ޓޮޓެންހަމް ހޮޓްސްޕާސްއަށް ކުޅެމުން އަންނަ ޑެންމާސކްގެ ކްރިސްޓިއަން އެރިކްސަން އިންޓަރ މިލާނަށް ބަދަލުވާން އުޅޭކަމުގެ އަޑުތައް މީޑިއާގަ ފެތުރަން ފަށައިފިއެވެ.
މީޑިއާ ރިޕޯޓުތައް ބުނާގޮތުން އެރިކްސަން އާއި މިލާނުން މިހާރު ވަނީ އެއްބަސްވުމަކަށް އައިސްފައެވެ. އަދި މިހާރު ކުރިޔަށްދަނީ ޓޮޓެންހަމާއި އިންޓަރގެ މަޝްވަރާތަކެވެ.
ޓޮޓެންހަމް އާއެކު އެރިކްސަން ހަދާފައިވާ އެއްބަސްވުން މި ސީޒަން ނިމުމުން ހަމަވާތީ މި ޓްރާންސްފަރ މާރކެޓުގައި އޭނާ ވިއްކާލުން ނޫންގޮތެއް ޓޮޓެންހަމް އަކަށް ނެތެވެ. އޭނާ ނުވިއްކާ ނަމަ ޖެހޭނީ މި ސީޒަން ނިމުމުން ހިލޭ އޭނާ ދޫކޮށްލާށެވެ.
މީޑިއާ ރިޕޯޓުތައް ބުނާ ގޮތުން އެރިކްސަން ގަތުމަށް އިންޓަރއިން ހުށަހެޅީ 10 މިލިއަން ޔޫރޯއެވެ. ނަމަވެސް ޓޮޓެންހަމްއިން ބޭނުންވަނީ އޭގެ ދެގުނަ އެވެ. މިއީ އިންޓަރގެ ފުރަތަމަ އޮފަރ ކަމުން އެ އަދަދު އިތުރު ކުރުމުގެ ފުރުސަތު އެބައޮތެވެ.
އިންޓަރގެ އިރުތުން ދުނިޔޭގެ މަޝްހޫރު ގިނަ ކްލަބުތަކުން އަންނަނީ އެރިކްސަން ހޯދުމަށް މަސައްކަތް ކުރަމުންނެވެ. އޭގެ ތެރޭގައި ސްޕެއިންގެ ގަދަ ބާރު ރެއާލް މެޑްރިޑްވެސް ހިމެނެއެވެ.
އަޔެކްސް އިން 2009 ވަނަ އަހަރު ކެރިޔަރު ފެށި އެރިކްސަން ޓޮޓެންހަމް އަށް ބަދަލުވީ 2013 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 291 މެޗުގައި 68 ލަނޑު ކާމިޔާބު ކޮށްފައެވެ.
ޓޮޓެންހަމްއާ އެކު ލީގް ކަޕްގެ ދެވަނަ 2014 ވަނަ އަހަރުގެ ސީޒަނުގައި ހޯދި އެރިކްސަން ވަނީ ޓޮޓެންހަމްގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދާފައެވެ.
މީގެ އިތުރުން ހަތަރު ފަހަރު ޑެންމާރކުގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ އެރިކްސަން ވަނީ ގައުމީ ޓީމަށް ކުޅުނު 95 މެޗުގައި 31 ލަނޑު ކާމިޔާބު ކޮށްފައެވެ.
