އުނގެނުމަކީ ހަމައެކަނި މުދައްރިސް ދޭ ފިލާވަޅުތައް ދަސްކުރުމެއް ނޫން: ރައީސް
އަމާޒަކީ ކޮންމެ ދަރިވަރަކީވެސް ދީނަށް ލޯބިކުރާ އަހުލާގު ރަނގަޅު ގައުމަށް ވަފާތެރި ދަރިވަރަކަށް ހެދުން: ރައީސް
ރައީސް ސޯލިހު ސްކޫލުގެ ދަރިވަރުންނާއި އެކު
ތައުލީމު އުނގެނުމަކީ ހަމައެކަނި މުދައްރިސުން ދޭ ފިލާވަޅުތައް ދަސްކުރުމެއް ނޫންކަމަށާއި، ގިނަ ކުދިންތަކެއް އެއް ތަނެއްގައި ތިބެގެން ކިޔަވަނީ މުހިންމު ސަބަބެއްގައި ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އާދިއްތަ ދުވަހު މާލޭގައި އަލަށް ހުޅުވި ޢިއްޒުއްދީން ސްކޫލު ހުޅުއްވުމައި ދެއްވައި ވާހަކަ ދައްކަަަވަމުން ރައީސް ވިދާޅުވީ، ޢިއްޒުއްދީން ސްކޫލުގެ ހުރިހާ ކަމެއްވެސް އިންތިޒާމް ކުރެވިފައި ހުންނާނީ، އަމިއްލަ ނަފްސާއި މުޖުތަމައުގެ ކުރިއެރުމަށާއި، ގައުމުގެ ހެވާ ލާބަޔަށް މަސައްކަތްކުރާ އަދި 21 ވަނަ ސައްތާގެ އީޖާދީ ދިރިއުޅުމަށް ލޯތައް ހުޅުވި ސިކުނޑިތައް ފައްކާވެފައިވާ ދަރިވަރުންތަކެއް ބިނާކުރުމަށް ކަމަށެވެ.
އެމަނިކުފާނު ވިދާޅުވީ، ސަރުކާރުގެ އަމާޒަކީ ތައުލީމީ ހިޔާވަހިކަން ލިބޭ ކޮންމެ ދަރިވަރަކީވެސް ދީނަށް ލޯބިކުރާ އަހުލާގު ރަނގަޅު ގައުމަށް ވަފާތެރި ދަރިވަރަކަށް ހެދުން ކަމަށެވެ. ރައީސް ވިދާޅުވި ގޮތުގައި، ސްކޫލު މަރުހަލާ ނިމޭއިރު ކޮންމެ ދަރިވަރަކުވެސް ހުންނާނީ ހަޔާތުގެ ގޮންޖެހުންތަކާއި ކުރިމަތިލެވޭ ވަަރަށް އަމިއްލަ ނަފްސަށް އިތުބާރު ކުރެވި ތަރައްގީ ހޯދުމަށްޓަކައި އަމިއްލަ ފައިމައްޗަށް ތެދުވެ ތައްޔާރުވެފައެވެ.
އެ ތަރައްގީ އަކީ ވަށާޖެހޭ ފުރިހަމަ ތައުލީމީ ނިޒާމެއްކަން ފާހަގަކުރައްވައި ވިދާޅުވީ، ތަރައްގީ އަކީ އިންސާނާ ސިކުނޑިން އުފެދިގެން އަންނަ އުފެއްދުންތެރި އީޖާދީ ވިސްނުމެއް ކަމަށެވެ.
އިންސާނީ ވިސްނުން ތަރައްގީ ކޮށްދޭ އެއްޗަކީ ތައުލީމުކަން ވިދާޅުވެ، އޭގެ ފަހުން ރައީސް ވަނީ ދަރިވަރުންނާއި ސުވާލެއް ކުރައްވާފައެވެ. ''ޔުނީފޯމް ލައިގެން ފޮތް ދަބައިސް ހިފައިގެން ސްކޫލަށް އައުމުގެ ބޭނުމަކީ ކޮބައިތޯ؟'' އެ ސުވާލަށް އަމިއްލަފުޅަށް ޖަވާބު ދެއްވަމުން ރައީސް ވިދާޅުވީ، ކޮންމެ ކުއްޖެއްގެ ހިތުގައިވެސް އޮންނާނެ ޖަވާބަކީ ''ކިޔަވާށޭ ސްކޫލަށް އަންނަނީ'' އެވެ. އެއަށް ފަހު އެމަނިކުފާނު ވަނީ ހަގީގީ ކިޔެވުމަކީ ކޮބައިކަން ދަރިވަރުންނަށް ބަޔާން ކޮށްދެއްވާފައެވެ.
ރައީސްގެ ވާހަކަފުޅު ކުރިޔަށް ގެންދަވަމުން އެމަނިކުފާނު ވިދާޅުވީ، ކޮންމެ ކުއްޖެއްގެ އަޒުމަކަށް ހަދަން ޖެހެނީ ކޮންމެ ދުވަހަކުވެސް އެހެން ކުއްޖަކަށް ކޮންމެވެސް ރަނގަޅު ކަމެއް ކޮށްދިނުން ކަމަށެވެ.
ރައީސް ސޯލިހު ވަނީ ރާއްޖޭގެ ހުރިހާ ސްކޫލުގެ ދަރިވަރުންނަށް މައިންބަފައިންނާއި ބެލެނިވެރިންގެ ބަސް ގަބޫލްކުރާ ދަރިވަރުންނަށްވުމަށް އިލްތިމާސް ކުރައްވާފައެވެ.
ރައީސް އިބްރާހިމް މުހައްމަދު ސޯލިހު ހުޅުއްވައިދެއްވި އިއްޒުއްދީން ސްކޫލަކީ މާލޭގައި ހުޅުވިގެންދިޔަ 16 ވަނަ ސްކޫލެވެ. އަދި މިއީ މި ސަރުކާރުން ގެންގުޅޭ ވަށާ ޖެހޭ ތައުލީމީ ނިޒާމް ތަންފީޒު ކުރެވިގެންދާ ފުރަތަމަ ސްކޫލް ކަން ފާހަގަކޮށްލަން ޖެހެއެވެ.
