ގއ. އަތޮޅު ކައުންސިލަރުން ސަލާމާއި އާއިލީ ޒިންމާއަށް ފޯމް ހުށަނާޅާ މުސާރައާ އިނާޔަތް ނަގާފައިވޭ: އޮޑިޓް

ގއ. އަތޮޅު ކައުންސިލަރުން ސަލާމާއި، ޢާއިލީ ޒިންމާގެ ޗުއްޓީގައި ހުރި ސަބަބު ބަޔާންކުރާ ފޯމު ހުށައަޅާފައިނުވާ ދުވަސްތަކަށް މުސާރައާއި އެލަވަންސް ނަގާފައިވާކަން އަތޮޅު ކައުންސިލްގެ އޮޑިޓް ރިޕޯޓުން ހާމަވެއްޖެއެވެ.

މިކަން ހާމަވެފައިވަނީ އޮޑިޓަރ ޖެނެރަލް އޮފީހުން ޢާންމު ކުރި ގއ. އަތޮޅު ކައުންސިލްގެ 2018 ވަނަ އަހަރުގެ އޮޑިޓް ރިޕޯޓުންނެވެ. މި ރިޕޯޓުގައި ބުނެފައިވަނީ ކައުންސިލަރުންގެ ޗުއްޓީގެ އުޞޫލުގައި ކައުންސިލަރަކު މެޑިކަލް ލިޔުން ހުށަހަޅަންނުޖެހޭ ގޮތަށް ސަލާމުގެ ޗުއްޓީގައި ނުވަތަ ޢާއިލީ ޒިންމާގެ ޗުއްޓީގައި ހުރުމަށްފަހު، މަސައްކަތަށް ނިކުމެ އެ ކައުންސިލަރު ސަލާމުގެ ޗުއްޓީގައި ހުރި ސަބަބު ބަޔާންކޮށް "ސަލާމުގެ އާޢިލީ ޒިންމާގެ ޗުއްޓީގައި ހުރި ސަބަބު ބަޔާންކުރާ ފޯމް" ހުށަހަޅަންވާނެ ކަމަށެވެ.

އަދި ކައުންސިލަރުންގެ މުސާރަ ހިސާބުކުރާ ދުވަހާއި ހަމައަށް ސަލާމުގެ ޢާއިލީ ޒިންމާގެ ޗުއްޓީގައި ހުރި ސަބަބު ބަޔާންކުރާ ފޯމު ހުށަހަޅާފައިނުވާނަމަ އެދުވަހަކީ ޣައިރު ޙާޟިރީއެއް ކަމަށް ބަލައި، މުސާރަ ހިސާބުކުރުމަށް ބަޔާންކޮށްފައި ވާނެ ކަމަށެވެ.

ނަމަވެސް، ކައުންސިލަރުން ނަންގަވާފައިވާ ބައެއް ސަލާމްތަކަށް ފޯމު ހުށައަޅުއްވާފައި ނުވިނަމަވެސް، މުސާރައާއި އިނާޔަތް އުނިކޮށްފައި ނުވާކަމަށް ފާހަގަ ކުރެވިފައިވާކަމަށް އޮޑިޓް ރިޕޯޓުގައި ބުނެފައިވެއެވެ. އެގޮތުން 2018 ވަނަ އަހަރުގެ ތެރޭގައި ކައުންސިލަރުން ސަލާމުގެ ޗުއްޓީ ނުވަތަ ޢާއިލީ ޒިންމާ ޗުއްޓީގެ ފޯމު ހުށަހަޅާފައި ނުވާ ދުވަސްތަކަށް 41,066 (ސާޅީސް އެއް ހާސް ފަސްދޮޅަސް ހައެއް) ރުފިޔާ ދީފައިވާކަން ފާހަގަ ކުރެވިފައިވާ ކަމަށް އޮޑިޓް ރިޕޯޓުން ހާމަވެއެވެ.

އޮޑިޓަރ ޖެނެރަލް އޮފީހުން ވަނީ ދައުލަތުގެ މާލިއްޔަތުގެ ޤާވާއިދުގެ 7.14 ވަނަ މާއްދާގެ (ހ) ގައި ބަޔާން ކޮށްފައިވާގޮތަށް މުސާރައާއި، އެކިއެކި އެލަވަންސާއި، އިތުރުގަޑީގެ ފައިސާއާއި، މިނޫންވެސް މުވައްޒަފުންނަށް ދޭންޖެހޭ އެއްވެސް ފައިސާއެއް ދިނުމުގައި ދޭންޖެހޭވަރަށް ވުރެ އިތުރަށް ފައިސާ ދެވިއްޖެނަމަ، އިތުރަށް ދެވިފައިވާ ފައިސާ އަނބުރާ ހޯދައި ދައުލަތުގެ މާލިއްޔާއަށް ޖަމާކުރުމަށެވެ.