ޖަޒީރާ ޗެމްޕިއަންޝިޕްގެ ބުރެއް ކެންސަލް ނުކުރަން: ޖަވާ
22 ޖެނުއަރީ 2020 | ބުދަ 16:35ރަށު ލެވެލްގައި ކުޅުމަށް ހަމަޖެހުނު މުބާރާތް ކުޅެން ބޭނުންވީ އަށް ޓީމަކުން
ފުޓުބޯޅަ އެސޯސިއޭޝަން އޮފް މޯލްޑިވްސް
އަތޮޅުތަކަށް ހާއްސަކޮށްގެން ބާއްވަން ނިންމި ޖަޒީރާ ޗެމްޕިއަންޝިޕްގެ ފުރަތަމަ ބުރު ނުބާއްވަން ނިންމި ކަމަށް ބުނާ ވާހަކަ ފުޓުބޯޅަ އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ދޮގުކޮށްފިއެވެ.
މިނިވަން ޗެމްޕިއަންޝިޕްގެ ނަމުގައި ކުރިން ބާއްވަމުންއައި މި މުބާރާތް ޖަޒީރާ ޗެމްޕިއަންޝިޕަށް ބަދަލުކުރިކަން އިއުލާން ކުރީ މިދިޔަ ސެޕްޓެމްބަރު މަހު ޔޫތް މިނިސްޓްރީގައި ބޭއްވި ބައްދަލުވުމެއްގައި ކުޅިވަރާއި ބެހޭ ވަޒީރު އަހުމަދު މަހުލޫފާއި އެފްއޭއެމްގެ ރައީސް ބައްސާމް އަދީލް ޖަލީލް އެވެ.
އެފްއޭއެމްގެ ޖެނެރެލް ސެކްރެޓަރީ ޖަވާ ވިދާޅުވީ މި މުބާރާތް ފެށުމުގެ ކުރިން ރަށު ކައުންސިލްތަކުން އިންތިޒާމް ކޮށްގެން ރަށު ލެވަލްއެއްގައި މުބާރާތެއް ބާއްވާ ގޮތައް ނިންމީ ކުޅިވަރާއި ބެހޭ ވަޒީރު އަހުމަދު މަހުލޫފް އެކަމަށް އެދުމުން ކަމަށާއި ނަމަވެސް މި މުބާރާތުގައި ބައިވެރިވާން ހުށަހެޅި 87 ޓީމުގެ ތެރެއިން ރަށު ފެންވަރުގައި ބުރު ކުޅެން ބޭނުންވާ ތިބީ އަށް ޓީމެއް ކަމަށާއި އެހެން ކަމުން އެއީ ވަރަށް މަދު އަދަދެއް ކަމަށެވެ.
އޭނާ ވިދާޅުވީ އެހެން ކަމުން މި މުބާރާތް މިނިވަން ޗެމްޕިއަންޝިޕް ކުޅުނު އުސޫލަށް ބަދަލުކޮށްފައިވާ ކަމަށެވެ.
މި މުބާރާތް ކުރިން ރޭވިފައި އޮތް ގޮތުންނަމަ މުބާރާތުގެ ފުރަތަމަ ބުރުގައި ކޮންމެ ރަށެއްގެ ކައުންސިލުން ރަށު ފެންވަރުގެ މުބާރާތެއް ބާއްވާނެއެވެ. އަދި މައި މުބާރާތުގައި އަތޮޅު ފެންވަރުގައި ތަމްސީލުކުރާނީ ރަށު މުބާރާތުގެ ޗެމްޕިއަން ޓީމެވެ. އަދި މި މުބާރާތުގެ ޗެމްޕިއަން ވާދަކުރާނީ ޒޯން މުބާރާތުގައެވެ.
އެފްއޭއެމްއިން މި މަހު ނުވަވަނަ ދުވަހު ރަށްތަކަށް ފޮނުވި ސިޓީއެއްގައި ބުނެފައިވަނީ ރަށު ކައުންސިލްތަކުން ކުރިޔަށްގެންދާ މުބާރާތުގައި ބައިވެރިވުމަށް ހުށަހަޅައިފައިވަނީ މަދު ރަށަކުން ކަމަށާއި އެހެންކަމުން އެބުރު ނުބާއްވާ ގޮތައް ނިންމައިފައިވާ ކަމަށެވެ. އަދި އެ ރަށަކުން ބައިވެރިކުރާނެ ޓީމެއް ކަނޑައަޅާ ކައުންސިލްތަކުން ގޮތެއް ނިންމުމަށް ވަނީ އަންގައިފައެވެ.
އެފްއޭއެމް އިން ބުނީ މި މުބާރާތުގައި މިހާރު ކުރަންހުރި ކަންކަން ނިންމައި މި މުބާރާތް އަންނަ ފެބްރުއަރީ މަހު 25 ވަނަ ދުވަހު ފެށޭނެ ވަރު ވާނެ ކަމަށެވެ.
