އެޑިއުކޭޝަން މިނިސްޓްރީއިން ކަނޑައަޅާފައިވާ މިންގަނޑުތަކަށް ވުރެ ދަށް 55 ސްކޫލެއް!
މިނިސްޓްރީގެ ސްޓެންޑަޑްތައް ނުވަތަ މިންގަނޑުތަކަށް ވުރެ ދަށް، 55 ސްކޫލެއް ފާހަގަކުރެވުނު
ދިރާސީ އައު އަހަރު ފެށުމަށް އިސްކަންދަރު ސްކޫލްގައި ބޭއްވި ރަސްމިއްޔާތުގެ ތެރެއިން
އެޑިއުކޭޝަން މިނިސްޓްރީން ރާއްޖޭގައި ހުރި ހުރިހާ ސްކޫލްތަކެއް ރިވިއު ހެދިއިރު، މިނިސްޓްރީގެ ސްޓެންޑަޑްތައް ނުވަތަ މިންގަނޑުތަކަށް ވުރެ ދަށް، 55 ސްކޫލެއް ފާހަގަކުރެވުނު ކަމަށެވެ.
ރާއްޖެޓީވީގެ 'ފަލަސުރުހީ' ޕްރޮގްރާމުގައި ވާހަކަދައްކަވަމުން މިހެން ވިދާޅުވީ، އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އައިޝަތު އާތިޔާ ނަސީރެވެ. ނަމަވެސް އެއީ ކޮން ސްކޫލްތަކެއް ކަމެއް ހާމައެއް ނުކުރައްވައެވެ.
މިހެން ފާހަގަކުރެވުނު ސްކޫލްތަކުގެ އިތުރު ދިރާސާތަކެއް ކުރުމަށްފަހު، މިހާރު މި މައްސަލަތައް ދިމާވާން މެދުވެރިވީ ސަބަބުތައް ދެނެގަނެވިފައިވާ ކަމަށް އާތިޔާ ވިދާޅުވިއެވެ.
އާތިޔާ ވިދާޅުވީ މި ފެށޭ އަހަރު އެ 55 ސްކޫލް އެކްޝަން ޕްލޭންއަކާއި އެކު ރަނގަޅު ފެންވަރަކަށް ގެނައުމަށް މަސައްކަތް ކުރަމުންދާނެ ކަމަށެވެ. އަދި ކުރިއަށް އޮތް ތިނެއް، ނުވަތަ ހަތަރު އަހަރުގެ ތެރޭގައި ރާއްޖޭގެ އެއްވެސް ސްކޫލަކީ އަންޑަރ ޕާރފޯމިންގް ނުވަތަ މިނިސްޓްރީ އޮފް އެޑިއުކޭޝަނުން ކަނޑައަޅާ ވަކި މިންގަނޑަކަށް ވުރެ ތިރީގައި ތިބޭ އެއްވެސް ސްކޫލެއް ނުހުންނާނެ ކަމުގެ ޔަގީންކަން އަރުވާކަމަށެވެ.
އޭގެ އިތުރުން، އަތޮޅު ތެރޭގައި ހުންނަ ސްކޫލްތަކާއި، މާލޭގައި ހުންނަ ސްކޫލްތަކާއި މެދު ތަފާތުކުރުންތަކެއް ގެންގުޅޭކަމަށް ބައެއް ފަރާތްތަކުން ދައްކާ ވާހަކާތައްވެސް އާތިޔާ ދޮގުކުރެއްވިއެވެ. އަދި އެކަހަލަ އެއްވެސް ތަފާތުކުރުމެއް ނުގެންގުޅޭ ކަމަށް ވިދާޅުވިއެވެ.
އަތޮޅުތެރޭގައި ހުންނަ ސްކޫލްތަކުގެ ފެންވަރު ދަށްވެގެން ބައެއް ފަރާތްތަކުން މާލެއަށް ހިޖުރަކުރާ މަައްސަލައަށްވެސް އާތިޔާ ވަނީ ރައްދު ދެއްވާފައެވެ. އެގޮތުން އާތިޔާ ވަނީ މާލެއަށް މީހުން ހިޖުރަކުރަނީ ހަމައެކަނި ތައުލީމުގެ ފުރުސަތުތަކަށް އެކަނި ނޫންކަމަށް ވިދާޅުވެފައެވެ. އާތިޔާ ދެކިވަޑައިގަންނަވާ ގޮތުގައި، މާލެއަށް މީހުން ހިޖުރަ ކުރަނީ ތައުލީމުގެ އިތުރުން، ވަޒީފާގެ ފުރުސަތުތަކާއި ސިއްހީ ޚިދުމަތް ހޯދުމަށް ކަމަށް ވެސް އާތިޔާ ވިދާޅުވިއެވެ.
