ދިމާވާ އެންމެ ބޮޑު ގޮންޖެހުމަކީ ޖާގައިގެ ދަތިކަން: އެމްޕީއެލް
20 ޖެނުއަރީ 2020 | ހޯމަ 18:09ކުޑަ ޖާގައެއްގައި މަސައްކަތް ކުރަން ޖެހުމުން ވަރަށް ހައި ރިސްކެއް: ޒާހިރު
އެމްޕީއެލްގެ ޗީފް ރިސްކް އޮފިސަރ އިބްރާހިމް ޒާހިރު
މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ދިމާވާ އެންމެ ބޮޑު ގޮންޖެހުމަކީ ޖާގައިގެ ދަތިކަން ކަމަށް އެކުންފުނީގެ ޗީފް ރިސްކް އޮފިސަރ އިބްރާހިމް ޒާހިރު ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ގައި ވާހަކަ ދައްކަވަމުން ޒާހިރު ވިދާޅުވީ މާލެ ވިޔަފާރި ބަނދަރަކީ ވަރަށް ކުރިން ފެށިގެންވެސް ބޭނުންކުރާ ބަނދަރެއް ކަމަށާއި އެންމެ ބޮޑު ގޮންޖެހުމަކަށް ވަނީ ޖާގައިގެ ދަތިކަން ކަމަށެވެ. އަދި އެހާ ކުޑަ ޖާގައެއްގައި މަސައްކަތް ކުރަން ޖެހުމުން ވަރަށް ހައި ރިސްކެއް އޮންނަކަން އޭނާ ވަނީ ފާހަގަ ކުރައްވާފައެވެ.
ޒާހިރު ވިދާޅުވީ ބަނދަރު ރީލޮކޭޓް ވެގެންދާއިރު މި ކަމަށް ހައްލެއް ލިބޭނެކަމަށް އުއްމީދުކުރައްވާ ކަމަށެވެ.
މާލޭ ވިޔަފާރި ބަނދަރުގައި ކުރަމުންދަނީ ވަރަށް ނުރައްކާތެރި ވަރަށް ރިސްކީ މަސައްކަތްތަކެއް ކަމުން، އެމްޕީއެލްއިން އެންމެ އިސްކަމެއް ދެނީ މުވައްޒަފުންނާއި މަސައްކަތް ކުރަން ބަނދަރަށް އަންނަ މީހުންގެ ސަލާމަތާއި ރައްކާތެރިކަން ކަށަވަރުކުރުން ކަމަށެވެ.
މާޒީގައިވެސް ހިތާމަވެރި ހާދިސާތައް ދިމާވެފައިވާކަން ފާހަގަ ކުރައްވާ ޒާހިރު ވިދާޅުވީ އެމްޕީއެލްގެ ސީއޯ އަދި ޓޮޕް މެނޭޖްމަންޓުންވެސް އެފަދަ ހިތާމަވެރި ހަދިސާތަކެއް ކުރިއަށް އޮތްތަނުގައިވެސް ހިނގިޔަ ނުދިނުމަށްޓަކައި ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން މަސައްކަތްތައް ކުރަމުންދާ ކަމަށެވެ.
މިދިޔަ ޑިސެންބަރު މަހުގެ ތެރޭގައި ސޭޕްޓީ ކެމްޕޭނެއް ފަށާފައިވާ ކަން އޭނާ ވަނީ ފާހަގަކުރައްވާފައެވެ. މި ސޭފްޓީ ވީކުގެ ތެރެއިން މުވައްޒަފުންނަށް ޓްރެއިންނިންގ ދެވި، ބޭނުންވާ ބައެއް އާލާތްތައް ފޯރުކޮށްދެވިފައިވެއެވެ.
