އަންނަ އޭޕްރީލް މަހުގެ ހަތަރު ވަނަ ދުވަހު, ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބު ބޭއްވުމަށް ނިންމާފައިވާއިރު، ވަގުތު މިދަނީ ކުޑަތަން ވަމުންނެވެ. އިންތިޚާބަށް ކުރިމަތިލުމަށް މާލަސްތަކެއް ނުވެ، އިލެކްޝަންސް ކޮމިޝަނުން އިޢުލާނު ކުރާނެ އެވެ. އިލެކްޝަންސް ކޮމިޝަނުން ދަނީ، އެކޮމިޝަނަށް ޤާނޫނުން މަތިކޮށްފައިވާ އަދި އެކޮމިޝަނުން ނިންމާފައިވާ ތާވަލުތަކާ އެއްގޮތަށް އިންތިޚާބުގެ ކަންކަން ކުރަމުންނެވެ.

މީގެ ކުރިންވެސް ލޯކަލް ކައުންސިލް ތިން އިންތިޚާބެއް ބާއްވާފައި ވެއެވެ. އެއިން ކޮންމެ އިންތިޚާބެއްގައިވެސް އެންމެ ކާމިޔާބު ޕާޓީއަކީ މިހާރު ސަރުކާރު ހިންގާ މައިޕާޓީ އެމްޑީޕީ އެވެ. ސަރުކާރާ އިދިކޮޅުގައި އޮތަސް އެމްޑީޕީ ފާހަގަ ކުރެވެނީ ލޯކަލް ކައުންސިލް އިންތިޚާބުގައި، އަދި އެހެން އިންތިޚާބުތަކުގައި ވެސް އެންމެ ބޮޑެތި ކާމިޔާބުތައް ހޯދާ ޕާޓީގެ ގޮތުގައެވެ. އެގޮތުން، އެންމެ ފާހަގަކޮށްލެވެނީ، ކުރީގެ ރައީސް ޢަބްދުﷲ ޔާމީނުގެ ވެރިކަމުގައި، ސަރުކާރުގެ ހުރިހާ ވަޞީލަތްތަކާއި، މުވައްޒަފުން ބޭނުންކޮށްގެން، އަދި ނުވިތާކަށް ދައުލަތުގެ އެތައް މިލިއަން ރުފިޔާއިން ވައްކަންކޮށްގެން، ކެމްޕެއިން ކުރިއިރު، އިދިކޮޅުގައި އޮވެ، އެމްޑީޕީން މާލެ ސިޓީ އާއި އައްޑޫ ސިޓީ އަދި ފުވައްމުލައް ސިޓީގެ އިތުރުން، މުޅި ރާއްޖެއިން ހޯދި ކާމިޔާބެވެ.

ކެމްޕެއިނަކީ އެމްޑީޕީއަށް ވަރަށް ފަރިތަ އެއްޗެކެވެ. ކެމްޕެއިން ކުރުމާއި، އެކަން ކުރުމުގެ ރޫޙު ހުރީވެސް އެމްޑީޕީގައެވެ. އެމްޑީޕީގެ ޢާންމު މެންބަރުން ޕާޓީއަށް މަސައްކަތްކޮށް، ކެމްޕެއިން ކޮށްދެނީ ފައިސާއަކަށް ނޫނެވެ. ނުވިތާކަށް އެމީހަކަށް ވީވަރަކުން ޕާޓީގެ ކަންކަމަށް ޚަރަދު ކުރާ މީހުން ވެސް ވަކި މަދެއް ނޫނެވެ. އެހެންކަމުން އެމްޑީޕީއާ އެހެން ޕާޓީތަކާއި ވަރަށް ތަފާތެވެ. އެ ތަފާތު ކެމްޕެއިން ތަކުންނާއި، އިންތިޚާބުތަކުގެ ނަތީޖާތަކުން އެދަނީ ފެންނަމުންނެވެ.

އިންތިޚާބު ބޯމަތިވެގެން އުޅޭއިރު، އެމްޑީޕީން ނޫން ބަޔަކު ކެމްޕެއިނެއް ކުރާތަނެއް ނުފެނެ އެވެ. އެމްޑީޕީން ވަނީ އެޕާޓީގެ ޓިކެޓުގައި ކައުންސިލްތަކަށް ވާދަކުރަން ބޭނުންވާ ފަރާތްތަކަށް އެޕާޓީން ބާއްވާ ޕްރައިމަރީއަށް ހުޅުވާލާފައެވެ. އެގޮތުން ހުޅުވާލި މުއްދަތު ނިމުނުމުއިރު، މާލެ ސިޓީ އަށް 49 ކެންޑިޑޭޓުން، އައްޑޫ ސިޓީއަށް 44 ކެންޑިޑޭޓުން އަދި ފުވައްމުލައް ސިޓީ އަށް 15 ކެންޑިޑޭޓުން ވާދަ ކުރެއެވެ. އަދި އަތޮޅު ކައުންސިލްތަކުގެ ރައީސްގެ މާޤާމުތަކަށް 53 ކެންޑިޑޭޓުން ވާދަކުރެއެވެ. ރަށު ކައުންސިލްތަކަށް 1067 ކެންޑިޑޭޓުން ކުރިމަތިލާފައިވާއިރު، ދާދިފަހުން ސިޓީއެއްގެ ދަރަޖަ ލިބިފައިވާ ކުޅުދުއްފުށި ސިޓީގެ ކައުންސިލަށް ކުރިމަތި ލުމުގެ ފުރުޞަތު މިހާރު ވަނީ ހުޅުވާލާފައެވެ.

އެމްޑީޕީން އެޕާޓީގެ ޕްރައިމަރީގެ ޙަރަކާތްތައް ހިންގަމުން، ކެމްޕެއިން ވެސް އެވަނީ "އެޖެންޑާ 19 ރަށަށް" ނަމުގައި ފަށާފަ އެވެ. އެގޮތުން މިހާރު އެމްޑީޕީން 300 މެންބަރުން ހިމެނޭ ވަފުދެއް ކަނޑުމަގުން ފުރައިގެން ރާއްޖޭގެ އެންމެ އުތުރުގައި އެދަނީ "އެޖެންޑާ 19 ރަށަށް، ތިލަދުންމަތީ ދަތުރު" ނަމުގައި ކެމްޕެއިން ކުރަމުންނެވެ.

އެކަމަކު އެމްޑީޕީ ފިޔަވާ ދެން ހުރި ޕާޓީތަކުން އަދި އެކަށީގެންވާ މަސައްކަތްތަކެއް ކުރާތަނެއް ނުފެނެއެވެ. ޕީޕީއެމުން އުޅެނީ އެޕާޓީގެ ޓިކެޓުގައި ވާދަކުރަން ބޭނުންވާ މީހުން ގިނަކަމުން ވާދަކުރަން ބޭނުންވާ ފަރާތްތަކަށް އިތުރަށް ވަގުތު ދީގެންނެވެ. ޖުމްހޫރީ ޕާޓީން ބުނަނީ ހުރިހާ ކައުންސިލަކަށް ވާދަކުރާނެ ކަމަށެވެ. ދެން ހުރި ޕާޓީތަކުން ވެސް ކައުންސިލް އިންތިޚާބުގައި ވާދަކުރާނެކަމަށް ބުނެއެވެ.

މިދާވަރުން ދަންޏާ، ކައުންސިލްތަކުގެ އިންތިޚާބުގެ ރޭސް އެމްޑީޕީން ނިންމާއިރު، ކައިރި ހިސާބަކުން އެހެން ޕާޓީތައް ފެންނާނެ ކަމާމެދު ޝައްކެވެ.

ޚާއްޞަކޮށް، އިދިކޮޅު ޕީޕީއެމް ކޯލިޝަން އުޅޭނީ ޝަކުވާތަކާއިގެންނެވެ. އަދި ވެސް ރައްޔިތުންގެ ލާބަޔާ މަންފާއަށް މަސައްކަތް ކުރާތަނެއް ނުފެނެ އެވެ. އަދި ވެސް އުޅެނީ، ރައްޔިތުންގެ ފައިސާއިން އެތައް މިލިއަން ރުފިޔާއިން ވައްކަން ކޮށްފައިވާ، އިދިކޮޅު ކޯލިޝަނުގެ ލީޑަރު ޖަލުން ނުނެރެވިގެން ނެވެ. މިއީވެސް ފާޑެއްގެ ކަމެކެވެ. އިދިކޮޅު ލީޑަރު ޖަލުން ސަލާމަތް ކުރާ ވާހަކަ އިދިކޮޅު ކޯލިޝަނުގެ އިސްބޭފުޅުން ދައްކަވާއިރު، ކުރަނީ ކޮންކަމެއްތޯ އެވެ. ކުރާކަމެއް ނުއެއް ފެނެއެވެ. އިދިކޮޅު ލީޑަރު ޖަލަށްލިތާ ކައިރީގައި ދެތިން ރެއަކު، ޕާޓީ އޮފީސް ކުރިމަތީ މުޒާހާތައް ކުރިއެެވެ. ނަމަވެސް އެކަން ވެސް "ވައިވެގެން" އެންމެފަހުން ހުއްޓާލީއެވެ. ދެން މިދައްކަނީ މުޅިންވެސް "ހޮޅި ވާހަކަ" ތަކެވެ.

ކެމްޕެއިން ނުކުރެވިގެން އުޅެނީވެސް އިދިކޮޅު ލީޑަރު ޖަލުން ނުނެރެވިގެން ކަމަށް ބުނާއިރު، އެއީ ކެމްޕެއިން ކުރަން ދަންނަ، އަދި ލާމަރުކަޒީ ނިޒާމާ މުޅިން ދެކޮޅު ބޭފުޅެކެވެ. ވީމާ، ކެމްޕެއިން ކުރެވެން އޮތީ، އިދިކޮޅު ލީޑަރު ޖަލުން ނެރެގެން ކަމަށްވާނަމަ، އިތުރު ބަހަނާއެއް ނުދައްކާ ކައުންސިލުތަކުގެ އިންތިޚާބުގައި ބައިވެރިވުމަށް ވުރެ، ނުވުން މާރަނގަޅުވާނެ ނޫންތޯ އެވެ. އަދި އަމުދުން ލާމަރުކަޒީ ނިޒާމަށް ގަޔާނުވާ، ލީޑަރެއް ގޮވައިގެން ކުރާނެ ކެމްޕެއިން އޮންނާނެ ތޯއެވެ.