ދެ ރައީސުންގެ ދެމެދަށް ވަންނަ މީހުން ތިބީ ސަރުކާރުގައި: އާދަމް ޝަރީފް
16 ޖެނުއަރީ 2020 | ބުރާސްފަތި 16:31''ޑްރާމާ'' ބެލުމަށް ވުރެ، ކައުންސިލް އިންތިހާބު ޕީޕީއެމް އަށް މުހިއްމު: އާދަމް ޝަރީފް
ރައީސް ނަޝީދުއާ ރައީސް ސޯލިހު
ރައީސް އިބްރާހިމް މުހައްމަދު ސޯލިހުއާ ރައީސް މުހައްމަދު ނަޝީދާ، ދެބޭފުޅުންގެ ދޭތެރެއަށް ވަންނަން އުޅޭ މީހުން ތިބީ ސަރުކާރުގެ ތެރޭގައި ކަމަށް ވިދާޅުވެ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ރައްދު ދެއްވައިފިއެވެ.
އިދިކޮޅު ޕީއެންސީގެ ނައިބް ރައީސް އާދަމް ޝަރީފް އެހެން ވިދާޅުވެފައިމިވަނީ އެމްޑީޕީން ތިލަދުން މައްޗަށް ކުރި ދަތުރުގައި ރައީސް ނަޝީދު ދެއްކެވި ވާހަކަތަކާއި ގުޅިގެންނެވެ. އެ ދަތުރުގައި ރައީސް ނަަޝީދު ތަކުރާރުކޮށް ވިދާޅުވަމުން ގެންދެވީ އިދިކޮޅުން އެމަނިކުފާނާ ރައީސް ސޯލިހުއާ ދެ ބޭފުޅުންގެ ދެމެދަށް ވަންނަން މަސައްކަތް ކުރަމުންދާ ކަމަށެވެ. ކިތަންމެ މަސައްކަތެއް ކުރެއްވިޔަސް ދެ ބޭފުޅުން ދުުރުކޮށްނުލެވޭނެ ކަމަށް ނަޝީދު ވަނީ ވިދާޅުވެފައެވެ.
ނަޝީދުގެ އެ ވާހަކަތައް ލިޔެފައިވާ އާޓިކަލްއެއް ޓްވިޓާގައި ހިއްސާ ކުރައްވާ އާދަމް ޝަރީފް ކުރެއްވި ޓްވީޓެއްގައި ވިދާޅުވީ، ދެ ބޭފުޅުންގެ ދޭތެރެއަށް ޕީޕީއެމް/ޕީއެންސީން ވަންނަން ނުޖެހޭނެ ކަމަށެވެ. އަދި އެކަން ކުރާ މީހުން ތިބީ ސަރުކާރުގައިކަން ވެސް އެނގޭ ކަމަށް އޭނާ ވިދާޅުވިއެވެ.
އާދަމް ޝަރީފް ވިދާޅުވީ، ދެ ރައީސުންގެ ''ޑްރާމާ'' ބެއްލުމަށްވުރެ ލޯކަލް ކައުންސިލް އިންތިހާބަށް ސަރުކާރުން ފޯރުވާ ނުފޫޒު ކުޑަވާނެ ގޮތަކަށް، މަލްޓި ޕާޓި ޑިމްކްރަސީގެ ރޫހާ އެއްގޮތަށް، ކައުންސިލް އިންތިހާބު ކާމިޔާބު ކުރުން ޕީޕީއެމް/ޕީއެންސީ އަށް މާ މުހިއްމު ކަމަށެވެ.
އެމްޑީޕީން ތިލަދުން މައްޗަށް ކުރެއްވި ދަތުރުގައި ރައީސް ސޯލިހުއާ ރައީސް ނަޝީދު ގެންދަވަނީ، ޕީޕީއެމް/ޕީއެންސީން ކައުންސިލް އިންތިހާބު ބޭނުންވެގެން އުޅޭ ސަބަބެއް ނޭގެ ކަމަށް ވިދާޅުވަމުންނެވެ. އަދި އިދިކޮޅުން އިންތިހާބުގައި ވާދަނުކުރުން މާ ރަނގަޅުވާނެ ކަމަށް މަޖިލީހުގެ ރައީސް ނަޝީދު ވަނީ ގޮވާލައްވާފައެވެ.
އެ ވާހަކަތަކަށް ރައްދު ދެއްވައި ކުރީގެ ޑިފެންސް މިނިސްޓަރުކަން ވެސް ކުރައްވާފައިވާ އާދަމް ޝަރީފް ވިދާޅުވީ، އިދިކޮޅުން ކައުންސިލް ކާމިޔާބުކުރަން މަސައްކަތް ކުރަނީ، ''ސެކިއުލަރިޒަމް'' ރަށްރަށުގައި ފެތުރުމަށް ހުޅުވަމުންދާ ދޮރުތައް ބަންދު ކުރުމަށާއި، ބާރުތައް މުޝުތެރެއަށް ލިޔަ ނުދުނިމަށާއި، ސަރުކާރު ޒިންމާދާރު ކުރުވުމުގެ އިތުރުން މަލްޓި ޕާޓީ ޑިމޮކްރެސީ ވަޅުލިޔަ ނުދިނުމަށް ކަމަށެވެ.
ސަރުކާރާށާއި ރައީސަށް ފާޑުވިދާޅުވަމުން އާދަމް ޝަރީފް ކުރެއްވި ޓްވީޓްތަކުގެ ތެރެއިން ތިންވަން ޓްވީޓްގައި އޭނާ ވަނީ ''ތިޔަ ގޮވަނީ ގުދޯގުދޯ'' ކަމަށް ވިދާޅުވެފައެވެ. އަދި ''ގޯޅާބޯ ގޮވަން ދަސްކޮށްދިނީ ކޮންބައެއް؟'' ކަމަށް ވިދާޅުވެ ސުވާލު އުފައްދަވާފައެވެ.
ސަރުކާރާއި ރައީސް ނަޝީދަށް އާދަމް ޝަރީފް ފާޑު ވިދާޅުވެފައިވާއިރު، މި ފަހަރުގެ ލޯކަލް ކައުންސިލް އިންތިހާބުގައި އެމްޑީޕީއަށް ބޮޑު މެޖޯރިޓީއެއް ބޭނުންވާ ކަމަށް ރައީސް ސޯލިހު ވަނީ ވިދާޅުވެފައެވެ. މެޖޯރިޓީ ނުލިބިއްޖެނަމަ ސަރުކާރުގެ ވައުދު ފުއްދަން ހުރަސް އެޅޭނެ ކަމަށް ރައީސް ވިދާޅުވާ ވިދާޅުވުން އެމަނިކުފާނު ދަނީ ތަކުރާރު ކުރައްވަމުންނެވެ.
އޭޕްރީލް މަހުގެ ހަތަރު ވަނަ ދުވަހު ބާއްވަން ހަމަޖެހިފައިވާ ލޯކަލް ކައުންސިލް އިންތިހާބުތަކަށް ހުރިހާ ސިޔާސީ ޕާޓީއެއްގޮތަށް ދަނީ މިހާރު ދަނީ ތައްޔާރު ވަމުންނެވެ.
