކުރިއެރުވުމަށް ދާއިރާތަކެއް ކަނޑައެޅި ކަންތައްތަކެއް ކުރުމަށް ނިންމާފައިވާކަމަށް ސަފީރު ވިދާޅުވި އެވެ.
ރާއްޖެއަށް ވެކްސިން ގެނެސްފައިވަނީ އިންޑިއާގެ ޕޫނާގައި ހުންނަ ސީރަމް އިންސްޓްޓިއުޓުންނެވެ. މިއީ ދުނިޔޭގެ ޞިއްޙަތު ޖަމްޢިއްޔާ އަދި ޔުނިސެފަށް ވެސް ވެކްސިން ފޯރުކޮށްދޭ އިންސްޓިޓިއުޓެވެ.
އިންޑިއާއިން 30،000 ވެކްސިން ޑޯޒް ރާއްޖެއަށް ހަދިޔާކޮށްފައިވާ އިރު، ހެލްތު މިނިސްޓްރީން މިހާރު އަންނަނީ ޔުނިސެފާއި ޑަބްލިއުއެޗްއޯއާ ގުޅިގެން 200،000 ވެކްސިން ޑޯޒް ރާއްޖެއަށް ގެނައުމަށް މަސައްކަތް ކުރަމުންނެވެ.
