ގއ. އަތޮޅު ކައުންސިލުން އެ އިދާރާގެ މާލީ ހިސާބުތައް ބަރާބަރަށް ބަލަހައްޓާފައި ނުވާކަން އެ އިދާރާގެ އޮޑިޓް ރިޕޯޓުން ހާމަވެއްޖެއެވެ.

އޮޑިޓަރ ޖެނެރަލްގެ އޮފީހުން ނެރުނު ހުވަދުއަތޮޅު އުތުރުބުރީ އަތޮޅު ކައުންސިލް އިދާރާގެ 2018 ވަނަ އަހަރުގެ މާލީ އޮޑިޓް ރިޕޯޓުގައި ބުނެފައިވަނީ އެ ކައުންސިލްގެ ބަޖެޓު ބާކީގެ ގޮތުގައި ކައުންސިލްގެ އިދާރާއަށް ދޫކޮށްފައިވާ ފައިސާއަކީ، އެކިއެކި ކޯޑު ތަކުގައި އަހަރުގެ ނިޔަލަށް ހުރި ބާކީކަން ކަށަވަރު ނުކުރެވުމާއި މި މުޢާމަލާތުގެ ތަފުޞީލު މާލީ ބަޔާނުގައި ހިމަނާފައި ނުވާ ކަމަށެވެ.

އެގޮތުން މިނިސްޓްރީ އޮފް ފިނޭންސް އިން ކައުންސިލް އިދާރާގެ ބަޖެޓް ބާކީގެ ގޮތުގައި 1،387،561 (އެއް މިލިއަން ތިން ލައްކަ އަށްޑިހަ ހަތް ހާސް ފައްސަތޭކަ ފަސްދޮޅަސް އެކެއް) ރުފިޔާ 31 ޑިސެމްބަރ 2018 ގައި ކައުންސިލްގެ އިދާރާގެ ޖީއެލް އަށް ޕޯސްޓް ކޮށްދީފައިވާއިރު، މިފައިސާއަކީ 2018 ވަނަ އަހަރުގެ ބަޖެޓް ބާކީގެ ތެރެއިން ކޮންކޮން ކޯޑުތަކެއްގެ ބާކީކަން އެނގޭނެ ފަދަ ގޮތަކަށް ތަފުޞީލު ކައުންސިލްގެ އިދާރާއިން ފޯރުކޮށްދީފައި ނުވެއެވެ.

އަދި ކައުންސިލްގެ އިދާރާގެ ޖީއެލް އިން ފައިސާ އުނިކުރެވުނީ ކޮން ކޯޑުތަކަކުން ކަން އޮޑިޓަރުންނަށް ސާފުކޮށްދެވިފައި ނުވާތީ، މި ފައިސާ އަކީ ކައުންސިލްގެ އިދާރާގެ އަހަރުގެ ނިޔަލަށް ހުރި ބަޖެޓް ބާކީ ކަން ޔަޤީން ނުކުރެވުނުކަމަށާއި، އަދި މި ފައިސާ ކައުންސިލްގެ އިދާރާގެ މާލީ ބަޔާނުގައި ހިމަނާފައި ނުވާކަން އޮޑިޓް ރިޕޯޓުގައި ފާހަގަކޮށްފައިވެއެވެ.

މީގެއިތުރުން މި ޢަދަދު ގެނެސްފައިވާ ގޮތުގެ ތަފުޞީލް ހޯދުމަށް މިނިސްޓްރީ އޮފް ފިނޭނޭސްގައި އެދިފައި ވީނަމަވެސް، 19 ޑިސެމްބަރ 2019 ގެ ނިޔަލަށްވެސް މި އެންޓްރީގެ ތަފުޞީލް އޮޑިޓަރ ޖެނެރަލްގެ އޮފީހަށް ފޯރުކޮށް ދީފައި ނުވެއެވެ.

މިގޮތުން މި ފައިސާ މާލީ ބަޔާނުގައި ހިމަނާފައި ނުވާތީ، ސުވާލު ކުރުމުން ކައުންސިލްގެ އިދާރާއިން މަޢުލޫމާތު ދީފައިވަނީ މިފައިސާ މިނިސްޓްރީ އޮފް ފިނޭންސް އިން 31 ޑިސެމްބަރ 2018 ގެ ތާރީޚުގައި ޖީއެލް އަށް ޕޯސްޓް ކޮށްފައިވީ ނަމަވެސް، ކައުންސިލްގެ އިދާރާގެ ބޭންކް އެކައުންޓަށް ޖަމާވެފައިވަނީ 28 މާރޗް 2019 ގައި ކަމަށާއި، ކައުންސިލުން މާލީ ބަޔާން ތައްޔާރުކޮށް ހުށަހަޅަންޖެހެނީ 31 މާރޗް 2019 ކަމަށްވެފަ،އި މި މުޢާމަލާތުގެ މަޢުލޫމާތު ހިމެނޭ ސަރކިއުލަރ 12 މެއި 2019 ގައި އެލްޖީއޭ އަށް ފޮނުވުމުން، އެލްޖީއޭ އިން ކައުންސިލްގެ އިދާރާތަކަށް ފޮނުވާފައިވަނީ 14 މޭއި 2019 ގައިކަން އޮޑިޓް ރިޕޯޓުގައި ފާހަގަކޮށްފައިވެއެވެ.

އަދި މާލީ ބަޔާން ތައްޔާރު ކުރުމަށްފަހު އޮޑިޓް ކުރުމަށްޓަކައި ހުށަހަޅަންޖެހޭ ތާރީޚު ކަމުގައިވާ 31 މާރޗް 2019 ގެ 3 ދުވަސް ކުރިން މަޢުލޫމާތު ލިބިފައިވާތީ އާއި އަދި ބަޖެޓް ބާކީ ފޮނުވިއިރު އުނި ކޮށްފައިވަނީ ޖީއެލްގެ ކޮން ކޯޑުތަކެއްކަން އެނގޭނޭ ގޮތަށް މިނިސްޓްރީ އޮފް ފިނޭންސް އިން ފޮނުވާފައި ނުވާތީ، މާލީ ބަޔާނުގައި ނުހިމެނު ކަމަށް ބުނެފައިވެއެވެ.

މިކަން އިޞްލާޙުކުރަން އޮޑިޓް އޮފީހުން ލަފާ ދީފައިވަނީ ފިނޭންސް މިނިސްޓްރީ އާއި މަޝްވަރާ ކުރުމަށްފަހު މި ފައިސާ އަކީ ބަޖެޓް ބާކީ ކަމުގައިވާނަމަ، ފައިސާ އުނިކުރެވުނީ ކައުންސިލްގެ އިދާރާގެ ޖީއެލްގެ ކޮން ކޯޑުތަކަކުންތޯ ބެލެމަށްފަހު މާލީ ހިސާބުތައް ރަނގަޅު ކުރުމަށެވެ.

އަދި ކުރިއަށް އޮތްތަނުގައި މާލީ ބަޔާން އިންޓަރނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަޑް (އިޕްސަސް): ފައިނޭންޝަލް ރިޕޯޓިންގ އަންޑަރ ދަ ކޭޝް ބޭސިސް އޮފް އެކައުންޓިންގ" އާއި އެއްގޮތަށް ތައްޔާރު ކުރުމަށް ވެސް ވަނީ އަންގާފައެވެ.