ޢަމާޒަކީ މިއަހަރު ނިމުމުގެ ކުރިން 10،000 މެންބަރުން ހަމަކުރުން: އެމްއާރްއެމް
ޤައުމީ ޖަލްސާއަށް ގޮފިތައް ހެދުމުގެ ތައްޔާރީތައް ދަނީ ވަމުން
އެމްއާރްއެމްގެ ޖަލްސާއެއް
މޯލްޑިވްސް ރިފޯރމް މޫވްމަންޓް (އެމްއާރްއެމް) ގެ ޢަމާޒަކީ މި އަހަރު ނިމުމުގެ ކުރިން އެ ޕާޓީއަށް 10،000 މެންބަރުން އިތުރު ކުރުމަށްކަމަށް އެ ޕާޓީން ބުނެފިއެވެ.
ހޮނިހިރު ދުވަހުގެރޭ ރާއްޖެޓީވީގެ "ފަލަސުރުޚީ" ޕްރޮގުރާމުގައި ވާހަކަ ދައްކަވަމުން އެމްއާރްއެމްގެ ސެކްރެޓަރީ ޖެނެރަލް ޢަބްދުލް ޢަލީމް ވިދާޅުވީ، ކުރިއަށް އޮތް ޤައުމީ ޖަލްސާއަށް ގޮފިތައް ހަދައި، ކޮންމެ ރަށަކުންވެސް މެންބަރުން ބައިވެރި ކުރުވުމުގެ މަސައްކަތް ކުރަމުންދާ ކަމަށެވެ. އަދި ކެމްޕެއިން ދަތުރުތައް ކުރާއިރު ޕާޓީއަށް މެންބަރުން އިތުރު ކުރުމަށް މަސައްކަތް ކުރަމުންދާ ކަމަށެވެ.
އެގޮތުން އުންމީދަކީ މިއަހަރު ނިމުމުގެ ކުރިން 10،000 މެންބަރުން ޕާޓީގައި ތިބުން ކަމަށް އޭނާ ވިދާޅުވިއެވެ.
އަލީމް އިތުރަށް ވިދާޅުވީ، ޕާޓީއަށް މެންބަރުން އިތުރު ކުރުމުގެ މަސައްކަތް ކުރި ނަމަވެސް ފައިސާ ދީގެން އެކަން ނުކުރާނެ ކަމަށެވެ. އަދި ކުރިން ޕީޕީއެމްގައި މަސައްކަތް ކުރިއިރު ފައިސާ ދީގެން މެންބަރުން ގަނެފައިވާކަމަށްވެސް އޭނާ ވަނީ ތުހުމަތުކޮށްފައެވެ.
އެމްއާރްއެމުން އެ ޕާޓީއަށް މެންބަރުން އިތުރު ކުރުމުގެ މަސައްކަތް ފަށާފައިވާއިރު، 2020 ވަނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބުގައި އެމްއާރްއެމްގެ ފަރާތުން ވާދަކުރުމަށް ޝައުޤުވެރިކަން ހުރި ފަރާތްތަކަށް އެފުރުޞަތު ވަނީ ހުޅުވާލެވިފައެވެ. އެގޮތުން 25 ޖެނުއަރީ 2020 ގެ 16:00 ގެ ނިޔަލަށް ވާދަ ކުރުމުގެ ފުރުޞަތު އެ ޕާޓީން ވަނީ ހުޅުވާލާފައެވެ.
