އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރުން ދަށު ކޯޓުތަކަށް ޒިޔާރަތްކުރައްވައިފި

ދިވެހިރާއްޖޭގެ އުއްތަމަ ފަނޑިޔާރު މުޢުތަޞިމް ޢަދުނާނުއާއި ސުޕްރީމް ކޯޓުގެ ފަނޑިޔާރުން ދަށު ކޯޓުތަކަށް ޒިޔާރަތް ކުރައްވައިފިއެވެ.

ސުޕްރީމް ކޯޓުން ބުނީ، މި ޒިޔާރަތުގައި ކޯޓުތަކުގެ މަސައްކަތްތައް ކުރިއަށްދާ ގޮތް ބެއްލެވުމާއި، މަސައްކަތް ކުރުމުގައި ދިމާވާ ދަތިތަކާ ގުޅޭގޮތުން މަޝްވަރާ ކުރައްވާފައިވާ ކަމަށެވެ. އަދި ސުޕީރިއަރ ކޯޓުތަކަށް ދިމާވާ ދަތިތައް އުއްތަމަ ފަނޑިޔާރާ ހިއްސާ ކުރައްވައި ކޯޓުތަކުގެ ހިންގުން ހަރުދަނާކުރެވޭނެ ގޮތްތަކާ ގުޅިގެން ކޯޓުތަކުގެ ފަނޑިޔާރުންނާއި އިސްވެރިންނާ މަޝްވަރާކޮށް ޚިޔާލުފާޅު ކުރަައްވާފައިވާ ކަމަށެވެ.

އޭގެއިތުރުން، ކޯޓުތަކުގެ މަސައްކަތްތައް ހަލުވިކަމާއެކު ކުރިއަށް ގެންދިއުމާ ގުޅޭ ގޮތުން ކޯޓުތަކުގެ ފަނޑިޔާރުންނާއި، އިސް ވެރިންނާއި ވަނީ މަޝްވަރާ ކުރައްވާފައެވެ.

މި ބައްދަލު ކުރެއްވުމުގައި ސުޕްރީމް ކޯޓުގެ ފަނޑިޔާރު ޑޮކްޓަރ އަޒްމިރާލްދާ ޒާހިރު އާއި، ފަނޑިޔާރު ޢާއިޝާ ޝުޖޫން މުޙައްމަދު އާއި، ފަނޑިޔާރު މަޙާޒް ޢަލީ ޒާހިރުގެ އިތުރުން ޙުސްނުއްސުޢޫދުވެސް ވަނީ ސުޕީރިއަރ ކޯޓުތަކަށް ޒިޔާރަތް ކުރައްވާފައެވެ.