އިލެކްޝަންސް ކޮމިޝަނުގެ މެންބަރުކަމަށް ކުރިމަތިލުމުގެ ފުރުޞަތު ހުޅުވާލައިފި
20 ޖެނުއަރީ 2020 | ހޯމަ 08:26މެމްބަރު ކަމަށް ކުރިމަތިލުމަށް ފުުރުސަތު ހުޅުވާލާފައިވަނީ 27 ޖަނަވަރީގެ ނިޔަލަށް
އިލެކްޝަންސް ކޮމިޝަންގެ ރައީސް އާއި ނައިބު ރައީސްގެ އިތުރުން ބައެއް މެމްބަރުން
އިލެކްޝަންސް ކޮމިޝަނުގެ މެންބަރުކަމަށް ކުރިމަތިލުމަށް ބޭނުންފުޅުވާ ފަރާތްތަކަށް އެ ފުރުޞަތު ސަރުކާރުން ހުޅުވާލައިފިއެވެ.
ރައީސުލްޖުމްހޫރިއްޔާގެ އޮފީހުން މި ފުރުޞަތު ހުޅުވާލީ، އެކޮމިޝަނުގައި މިހާރު ހުންނަވާ މެންބަރެއްގެ، މެންބަރުގެ މުއްދަތު އަންނަ މާރޗު މަހުގެ 23 ވަނަ ދުވަހަށް ހަމަވާތީއެވެ. މެންބަރުކަމަށް ކުރިމަތިލުމުގެ ފުރުޞަތު ޖެނުއަރީ މަހުގެ 20 ވަނަ ދުވަހުން ފެށިގެން 27 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.
އިލެކްޝަންސް ކޮމިޝަނުގެ މެންބަރުކަމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ރިސެޕްޝަނުންނާއި، ރައީސުލްޖުމްހޫރިއްޔާގެ އޮފީހުގެ ވެބްސައިޓްhttps://presidency.gov.mvއިން ޑައުންލޯޑް ކުރެވޭނެ އިންތިޒާމުވެސް ވަނީ ހަމަޖައްސާފައެވެ.
އީސީގެ މެންބަރު ކަމަށް ހުޅުވާލާފައިވާއިރު އަންނަ އެޕްރީލް މަހު ބާއްވާ ލޯކަލް ކައުންސިލް އިންތިޚާބަށް އިލެކްޝަންސް ކޮމިޝަނުން ދަނީ ތައްޔާރުވަމުންނެވެ.
