ހއ. ބާރަށު އައު ކޯޓު އިމާރާތުގެ ބިންގާ އަޅައިފި

ހއ. ބާރަށުގައި އަލަށް ޢިމާރަތްކުރާ ކޯޓު އިމާރާތުގެ ބިންގާ އަޅައިފިއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ބުނީ، ހޮނިހިރު ދުވަހު ހއ. ބާރަށުގައި އޮތް ރަސްމިއްޔާތެއްގައި އައު ކޯޓު ޢިމާރާތުގެ ބިންގާ އަޅުއްވައި ދެއްވީ ޖުޑީޝަލް އެޑްމިނިސްޓްރޭޓަރ ޑރ. ޢަބްދުﷲ ނަޒީރު ކަމަށެވެ.

އެގޮތުން މި ދަތުރުފުޅަކީ ޖުޑީޝަލް އެޑްމިނިސްޓްރޭޓަރ ޑރ. ޢަބްދުﷲ ނަޒީރާއި ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ އިސްވެރިން ހއ. އަތޮޅުގެ ހުރިހައި ރަށެއްގެ ކޯޓުތަކަކަށް ކުރައްވަމުން ގެންދަވާ ދަތުރުފުޅެއްކަމަށްވެސް ޑީޖޭއޭއިން ބުނެއެވެ.

ޑީޖޭއޭއިން އިތުރަށް ބުނީ، މި ދަތުރުފުޅުގައި ހއ. ހޯރަފުށީގެ އައު ކޯޓު ޢިމާރާތުގެ ބިންގާ އަޅުއްވައި ދެއްވުމަށްވެސް ހަމަޖެހިފައިވާ ކަމަށެވެ.

އޭގެ އިތުރުން، ހއ. އަތޮޅު ކޯޓުތަކުގެ ޙާލަތު ބައްލަވާލެއްވުމާއި، ކޯޓުތަކުގެ އިދާރީ ހިންގުން ހަރުދަނާ ކުރުމަށް ކުރެވެން ހުރި ކަންތައްތައް ދެނެގަތުމަށް ހއ. އަތޮޅުގެ ހުރިހައި ކޯޓުތަކަކަށް ވަޑައިގަތުމަށްވެސް ހަމަޖެހިފައިވާކަމަށް ޑީޖޭއޭއިން ބުނެއެވެ.