ފަނޑިޔާރުންގެ އިސްތިއުނާފު މަޖިލިސް އެކުލަވައިލައިފި
މި މަޖިލީހަކީ ކޮންމެ ޖުޑީޝަލް އަހަރަކަށް އެކުލަވާލަން ޖެހޭ މަޖިލީހެއް
މިހިނގާ 2020 ވަނަ އަހަރުގެ ފަނޑިޔާރުންގެ އިންތިއުނާފް މަޖިލީހުގެ މެމްބަރުން
މި ހިނގާ 2020 ވަނަ އަހަރަށް، ފަނޑިޔާރުންގެ އިސްތިޢުނާފު މަޖިލިސް އެކުލަވާލައިފިއެވެ.
ފަނޑިޔާރުންގެ އިސްތިޢުނާފް މަޖިލީހަކީ ޖުޑީޝަލް ސަރވިސް ކޮމިޝަން (ޖޭއެސްސީ)ގެ ޤާނޫނަށް 2 ވަނަ އިޞްލާޙު ގެނައުމުގެ ޤާނޫނުގެ 2-33 ގެ (ވ) އިން ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އަށް މަތިކޮށްފައިވާ ޒިންމާގެ ދަށުން އެކުލަވާލާފައިވާ މަޖިލީހެކެވެ. މި މަޖިލީހަށް ހުށަހެޅޭ މައްސަލަތަކުގެ އިދާރީ އެންމެހައި އިންތިޒާމުތައް ހަމަޖައްސައި، އެ މަސައްކަތްތައްކުރާނީ އިދާރީ ގޮތުން މަޖިލިސް ކުރިއަށްދާނެ ގޮތް ކަނޑައަޅާފައިވާ، ޑީޖޭއޭއިން އެކަމަށް އެކުލަވާލާފައިވާ ޤަވާޢިދުގައިވާ ގޮތުގެ މަތިންނެވެ.
އެހެންކަމުން ފަނޑިޔާރަކާގުޅޭ ޝަކުވާއެއް ބަލައި، ޖުޑީޝަލް ސަރވިސް ކޮމިޝަނުން ނިންމާ ނިންމުންތަކުގެ، ފަނޑިޔާރަކު މަޤާމުން ވަކިކުރަން ރައްޔިތުން މަޖިލީހަށް ހުށަހެޅުމަށް ނިންމާ ނިންމުންތައް ފިޔަވައި، އެނޫން ނިންމުންތައް އިސްތިޢުނާފު ކުރުމަށްޓަކައި ހުށަހެޅަން ޖެހޭނީ އެ މަޖިލީހަށެވެ.
ފަނޑިޔާރުންގެ އިސްތިޢުނާފް މަޖިލީހުގެ ޤަވާއިދުގެ 4 ވަނަ މާއްދާގެ (ށ) ގައިވާ ގޮތުގެ މަތިން މި މަޖިލިސް އެކުލެވިގެންވަނީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުންގެ ތެރެއިން އުއްތަމަފަނޑިޔާރާއި، ޖުޑީޝަލް ސަރވިސް ކޮމިޝަނުގައި އެ ކޯޓުގެ ފަނޑިޔާރުންގެ ތެރެއިން ހިމެނޭ ފަނޑިޔާރު ފިޔަވައި އެހެން ފަނޑިޔާރަކާއި، ދިވެހިރާއްޖޭގެ ހައިކޯޓުގެ ފަނޑިޔާރުންގެ ތެރެއިން ޖުޑީޝަލް ސަރވިސް ކޮމިޝަނުގައި އެ ކޯޓުގެ ފަނޑިޔާރުންގެ ތެރެއިން ހިމެނޭ ފަނޑިޔާރު ފިޔަވައި އެހެން ފަނޑިޔާރަކާއި، އަދި ސުޕީރިއަރ ކޯޓުތަކުގެ ފަނޑިޔާރުންގެ ތެރެއިން ޖުޑީޝަލް ސަރވިސް ކޮމިޝަނުގެ މެންބަރެއްގެ ގޮތުގައި ނުހިމެނޭ ފަނޑިޔާރެއް ހިމެނޭ ގޮތަށް 3 (ތިނެއް) ފަނޑިޔާރުގެ މައްޗަށެވެ.
އެގޮތުން 2020 ވަނަ އަހަރަށް އެކުލަވައިލެވުނު ފަނޑިޔާރުންގެ އިސްތިޢުނާފް މަޖިލީހުގައި ހިމެނެނީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރު، ދިވެހިރާއްޖޭގެ ހައިކޯޓުގެ ފަނޑިޔާރު މުޙައްމަދު ނިޔާޒް އަދި ސިވިލް ކޯޓުގެ އިސް ޤާޟީ ޢަބްދުﷲ ޢަލީއެވެ.
ފަނޑިޔާރުންގެ އިސްތިޢުނާފް މަޖިލީހުގެ ޤަވާއިދުގައިވާ ގޮތުގެ މަތިން އެ މަޖިލީހަށް މައްސަލަ ހުށަހެޅުމުގެ އިންތިޒާމު ޑީޖޭއޭގައި ވަނީ ހަމަޖައްސާފަ އެވެ.
ފަނޑިޔާރުންގެ އިސްތިޢުނާފު މަޖިލީހަކީ، ކޮންމެ ޖުޑީޝަލް އަހަރަކަށް ކަނޑައަޅަންޖެހޭ މަޖިލީހެކެވެ.
